ទឹកស្ទឹងពោធិ៍សាត់ចាប់ផ្ដើមជន់ហើយ ប៉ុន្តែមិនទាន់ដល់ចំណុចប្រកាសអាសន្នទេ
- ពោធិ៍សាត់
ទឹកស្ទឹងពោធិ៍សាត់បានចាប់ផ្តើមឡើងហើយ បន្ទាប់ពីមានភ្លៀងធ្លាក់រយៈពេល៤ទៅ៥ថ្ងៃជាប់ៗគ្នា នៅតំបន់ភ្នំស្រុកវាលវែង និងស្រុកភ្នំក្រវាញ
ខេត្តពោធិ៍សាត់ ៖ នៅព្រឹកព្រលឹមថ្ងៃទី១៧ ខែតុលា ឆ្នាំ២០២១នេះ ទឹកស្ទឹងពោធិ៍សាត់បានចាប់ផ្តើមឡើងហើយ បន្ទាប់ពីមានភ្លៀងធ្លាក់រយៈពេល៤ទៅ៥ថ្ងៃជាប់ៗគ្នា នៅតំបន់ភ្នំស្រុកវាលវែង និងស្រុកភ្នំក្រវាញ។
ប្រធានមន្ទីរធនធានទឹក និងឧតុនិយមខេត្តពោធិ៍សាត់ លោក កែវ វ័យ បានប្រាប់ឱ្យដឹងថា ស្ថានភាពទឹកស្ទឹងពោធិ៍សាត់នៅព្រឹកថ្ងៃទី១៧ ខែតុលានេះ មានកម្ពស់ ៤.៧២ម៉ែត្រ (កម្ពស់ប្រកាសអាសន្ន ៥ម៉ែត្រ), ស្ទឹងក្រវាញ មានកម្ពស់ ៣.១៦ (កម្ពស់ប្រកាសអាសន្ន ៦ម៉ែត្រ) និងស្ទឹងវាលវែង មានកម្ពស់ ២.១៥ម៉ែត្រ (កម្ពស់ប្រកាសអាសន្ន ៩ម៉ែត្រ)។
លោក កែវ វ័យ បានឲ្យដឹងទៀតថា គិតត្រឹមវេលាម៉ោង០៩ព្រឹកនេះ ស្ថានភាពទឹកតាមដងស្ទឹងពោធិ៍សាត់ នៅស្រុកភ្នំក្រវាញ ទឹកស្ទឹងចាប់ផ្តើមស្រកចុះ ០.២៦ម៉ែត្រ បើធៀបកាលពីពេលព្រឹកព្រលឹម។ ដោយឡែកនៅក្រុងពោធិ៍សាត់ ទឹកស្ទឹងបន្តឡើង ០.៣៤ម៉ែត្រ បើធៀបនឹងព្រឹកព្រលឹម។ ប្រសិនបើមិនមានភ្លៀងបន្ថែមទៀតទេនោះ នៅផ្នែកខាងលើ នៃស្រុកវាលវែង និងស្រុកភ្នំក្រវាញទេនោះ ទឹកស្ទឹងពោធិ៍សាត់នឹងស្រកវិញ ក្នុងកំឡុងពេល០៦ម៉ោងក្រោយ ដូចរាល់ឆ្នាំអញ្ចឹងដែរ។
លោក កែវ វ័យ បញ្ជាក់ថា បើសិនស្ថិតក្នុងស្ថានភាពណាមួយតម្រូវឱ្យមានការប្រកាសអាសន្ន ក្នុងនាមមន្ទីរជំនាញ លោកនឹងធ្វើសេចក្តីជូនដំណឹងដល់សាធារណជនឱ្យបានជ្រាបជាមុន ។
ជាមួយគ្នានោះ លោកប្រធានមន្ទីរធនធានទឹក និងឧតុនិយម បានអំពាវនាវដល់បងប្អូនប្រជាពលរដ្ឋដែលរស់នៅតាមបណ្ដោយមាត់ស្ទឹង ជាពិសេសក្នុងក្រុងពោធិ៍សាត់ និងស្រុកកណ្ដៀង សូមមានការប្រុងប្រយ័ត្នខ្ពស់ ទុកដាក់កូនចៅ សត្វពាហនៈឱ្យបានត្រឹមត្រូវ ជៀសវាងមានគ្រោះថ្នាក់ណាមួយកើតឡើងជាយថាហេតុ ដោយសារជំនន់ទឹកភ្លៀងនេះ ៕
ចែករំលែកព័តមាននេះ