- ភ្នំពេញ
ភ្នំពេញ៖ ក្នុងរយៈពេលប៉ុន្មានថ្ងៃនេះ ស្ថានភាពជំនន់ទឹកភ្លៀង បានកើតឡើង ក្នុងបណ្តាខេត្តមួយចំនួន ដូចជា នៅបាត់ដំបង មណ្ឌលគិរី រតនគិរី ឧត្តរមានជ័យ…
ភ្នំពេញ៖ ក្នុងរយៈពេលប៉ុន្មានថ្ងៃនេះ ស្ថានភាពជំនន់ទឹកភ្លៀង បានកើតឡើង ក្នុងបណ្តាខេត្តមួយចំនួន ដូចជា នៅបាត់ដំបង មណ្ឌលគិរី រតនគិរី ឧត្តរមានជ័យ និងនៅខេត្តបន្ទាយមានជ័យ ជាដើម។ គ្រោះទឹកជំនន់ បង្កដោយទឹកភ្លៀង ដែលទឹកឡើងលឿន ហើយស្រកក៏លឿននេះ ទាមទារឲ្យប្រជាពលរដ្ឋនៅតំបន់ជន់លិច ត្រូវបង្កើនកិច្ចការពារ និងការប្រុងប្រយ័ត្ន ពិសេសលើគ្រោះថ្នាក់ដល់អាយុជីវិតមនុស្ស សត្វពាហនៈ និងជំងឺដង្កាច់ផ្សេងៗ។
រហូតដល់ថ្ងៃចន្ទ ទី១៨ ខែតុលា ជំនន់ទឹកភ្លៀង ដែលធ្វើឱ្យទឹកស្ទឹងសង្កែ ឡើងខ្ពស់ រហូតលិចលង់តំបន់មួយចំនួន ក្នុងក្រុងបាត់ដំបង បានថមថយឥទ្ធិពលទៅវិញបន្តិច។ យ៉ាងណាក៏ដោយ នៅក្រុងបាត់ដំបង បើទោះបីជាទឹកស្ទឹងសង្កែ បានស្រកចុះក៏ពិតមែន ប៉ុន្តែទឹកដែលឡើងជន់លិចតំបន់មួយចំនួន នាប៉ុន្មានថ្ងៃមកនោះ មានសភាពស្រកចុះយឺតជាងទឹកស្ទឹង ដោយសារតែប្រព័ន្ធលូរំដោះទឹក តូច និងលាយឡំដោយដី និងសំរាម។
ចំណែកនៅខេត្តរតនគិរី រហូតដល់ថ្ងៃចន្ទ ទី១៨ ខែតុលា ទឹកទន្លេស្រែពក ដែលបានហក់ឡើង នាប៉ុន្មានថ្ងៃមកហើយនោះ បានជន់លើសកម្រិតប្រកាសអាសន្នហើយ។ ជំនន់នេះ លើសកម្រិតប្រកាសអាសន្ន រួមទាំងទន្លេសេសាន្តផងដែរ ហើយទឹកបានជន់លិចតំបន់មួយចំនួន តាមដងទន្លេក្នុងភូមិសាស្ត្រស្រុកកូនមុំ ស្រុកលំផាត់ ស្រុកតាវែង ស្រុកវ៉ើនសៃ និងស្រុកអណ្ដូងមាស។
ជាទូទៅ ជំនន់ទឹកភ្លៀង ឆាប់ឡើង ហើយក៏ឆាប់ស្រកទៅវិញដែរ។ ប៉ុន្តែបើជន់លិចលើស ១សប្ដាហ៍ នោះប្រាកដជាខូចដំណាំកសិករ មិនខានឡើយ ជាពិសេសដំណាំស្រូវ។
អាជ្ញាធរខេត្ត រួមទាំងកងកម្លាំងប្រដាប់ងអាវុធ បានពិនិត្យដល់ទីតាំង ដែលរងការជន់លិច ដោយបានផ្ដល់ជំនួយសង្រោះបន្ទាន់ ដល់ពលរដ្ឋ និងដឹកនាំអាជ្ញាធរ ត្រៀមជួយសង្គ្រោះ ព្រមទាំងជម្លៀសប្រជាពលរដ្ឋរងគ្រោះ ទៅកាន់ទីទួលសុវត្ថិភាព ឱ្យបានទាន់ពេលវេលា។ ការជួយដោះស្រាយបញ្ហាពលរដ្ឋរងគ្រោះដោយទឹកជំនន់ ក្នុងខេត្តមួយចំនួន ដូចជា ខេត្តរតនគិរី និងខេត្តបាត់ដំបង ជាដើមនេះ គឺជាវិញ្ញាសាដំបូង សម្រាប់អភិបាលខេត្តទាំងពីរ ដែលទើបឡើងកាន់តំណែងថ្មី។
ក្នុងរយៈពេលប៉ុន្មានឆ្នាំចុងក្រោយនេះ ជំនន់ទឹកភ្លៀងបានកើតមានតាមបណ្តាខេត្តជាច្រើន ក្នុងនោះ មានទាំងនៅរាជធានីភ្នំពេញផង ជាពិសេសខេត្តជាប់ព្រំដែនកម្ពុជា-ថៃ ដែលមានសភាពធ្ងន់ធ្ងរ កាលពីឆ្នាំ២០២០ កន្លងទៅ។
មិនថា ជំនន់ទឹកភ្លៀង ឬជំនន់ទឹកភ្លៀងមេគង្គទេ តែងតែបង្កការលំបាកជាច្រើនដល់ប្រជាពលរដ្ឋរស់នៅតំបន់ ដែលត្រូវទឹកជន់លិច។ បញ្ហាចម្បង គឺការបាត់បង់អាយុជីវិត ដោយលង់ ពិសេសក្មេងៗ និងមនុស្សចាស់ជរា។ ទឹកជំនន់ ក៏បង្កការបំផ្លិចបំផ្លាញផ្ទះសម្បែង ផ្លូវស្ពាន ស្រែចំការ ផលដំណាំ រួមទាំងបង្កជាជំងឺផ្សេងៗ ដោយសារតែការបរិភោគទឹកមិនស្អាត ជាដើម។
ដូច្នេះបងប្អូនប្រជាពលរដ្ឋ នៅតំបន់រងគ្រោះ ត្រូវតែបង្កើនការប្រុងប្រយ័ត្នខ្ពស់ ចំពោះគ្រោះមហន្តរាយ បង្កឡើងដោយទឹកជំនន់។ ប្រជាពលរដ្ឋ ត្រូវរៀបចំ និងជម្លៀសទៅកាន់ទីទួលសុវត្ថិភាព ដែលនៅជិតបំផុត ហើយទាក់ទងជាមួយអាជ្ញាធរមូលដ្ឋានជាប់ជានិច្ច។ រក្សាទឹកស្អាតទុក និងស្បៀងអាហារ នៅកន្លែង ដែលមានសុវត្ថិភាព។ ការពារក្រុមគ្រួសារ និងសត្វចិញ្ចឹម។ ហាមក្មេងៗ កុំឲ្យលេងក្បែរទឹក។ ក្នុងនោះ វត្ថុមានតម្លៃ និងឯកសារនានា ក៏ត្រូវតែដឹកជញ្ជូន យកទៅកាន់ទីទួលសុវត្ថិភាព។
ក្នុងពេលកើតមានគ្រោះទឹកជំនន់ មិនថា ជំនន់ទឹកភ្លៀង ឬទឹកទន្លេទេ រាជរដ្ឋាភិបាល និងអាជ្ញាធរសមត្ថកិច្ចគ្រប់លំដាប់ថ្នាក់ កងកម្លាំងប្រដាប់អាវុធ ពិសេសកាកបាទក្រហមកម្ពុជា រួមទាំងអង្គការសង្គមស៊ីវិលជាតិ-អន្តរជាតិនានា តែងតែយកចិត្តទុកដាក់ អន្តរាគមន៍ និងជួយជម្លៀសប្រជាពលរដ្ឋរងគ្រោះ ទៅកាន់ទីទួលសុវត្ថិភាព ក៏ដូចជាផ្តល់ជំនួយសង្គ្រោះបន្ទាន់ ជាដើម។
ប៉ុន្តែមុននឹងជំនួយ និងអន្តរាគមន៍របស់រាជរដ្ឋាភិបាល ក៏ដូចជា អាជ្ញាធរសមត្ថកិច្ច កាកបាទក្រហម ទៅដល់ ក៏ទាមទារឲ្យប្រជាពលរដ្ឋរងគ្រោះ ត្រូវជួយខ្លួនឯងសិន។ បញ្ហាសុវត្ថិភាព ជាចម្បង គឺត្រូវជម្លៀសចេញពីផ្ទះលិចទឹក ហើយទៅកាន់ទីទួលសុវត្ថិភាព រួមទាំងការប្រុងប្រយ័ត្ននឹងសត្វពិសខាំ តិច ឬចឹក។ ចូរកុំភ្លេចថា នៅពេលគ្រោះទឹកជំនន់កើតឡើងរៀងរាល់ឆ្នាំ ក៏តែងតែមានរបាយការណ៍ពីចំនួនអ្នកបាត់បង់ជីវិត ក្នុងនោះ ច្រើនជាងគេ គឺកូនក្មេង និងមនុស្សចាស់។ ដូច្នេះនៅពេលនេះ ពលរដ្ឋរងគ្រោះ ត្រូវតែបង្កើនការប្រុងប្រយ័ត្ន កុំឲ្យសោកនាដកម្មដដែលៗ ហើយដែលអាចការពារបាននេះ កើតឡើងតទៅទៀត៕
ចែករំលែកព័តមាននេះ