ត្រឹមតែ ២ថ្ងៃ អ្នកនាង ខ្ញុង បង្ហាញទឹកប្រាក់ដែលទទួលបានពីសប្បុរជន ជាង ៥ម៉ឺនដុល្លារហើយ
រាជធានីភ្នំពេញ ៖ តារាកំប្លែងស្រី អ្នកនាង ស្រេង សុកាន់ដា ហៅខ្ញុង នៅវេលាម៉ោង១០និង២៩នាទីព្រឹកថ្ងៃទី២០ តុលា ២០២១នេះ…
រាជធានីភ្នំពេញ ៖ តារាកំប្លែងស្រី អ្នកនាង ស្រេង សុកាន់ដា ហៅខ្ញុង នៅវេលាម៉ោង១០និង២៩នាទីព្រឹកថ្ងៃទី២០ តុលា ២០២១នេះ បានធ្វើការផ្សាយផ្ទាល់នៅលើគណនីហ្វេសប៊ុករបស់ខ្លួន និយាយពីបញ្ហាទាំងអស់ ពាក់ព័ន្ធទៅនឹងបំណុលវ័ណ្ឌក ដែលអ្នកនាងខ្ញុង អះអាងថា ជារឿងពិត ដែលជំពាក់ប្រាក់សរុបចំនួន ៥៧២,០០០ដុល្លារអាមេរិក ។
នៅក្នុងការផ្សាយផ្ទាល់នេះដែរ អ្នកនាង ខ្ញុង បានបង្ហាញពីទឹកប្រាក់ដែលប្រជាពលរដ្ឋខ្មែរ បានជួយដល់រូបនាង មានចំនួន $៥៦,៥៣៣.៣៧ (ប្រាំម៉ឺនប្រាំមួយពាន់ប្រាំរយសាមសិបបីដុល្លារអាមេរិក និងសាមសិបប្រាំពីរសេន) ដែលចំនួននេះ ត្រឹមតែរយៈពេលជិត ២ថ្ងៃប៉ុណ្ណោះ ក្រោយពីតារាកំប្លែងស្រី ខ្ញុង បានចូលទៅតុលាការប្តឹងខ្លួនឯង(ថាក្ស័យធន) ហើយបង្ហោះលើហ្វេសប៊ុក អំពាវនាវ លើកដៃសុំ មេត្តាសន្តោសប្រណីពីមហាជនម្នាក់១ដុល្លារៗ ដើម្បីចិញ្ចឹមកូនៗ ក្នុងពេលរូបនាងត្រូវប្រឈមមុខច្បាប់ ។
សូមរម្លឹកដែរថា អ្នកនាង ស្រេង សុកាន់ដា បានបង្ហោះសារតាមគណនីហ្វេសប៊ុក កាលពីម៉ោង១១និង៣៣នាទីព្រឹកថ្ងៃទី១៨ តុលា ២០២១នេះថា នាងខ្ញុំពិតជាបានខ្ចីបំណុល ម្ចាស់បំណុលជាច្រើន ទាំងមានសែក គ្មានសែក នាងខ្ញុំ ពិតជាអស់លទ្ធិភាព ក្នុងការរកប្រាក់មកសងបំណុល តទៅទៀតហើយ ។ នាងខ្ញុំ មានតែត្រូវជាប់ពន្ធនាគារ មូលហេតុមិនមានប្រាក់សងម្ចាស់បំណុលតទៅទៀតទេ ។
នាងបញ្ជាក់ថា ដោយសារនាងខ្ញុំ អាណិតកូនប្រុសទាំងពីរនាក់ ដែលមានម្ដាយនឹងត្រូវជាប់ពន្ធនាគារ ដូចនេះហើយ ដើម្បីឲ្យកូនខ្ញុំបានបន្តរៀនសូត្រ និងបានបាយហូប សូមបងប្អូន ដែលធ្លាប់គាំទ្រនាងខ្ញុំ ជួយអនុគ្រោះផ្តល់ជូនខ្ញុំ 1ដុល្លារផងចុះ នាងខ្ញុំពិតជាអរគុណបងប្អូនទាំងអស់គ្នា ទុកជាមុន និងជូនពរបងប្អូនទាំងអស់គ្នា ជួបតែសំណាងល្អ សូមកុំជួបរឿងដូចខ្ញុំអី ។ រួមនិងដាក់លេខគណនីធនាគារ ABA ផងដែរ ៕
ចែករំលែកព័តមាននេះ