អ្នកទោសកូរ៉េខាងជើងម្នាក់ ហែកគុករត់នៅចិន អាជ្ញាធរប្រកាសឱ្យរង្វាន់ដល់អ្នកផ្តល់តម្រុយ
កូរ៉េខាងជើង ៖ អ្នកទោសសញ្ជាតិកូរ៉េខាងជើងម្នាក់ បានហែកគុករត់ចេញពីពន្ធនាគារមួយស្ថិតក្នុងទីក្រុង Jilin ប្រទេសចិន។
កូរ៉េខាងជើង ៖ អ្នកទោសសញ្ជាតិកូរ៉េខាងជើងម្នាក់ បានហែកគុករត់ចេញពីពន្ធនាគារមួយស្ថិតក្នុងទីក្រុង Jilin ប្រទេសចិន។ នេះបើតាមការចុះផ្សាយរបស់ CNN នៅរសៀលថ្ងៃពុធនេះ។
អាជ្ញាធរចិនប្រកាសផ្តល់ប្រាក់រង្វាន់ជាង ២៣.០០០ដុល្លារសម្រាប់ការផ្តល់តម្រុយឈានដល់ការចាប់ខ្លួនអ្នកទោសនោះដែលរត់ចេញពីគុកកាលពីថ្ងៃច័ន្ទកន្លងទៅនេះ។
អ្នកទោសនោះ ដែលត្រូវបានគេស្គាល់ឈ្មោះថា Zhu Xianjian បានចូលមកក្នុងប្រទេសចិនដោយខុសច្បាប់កាលពីឆ្នាំ ២០១៣។ ៣ឆ្នាំក្រោយមក គាត់ត្រូវបានកាត់ទោសឲ្យជាប់គុករយៈពេល ១១ឆ្នាំពីបទឆ្លងដែនខុសច្បាប់ ការលួ.ច ប្ល.ន់ និងចោរកម្ម។
បើយោងតាមសេចក្តីជូនដំណឹងនៃការផ្តល់ប្រាក់រង្វាន់របស់អាជ្ញាធរបានឲ្យដឹងថា អ្នកទោស Zhu Xianjian បានរត់ចេញពីគុកនៅម៉ោង ៦ល្ងាចកាលពីថ្ងៃច័ន្ទ បន្ទាប់ពីបានឡើងលើរោងមួយជាប់ខ្លោងទ្វារ ខណៈដែលអ្នកទោសជាច្រើនបានបញ្ចប់កិច្ចការពួកគេនៅក្នុងទីធ្លា។
សេចក្តីជូនដំណឹងបានផ្តល់ប្រាក់រង្វាន់ចំនួន ១៥.៦០០ដុល្លារសម្រាប់ការផ្តល់ព័ត៌មានដែលអាចជួយឲ្យប៉ូលីសចាប់អ្នកទោសនោះ ហើយវាអាចកើនដល់ ២៣.៤០០សម្រាប់ការផ្តល់តម្រុយដែលឈានដល់ការចាប់ខ្លួនគាត់ផ្ទាល់។
សកម្មភាពនៃការលួចចេញពីគុកត្រូវបានថតជាប់ដោយកាមេរ៉ាសុវត្ថិភាព និងត្រូវបានបង្ហោះនៅលើបណ្តាញសង្គមចិនដោយប្រព័ន្ធផ្សព្វផ្សាយជាច្រើន។
បើតាមវីដេអូ អ្នកទោស Zhu Xianjian បានតោងជញ្ជាំងឡើងលើរោងមួយ និងបានរត់លើដំបូល ទៅកាន់របង រួចគាត់បានប្រើប្រាស់របស់ទំនងជាខ្សែដើម្បីបំផ្លាញរបងអគ្គិសនីនៅជុំវិញជញ្ជាំងគុក បណ្តាលឲ្យមានបែកផ្កាភ្លើងផងដែរ។ ក្រោយមក គាត់បានជាន់លើរបង ដើម្បីឡើងលើរបងដែកមួយទៀត និងបានគេចខ្លួនបាត់ ខណៈអ្នកទោសជាច្រើន និងឆ្មាំគុកបានត្រឹមឈរមើល។
បើយោងតាមគេទំព័ររដ្ឋចិន Global Times ប៉ូលីសបានធ្វើការបិទច្រកចូលទាំងអស់នៅក្នុងភូមិក្បែរៗនោះ និងបានធ្វើការស្វែងរកតាមផ្ទះនីមួយៗ។
វីដេអូផ្សេងទៀតបានបង្ហាញថា អ្នកទោសកូរ៉េខាងជើងនោះបានរមៀលនៅលើដី បន្ទាប់ពីហក់ចុះពីរបងខ្ពស់។ គាត់សង្ងំនៅទីនោះមួយភ្លេ មុនពេលក្រោកឡើង និងរត់គេចខ្លួន។
សូមរម្លឹកថា បើយោងតាឯកសារតុលាការចិនបានឲ្យដឹងថា កាលពីយប់អាធ្រាត្រថ្ងៃទី ២១ ខែកក្កដា ឆ្នាំ ២០១៣ លោក Zhu Xianjian ដែលជាកម្មកររ៉ែ បានហែលទឹកទន្លេឆ្លងពីប្រទេសកូរ៉េខាងជើង ចូលក្នុងភូមិចិនមួយស្ថិតក្នុងទីក្រុង Tumen នៃខេត្ត Jilin។
រយៈពេលប៉ុន្មានម៉ោងក្រោយ គាត់បានលួចចូលក្នុងផ្ទះប្រជាជនដើម្បីលួចលុយ ទូរស័ព្ទដៃ ស្បែកជើង និងខោអាវ។ ពេលលួចចូលក្នុងផ្ទះទី ៣ ស្ត្រីចំណាស់ម្នាក់បានឃើញគាត់ និងបានស្រែកឲ្យគេជួយ។
អ្នកទោសរូបនោះបាននិយាយក្នុងតុលាការថា ខ្ញុំបានដកកាំបិ.តនៅចង្កេះខ្ញុំ និងបានចា.ក់ស្ត្រីចំណាស់ម្នាក់ពីក្រោយខ្នង។ បន្ទាប់មកខ្ញុំឃើញថា គាត់កំពុងយូរកាបូប។ ខ្ញុំព្យាយាមយកវា ប៉ុន្តែស្ត្រីចំណាស់មិនអោយ ដូច្នេះខ្ញុំក៏ចា.ក់គាត់ពីរបីកាំបិ.តទៀត»។
ក្រោយពេលធ្វើសកម្មភាពរួច គាត់ត្រូវបានចាប់ខ្លួន នៅពេលព្យាយាមរត់គេចតាមរថយន្តតាក់ស៊ី។ ចំណែកស្ត្រីចំណាស់នោះរងរបួសយ៉ាងខ្លាំង ប៉ុន្តែមិនស្លា.ប់ទេ។
អំឡុងពេលនៅក្នុងគុក ទោសរបស់លោក Zhu Xianjian ត្រូវបានកាត់បន្ថយចំនួន ២ដង គឺក្នុងឆ្នាំ ២០១៧ និង ២០២០ ដោយសារតែការបង្ហាញពីវិប្បដិសារី ការមានវិន័យល្អ និងបានចូលរួមយ៉ាងសកម្មក្នុងការអប់រំមនោគមវិជ្ជា វប្បធម៌ និងការបណ្តុះបណ្តាលវិជ្ជាជីវៈ និងការងារ។ នេះបើតាមការចុះផ្សាយរបស់ CCTV។ អ្នកទោសកូរ៉េខាងជើងនោះ នឹងត្រូវគេដោះលែងនៅខែសីហា ឆ្នាំ ២០២៣ខាងមុខ។
បើតាមអង្គការសិទ្ធិមនុស្ស Human Rights Watch ជនផ្តាច់ខ្លួនកូរ៉េខាងជើងណាដែលត្រូវបានគេបញ្ជូនត្រឡប់ទៅកាន់ប្រទេសវិញអាចប្រឈមនឹងទោសធ្ងន់ដូចជាការធ្វើទារុណកម្មជាដើម៕ (យោងតាមប្រភព៖ CNN)
ចែករំលែកព័តមាននេះ