វិវាទដី៥៨ហិកតាមិនទាន់ចប់ផង ឧកញ៉ា២រូប បូមដីចាក់ពេញស្រេច
- ភ្នំពេញ
រាជធានីភ្នំពេញ ៖ រឿងវិវាទដីធ្លីរវាងប្រជាពលរដ្ឋចំនួន២៤១គ្រួសារ នៅភូមិចំពុះក្អែក១ សង្កាត់ព្រែកថ្មី ខណ្ឌច្បារអំពៅ ជាមួយ
រាជធានីភ្នំពេញ ៖ រឿងវិវាទដីធ្លីរវាងប្រជាពលរដ្ឋចំនួន២៤១គ្រួសារ នៅភូមិចំពុះក្អែក១ សង្កាត់ព្រែកថ្មី ខណ្ឌច្បារអំពៅ ជាមួយ
រាជធានីភ្នំពេញ ៖ រឿងវិវាទដីធ្លីរវាងប្រជាពលរដ្ឋចំនួន២៤១គ្រួសារ នៅភូមិចំពុះក្អែក១ សង្កាត់ព្រែកថ្មី ខណ្ឌច្បារអំពៅ ជាមួយឧកញ៉ាពីររូប ឧកញ៉ា ថៃ ជាហួត និងឧកញ៉ា ហៀង ប៊ុនប៉េង លើទំហំដី៥៨ហិកតា ត្រូវបានជំនាញរបស់ក្រសួងបន្តសម្របសម្រួលដោះស្រាយលើរឿងនេះរាប់ឆ្នាំមកហើយពុំទាន់បញ្ចប់ឡើយ ក្រោយពេលកាត់ដីតំបន់នោះចូលមករាជធានីភ្នំពេញ ។
ការងារនេះកន្លងមកក្រុមអធិការកិច្ចក្រសួងដែនដី គឺជាអ្នកធ្វើជាមួយប្រជាជន២៤១គ្រួសារ ។
ក្រសួងបានធ្វើការស៊ើបអង្កេតសព្វយ៉ាងទាំងអស់ ហើយដីនេះពីមុននៅក្នុងភូមិសាស្ត្រខេត្តកណ្តាល ហើយបានកាត់ពីខេត្តកណ្តាលចូលមកភ្នំពេញ ពេលដែលនៅក្នុងភូមិសាស្ត្រខេត្តកណ្តាល គឺគេមានប័ណ្ណកម្មសិទ្ធិនៅខេត្តកណ្តាលរួចទៅហើយ ។ អ៊ីចឹងនៅពេលកាត់ពីខេត្តកណ្តាលចូលមករាជធានីភ្នំពេញ ខ្ញុំគ្រាន់តែប្តូរសំបកប័ណ្ណទេគឺធ្វើតាមជំនាញដោយត្រឹមត្រូវអត់មានអីខុសទេ ។
អ្នកស្រុកម្ចាស់ដីបានប្រាប់កោះសន្តិភាពថា ការបង្ហាញភស្តុតាង គឺក្រសួងបានជ្រាប រួចទៅហើយ ប្រជាពលរដ្ឋរកឃើញថា លោក ស្រី ស៊ុយ សុផាន កាលពីនៅរស់គ្មានដីនៅទីតាំងទំនាស់ទេ គាត់បានយកប័ណ្ណកម្មសិទ្ធិនៅទីតាំងកន្លែង ផ្សេងមករំលោភដីប្រជាពលរដ្ឋ រហូតប្រជាពលរដ្ឋស្នើសុំឲ្យក្រសួងចុះវាស់វែង រកចំណុចទីតាំងដីរបស់លោកស្រី ស៊ុយ សុផាន និងបក្ខពួក ប៉ុន្តែលោក ស្រី ស៊ុយ សុផាន មិនព្រមឲ្យចុះវាស់វែងទេ គាត់ប្រឆាំងមិនឱ្យវាស់ ។
លិខិតរបស់ក្រសួងរៀបចំដែនដី នគរូបនីយកម្ម និងសំណង់ ចុះថ្ងៃទី១៧ ខែមករា ឆ្នាំ២០២០ ដែលប្រជាពលរដ្ឋបង្ហាញកោះសន្តិភាពបានជម្រាបទៅលោកស្រី ស៊ុយ សុផាន អំពីករណីសំណើសុំពិនិត្យ និងដោះស្រាយបណ្តឹង របស់ប្រជាពលរដ្ឋ ២៤១គ្រួសារ ស្ថិតនៅភូមិចំពុះក្អែក សង្កាត់ព្រែករថ្មី ខណ្ឌច្បារអំពៅថា កន្លងមក ក្រុមការងាររបស់ក្រសួងបានអញ្ជើញគូភាគី មកសម្របសម្រួលដោះស្រាយជាច្រើនលើកប៉ុន្តែពុំមានការព្រមព្រៀងគ្នា និងទុកករណីនេះជូនភាគីធ្វើការដោះស្រាយដោយផ្ទាល់ ឬតាមផ្លូវច្បាប់ ។
យោងតាមលិខិតរបស់ក្រសួងរៀបចំដែនដី នគរូបនីយកម្ម និងសំណង់ ចុះថ្ងៃទី២៥ ខែវិច្ឆិកា ឆ្នាំ២០១៩ បានជម្រាបទៅតំណាងប្រជាពលរដ្ឋ ២៤១គ្រួសារ និងលោកស្រី ស៊ុយ សុផាន អំពីករណីសំណើសុំដោះស្រាយវិវាទដីធ្លី រវាងប្រជាពលរដ្ឋ ២៤១គ្រូសារ ជាមួយឈ្មោះ ស៊ុយ សុផាន ស្ថិតនៅភូមិចំពុះក្អែក សង្កាត់ ព្រែកថ្មី ខណ្ឌច្បារអំពៅថា បន្ទាប់ពីទទួលសំណើរបស់លោក លោកស្រីរួចមក ក្រសួងរៀបចំដែនដី នគរូបនីយកម្ម និងសំណង់ បាន ចាត់ក្រុមការងារចុះពិនិត្យដោះស្រាយ និងបាន អញ្ជើញគូភាគីវិវាទមក ធ្វើការសម្របសម្រួលជាច្រើនលើក ប៉ុន្តែពុំមានការព្រមព្រៀងបញ្ចប់វិវាទទេ ។ ដូចនេះក្រសួងសូមបញ្ចប់ការដោះ ស្រាយករណីនេះ ដោយទុកជូនគូភាគូធ្វើការដោះស្រាយដោយផ្ទាល់ខ្លួន ឬតាមផ្លូវច្បាប់ ។
យោងតាមកំណត់ហេតុរបស់ក្រសួងរៀបចំដែនដី នគរូបនីយកម្ម និងសំណង់ ចុះថ្ងៃទី១១ ខែកក្កដា ឆ្នាំ២០១៩ បានបង្ហាញឲ្យដឹងថា…ភាគីតំណាងប្រជាពលរដ្ឋ ២៤១គ្រួសារ ប្រកាន់ជំហរឲ្យមានការចុះវាស់វែងរកចំណុចវិវាទ ដើម្បីមានមូលដ្ឋានដោះស្រាយ ដោយផ្អែកលើឯកសារលិខិតទិញលក់ រវាងអ្នកទិញនឹងអ្នកលក់ និងការកាន់កាប់ រស់នៅជាក់ស្តែងរបស់ប្រជាពលរដ្ឋកន្លងមក ហើយម្យ៉ាងទៀតប័ណ្ណដែលចេញឲ្យលោកស្រី ស៊ុយ សុផាន កន្លងមក នេះមានភាពមិនប្រក្រតី ហើយដីនេះស្ថិតនៅទីតាំងផ្សេងបែរជាក្រុមហ៊ុនស៊ុយ សុផាន មកឈូសឆាយចូលកាន់កាប់យកដីប្រជាពល រដ្ឋទាំងដុលតែម្តង ។
ចំណែកភាគីលោកស្រី ស៊ុយ សុផាន ប្រកាន់ជំហរ មិនអនុញ្ញាតឲ្យចុះវាស់វែង ព្រោះទីតាំងដីរបស់គាត់ ជាដីមានប័ណ្ណកម្មសិទ្ធិរួចហើយ ដោយឡែកឯកសារទិញលក់របស់ប្រជាពលរដ្ឋពុំមានអាជ្ញាធរទទួលស្គាល់ទេ បន្លំយកទាំងភ្នែកស្រស់ ។
យោងតាមរបាយការណ៍របស់អគ្គាធិការដ្ឋានក្រសួងរៀបចំដែនដី នគរូបនីយកម្ម និងសំណង់ ចុះថ្ងៃទី១១ ខែកញ្ញា ឆ្នាំ២០២០ ដាក់ជូនឯកឧត្តមឧបនាយករដ្ឋមន្ត្រី ជា សុផារ៉ា គឺបានបញ្ជាក់ថា ករណីនេះក្រសួងបានចាត់ក្រុមការងារចុះពិនិត្យស្រាវជ្រាវ និងបានអញ្ជើញគូភាគីមក ធ្វើការសម្រុះសម្រួលជាច្រើនលើក ប៉ុន្តែពុំមានការព្រមព្រៀងបញ្ចប់វិវាទទេ ។ ដូចនេះ ក្រសួងបានបញ្ចប់ការដោះ ស្រាយករណីនេះ ដោយទុកជូនភាគីធ្វើការដោះស្រាយដោយផ្ទាល់ ឬតាមផ្លូវច្បាប់ ។
ប្រជាពលរដ្ឋម្ចាស់ដីប្រាប់កោះសន្តិភាពថា ទំនាស់ដីមិនទាន់បានបញ្ចប់ផង ស្រាប់តែនៅថ្ងៃទី៦ ខែកញ្ញា ឆ្នាំ២០២១ លោកថៃ ជាហួត និងលោក ហៀង ប៊ុនប៉េង បានធ្វើសកម្មភាពតទុយោបូមដីដាក់ចូលលើទីតាំងដីរបស់ប្រជាពលរដ្ឋដែលក្រសួងកំពុងតែដោះស្រាយជម្លោះនេះ ពេលប្រជាពលរដ្ឋចុះទៅឃាត់គេបានបង្ហាញវិញ្ញាបនបត្រសំគាល់ម្ចាស់អចលនវត្ថុចំនួន២សន្លឹក ហើយអះអាងថា បានទិញដីនេះពីខ្មោចលោកស្រី ស៊ុយ សុផាន ហើយ ។
នៅក្នុងពាក្យបណ្តឹងប្រជាពលរដ្ឋបានរំលឹកពីការប្តឹងតវ៉ាគ្នាជាមួយលោកស្រី ស៊ុយ សុផាន ខ្លះៗថា កាលលោកស្រី ស៊ុយ សុផាន កាលនៅរស់គាត់បានយកប័ណ្ណកម្មសិទ្ធិទីតាំងដីនៅកន្លែងផ្សេង ដែលធ្វើឡើងតាមរយៈឯកសារក្លែងបន្លំយកមកប្ដឹងចាញ់ប្រជាជនគ្រប់កន្លែង ។
ជាមួយគ្នានេះ ប្រជាពលរដ្ឋម្ចាស់ដីទាំង២៤១គ្រួសារ សំណូមពរសុំអន្តរាគមន៍ពីលោកឧបនាយករដ្ឋមន្ត្រី ជា សុផារ៉ា ធ្វើការឃាត់សកម្មភាពឈប់ឲ្យបូមដីដាក់លើដីរបស់ប្រជាពលរដ្ឋទាំងអស់គា្នជាបន្ទាន់ និងសុំមោឃៈភាពវិញ្ញាបនបត្រសម្គាល់ម្ចាស់អចលនវត្ថុលេខ 12100704 – 2154 ចុះថ្ងៃទី១១ ខែមីនា ឆ្នាំ២០២១ វិញ្ញាប័នបត្រសម្គាល់ម្ចាស់អចលនវត្ថុលេខ 12100704 – 2155 ចុះថ្ងៃទី១១ ខែមីនា ឆ្នាំ ២០២១ និងវិញ្ញាប័នបត្រសម្គាល់ម្ចាស់អចលនវត្ថុមួយចំនួនទៀតដែលបានធ្វើរំលោភលើដីទំនាស់សរុប ៥៨ហិកតា ។
ចំណែកឧកញ៉ា ថៃ ជាហួត និង ហៀង ប៊ុនប៉េង ម្សិលមិញមិនអាចសុំការអត្ថាធិប្បាយបានទេ ពាក់ព័ន្ធករណីខាងលើនេះ ។
ព័ត៌មានពិស្តារនឹងមានផ្សាយបន្តទៀតនៅលើកាសែតកោះសន្តិភាព ៕
ចែករំលែកព័តមាននេះ