ខេត្តបន្ទាយមានជ័យ ៖ ចំនួនពលករខ្មែរជាង១០០នាក់ ត្រូវបានសមត្ថកិច្ចចម្រុះថៃស្ទាក់ចាប់ខ្លួនក្នុងចម្ការប្រេងខ្យល់មួយកន្លែងក្នុងឃុំនិងស្រុកតាប្រាយ៉ា ខេត្តស្រះកែវ ក្រោយលួចឆ្លងដែនដើម្បីទៅរកការងារធ្វើលើទឹកដីថៃ ។ នេះបើយោងតាមកាចុះផ្សាយលើគេហទំព័រ និងកាសែតថៃមួយ កាលពីថ្ងៃទី១៨ តុលា ២០២១។
ពលករទាំងនេះ ពុំត្រូវបានគេស្គាល់អត្តសញ្ញាណនោះទេ មានប្រុស៦៣នាក់ស្រី៤១នាក់ ។ ក្រោយឃាត់ខ្លួនពលករទាំងនេះ ត្រូវកម្លាំងចម្រុះថៃ យកទៅពិនិត្យសុខភាពតាមវិធានការរបស់ក្រសួងសុខាភិបាលរបស់គេនៅបន្ទាយតម្រួតជាយដែនកងរយទី៣ក្នុងស្រុកកើតហេតុ។
យោងការសាកសួរពលករទាំងនេះ ប្រាប់សមត្ថកិច្ចថៃថា ពួកគេដើរឆ្លងព្រំដែនពីកម្ពុជាតាមច្រករបៀងគ្រោងទៅចាំរថយន្តថៃ ដើម្បីបន្តដំណើរទៅរកការងារធ្វើដូចជា,ការងារសំណង់និងការងារផ្សេងៗទៀតនៅក្រុងបាងកក,ខេត្តឈុនបុរី,ខេត្តសាមុទ្រប្រាកាន,ខេត្តប្រាក់ណាក់ខនស៊ីអាយុធ្យា,ខេត្តឆាក់ឆឺនសៅ,ខេត្តរ៉ាក់យ៉ងនិងខេត្តប្រាជីនបូរី។
ពលករទាំងនេះបន្តថា អ្នកខ្លះចំណាយប្រាក់ម្នាក់៥០០០បាតខ្លះថាអស់៧០០០បាត និងមួយចំនួនទៀតថាអស់៩០០០បាត។ពលករទាំងអស់ត្រូវបានសមត្ថកិច្ចចម្រុះប្រគល់ឲ្យជំនាញស្រុកតាប្រាយ៉ាចាត់ការបន្តនិងបញ្ជូនត្រឡប់មកកម្ពុជាវិញតាមច្រកអនុលោមគឺច្រករបៀងអូរបីជាន់ក្នុងស្រុកអូរជ្រៅ។
តើពលករទាំងនេះឆ្លងព្រំដែនពីកម្ពុជាទៅថៃដោយរបៀបណា? បើសម័យកូវីដតាមបន្ទាត់ព្រំដែនគេឃើញមានកងកម្លាំងចម្រុះបានដាក់ព្រោងព្រាតនេះ ?
ចែករំលែកព័តមាននេះ