រាជធានីភ្នំពេញ ៖ សិស្សវិទ្យាល័យថ្នាក់ទី ១២ មួយក្រុមមានគ្នា ៩ នាក់ ដោយក្នុងនោះមានទាំងសិស្សជនជាតិខ្មែរ និងអន្តរជាតិ បានបង្កើតកម្មវិធីតាំងពិព័រណ៍សិល្បៈពិសេសរបស់ពួកគេនៅឯអាគារ…
រាជធានីភ្នំពេញ ៖ សិស្សវិទ្យាល័យថ្នាក់ទី ១២ មួយក្រុមមានគ្នា ៩ នាក់ ដោយក្នុងនោះមានទាំងសិស្សជនជាតិខ្មែរ និងអន្តរជាតិ បានបង្កើតកម្មវិធីតាំងពិព័រណ៍សិល្បៈពិសេសរបស់ពួកគេនៅឯអាគារ The Commune ក្នុងខណ្ឌទួលគោក ក្រោមប្រធានបទ «វប្បធម៌ និងបរិស្ថានកម្ពុជា» ដែលមានរយៈពេលជាងមួយសប្តាហ៍ គឺចាប់ពីថ្ងៃទី ១៦ ដល់ទី ២៤ ខែតុលា ឆ្នាំ ២០២១ ។
ក្នុងកិច្ចសំភាសន៍ជាសារព័ត៌មានកោះសន្តិភាព នៅថ្ងៃទី ១៨ ខែតុលា ឆ្នាំ ២០២១ យុវជន Nathan Ra តំណាងឱ្យក្រុមបានប្រាប់ថា ៖ «ការតាំងពិព័រណ៍នេះគឺបង្ហាញថា ផែនដីដែលយើងរស់នៅបច្ចុប្បន្នមិនត្រឹមតែសម្រាប់យើង ប៉ុណ្ណោះទេ ប៉ុន្តែជាកន្លែងសម្រាប់មនុស្សជំនាន់ក្រោយរស់នៅផងដែរ ។ ដូច្នេះវាជាតួនាទី និងកាតព្វកិច្ចរបស់យើង ក្នុងការអភិរក្សវប្បធម៌ និងបរិស្ថាន នៃប្រពៃណីរបស់ប្រទេសកម្ពុជា ដ៏ស្រស់ស្អាតមួយនេះ ដូចអ្វីដែលមនុស្សជំនាន់មុនបានធ្វើនិងបន្សល់ទុក សម្រាប់យើងផងដែរ» ។
យុវជន Nathan ជាជនជាតិកូរ៉េ វ័យ ១៧ ឆ្នាំរូបនេះ បានបន្តថា ៖ «ខ្ញុំចង់លើកស្ទួយវប្បធម៌ដ៏ស្រស់ស្អាត នៃព្រះរាជាណាចក្រកម្ពុជា តាមរយៈស្នាដៃសិល្បៈនៃមជ្ឈដ្ឋានផ្សេងៗ ដើម្បីឱ្យគ្រប់គ្នាយល់ពីសារៈសំខាន់ នៃការអភិរក្សបរិស្ថាន និងភពផែនដី ដែលយើងកំពុងរស់នៅ» ។
Nathan បន្ថែមថា មិនត្រឹមតែមានស្នាដៃថតរូបប៉ុណ្ណោះទេ ថែមទាំងមានរូបគំនូរ និងបំណែកច្នៃប្រឌិត ដែលផលិតដោយប្រើឥដ្ឋអេកូ-ដបប្លាស្ទិក បំពេញទៅដោយប្លាស្ទិកនៅក្នុងដបដើម្បីកែច្នៃឡើងវិញ ដែលជាលើកទីមួយនៅក្នុងប្រទេសយើង ។
ជាមួយគ្នានេះផងដែរ នៅក្នុងកម្មវិធីពិព័រណ៍របស់ក្រុមយុវជន យុវនារី ជាតិ និងអន្តរជាតិ ពួកគេបានចង្អុលបង្ហាញ អំពីអត្ថន័យផ្សេងៗគ្នានៃរូបគំនូរ និងរូថត ដែលពួកគេបានធ្វើការងារនេះរួមគ្នាដូចនេះថា វាបានបង្ហាញអំពីវប្បធម៌និងតម្រូវការ ការពារបរិស្ថាន និងកិច្ចសហការពីប្រជាពលរដ្ឋម្នាក់ៗ ។
Douk Tiffany គឺជាយុវនារីម្នាក់ទៀត ដែលជាអ្នកធ្វើកិច្ចការក្នុងក្រុមនេះផងដែរ បានប្រាប់កោះសន្តិភាព ថា ៖ «ការតាំងពិព័រណ៍សិល្បៈនេះ គឺដើម្បីលើកកម្ពស់ប្រពៃណីខ្មែរ បង្កើននូវតម្លៃនៃវប្បធម៌ខ្មែរ ជាពិសេសក្នុងនាមយើងជាយុវជនខ្មែរ យើងចង់ជម្រុញក៏ដូចជាលើកទឹកចិត្តដល់យុវជនខ្មែរដទៃទៀត ឱ្យស្រឡាញ់វិស័យគំនូរនិងសិល្បៈខ្មែរផងដែរ» ។
យុវនារី Tiffany បានបន្តថា ៖ «ប្រាក់ចំណេញដែលទទួលបានពីការតាំងពិព័រណ៍នេះ នឹងឆ្ពោះទៅរកការទិញ និងដំឡើងបន្ទះសូឡា ដើម្បីជួយដល់សិស្សសាលា នៅក្នុងភូមិជនបទដាច់ស្រយាល ដែលគ្មានអគ្គិសនីប្រើប្រាស់ ដែលនេះជាជម្រើសប្រកបដោយនិរន្តរភាព សម្រាប់ពួកគេផងដែរ» ។
សូមជម្រាប់ជូនផងដែរថា សមាជិកដែលចូលរួមបង្កើតស្នាដៃនេះឡើង ជាសិស្សរៀនថ្នាក់ទី ១២ នៃសាលាអន្តរជាតិភ្នំពេញ ISPP មានឈ្មោះថា Nathan Ra, Lim Tymean, Douk Tiffany, Heng Siyanit, Taing Dararith, Tang Bunsan, Lim Kimvibol, Meng Mayor, និង Am Phat ហើយពួកគាត់ទាំងអស់សុទ្ធសឹងតែមានអាយុត្រឹមតែ ១៧ ឆ្នាំប៉ុណ្ណោះ ។ ចំណែកឯការដាក់តាំងលក់រូបគំនូរ និងរូបថត មានតម្លៃចាប់ពី ៥០ ដុល្លារអាមេរិក រហូតដល់ ២៤០ ដុល្លារតែប៉ុណ្ណោះ ៕
ចែករំលែកព័តមាននេះ