ឃាត់ខ្លួនបុរសជាគណនេយ្យក្រុមហ៊ុនមួយ ក្រោយលេងល្បិចវេរប្រាក់ជាង១លានបាត
- បន្ទាយមានជ័យ
ជនជាតិឥណ្ឌូនេស៊ីម្នាក់ដែលមានតួនាទីជាគណនេយ្យក្រុមហ៊ុនមួយ ត្រូវបានឃាត់ខ្លួន ដោយសារពាក់ព័ន្ធនឹងករណីលួចប្រាក់ជាង១លានបាត ហើយត្រូវបាន
ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា ជនជាតិឥណ្ឌូនេស៊ីម្នាក់ដែលមានតួនាទីជាគណនេយ្យក្រុមហ៊ុនមួយ ត្រូវបានឃាត់ខ្លួន ដោយសារពាក់ព័ន្ធនឹងករណីលួចប្រាក់ជាង១លានបាត ហើយត្រូវបានបញ្ជូនទៅសាលាដំបូងខេត្តបន្ទាយមានជ័យ នៅថ្ងៃទី១៨ ខែតុលា ឆ្នាំ២០២១នេះ។
បើតាមលោកវរសេនីយ៍ត្រី នួន នីណារ៉ូ មេបញ្ជាការកងរាជអាវុធហត្ថក្រុងប៉ោយប៉ែតបានប្រាប់ថា ជនសង្ស័យដែលត្រូវឃាត់ខ្លួនមានឈ្មោះ ចាន់ ដ្រា (CHAN TRRA) ភេទប្រុស អាយុ២២ឆ្នាំ ជាជនជាតិឥណ្ឌូនេស៊ី មានតួនាទីជាគណនេយ្យក្រុមហ៊ុន RUPIAHTOTO (វេរលុយ) ស្នាក់នៅបុរីដួងច័ន្ទ ស្ថិតក្នុងភូមិសាមគ្គីមានជ័យ សង្កាត់-ក្រុងប៉ោយប៉ែត។
លោកបានបញ្ជាក់ថា នៅពេលឃាត់ខ្លួនជនសង្ស័យ កម្លាំងជំនាញបានទទួលពាក្យបណ្តឹងពីឈ្មោះ ហ្វាញឌីចាយ៉ា គូនីយ៉ាវ៉ាន់ (FINDJAYA KURNIAWAN) ភេទប្រុស អាយុ២៨ឆ្នាំ (ជាជនជាតិឥណ្ឌូនេស៊ី) ដែលស្នាក់នៅភូមិជាមួយគ្នា បានដាក់ពាក្យបណ្តឹងឈ្មោះ ចាន់ ដ្រា (CHAN TRRA) ដែលបានមកធ្វើការងារជាគណនេយ្យនៅក្រុមហ៊ុន RUPIAHTOTO (វេរលុយ) រយៈពេល៤ខែមកហើយ។ ទើបនៅថ្ងៃទី១៦ ខែតុលា ឆ្នាំ២០២១កន្លងទៅមកនេះ បានត្រួតពិនិត្យមើលគណនេយ្យក្រុមហ៊ុនក៏បានរកឃើញថា ឈ្មោះ ចាន់ ដ្រា បានវេរលុយចេញ-ចូលជាបន្តបន្ទាប់ក្នុងគណនេយ្យផ្ទាល់ខ្លួនរបស់ឈ្មោះ ចាន់ ដ្រា ដោយបានបាត់បង់ទឹកប្រាក់ចំនួន៥៦៩.០០០.០០០រូពី (ប្រាំរយហុកសិបប្រាំបួនលានរូពី) ប្រាក់ឥណ្ឌូនេស៊ី ស្មើនឹងប្រាក់ថៃជាង១លានបាត។
លោកវរសេនីយ៍ត្រី នួន នីណារ៉ូ បានបញ្ជាក់ថា ក្រោយមកកម្លាំងកងរាជអាវុធហត្ថក្រុងប៉ោយប៉ែត បានធ្វើការស្រាវជ្រាវរហូតឃាត់ខ្លួនឈ្មោះ ចាន់ ដ្រា ដែលជាគណនេយ្យក្រុមហ៊ុនបាននៅថ្ងៃទី១៧ ខែតុលា ឆ្នាំ២០២១ នៅចំណុចបុរីដួងច័ន្ទ ស្ថិតក្នុងភូមិសាមគ្គីមានជ័យ សង្កាត់-ក្រុងប៉ោយប៉ែត។
ក្រោយពេលឃាត់ខ្លួន ជនសង្ស័យត្រូវបាននាំយកសាកសួរ ហើយបើតាមចម្លើយសារភាពថា ខ្លួនពិតជាបានប្រើប្រាស់លុយក្នុងគណនេយ្យក្រុមហ៊ុនដែលវេរចូលគណនេយ្យរបស់ខ្លួនចំនួន៥លើកមែន ចាប់ពីថ្ងៃទី១១ រហូតដល់ថ្ងៃទី១៦ ខែតុលា ឆ្នាំ២០២១ ដែលមានទឹកប្រាក់ចំនួន៥៦៩.០០០.០០០រូពីប្រាក់ឥណ្ឌូនេស៊ី ស្មើនឹងប្រាក់ថៃជាង១លានបាត ហើយក៏បានដកប្រាក់នោះប្រើប្រាស់ និងបានវេរឱ្យម្តាយនៅប្រទេសឥណ្ឌូនេស៊ី។ ក្រោយពេលសាកសួររួចហើយ ក៏បានកសាងសំណុំរឿង រួចបញ្ជូនទៅសាលាដំបូងខេត្ត ដើម្បីចាត់ការតាមច្បាប់៕
ចែករំលែកព័តមាននេះ