ខេត្តតាកែវ ៖ មិនបានប៉ុន្មានថ្ងៃផង ក្រោយពីលោក អ៊ូច ភា អភិបាលខេត្តតាកែវ ប្រកាសនៅមុខក្រុមអាជីវករថា លោកពុំដែលបានអនុញ្ញាតឲ្យមានការសង់ផ្សារតាកែវឡើងវិញនោះទេ លោកថា បានដោះស្រាយចប់ហើយ គ្មានការរុះរើទេ ។ ស្រាប់តែបែកធ្លាយឯកសារជាច្រើនសន្លឹក ដែលបង្ហាញថា លោក អ៊ូច ភា បានបោះត្រាអនុញ្ញាតឲ្យឈ្មួញធ្វើការវិនិយោគសាងសង់ផ្សារតាកែវឡើងវិញ ខណៈពេលអាជីវករមួយភាគធំកំពុងខ្វល់រឿងអត់អង្ករច្រកឆ្នាំង ហើយឈ្មួញមកលក់តូបក្នុងតម្លៃរាប់ម៉ឺនដុល្លារឲ្យពួកគាត់ទៀតនោះ ពិតជាបែកកើតមានរឿងធំមិនខាន ។
ក្នុងលិខិត២ដាច់ដោយឡែកពីគ្នា ដោយមួយជាលិខិតក្រសួងសេដ្ឋកិច្ច និងហិរញ្ញវត្ថុ មួយទៀតជាលិខិតអនុញ្ញាតឲ្យមានការសាងសង់បោះត្រាយល់ព្រមដោយលោក អ៊ូច ភា អភិបាលខេត្តតាកែវ បានបង្ហាញថា ផ្សារតាកែវ ដែលមានទីតាំងស្ថិតនៅភូមិថ្នល់បែក សង្កាត់រការក្រៅ ក្រុងដូនកែវ ត្រូវបានស្នើ ធ្វើការវិនិយោគកាលពីចុងខែឧសភា ឆ្នាំ២០២១ ដោយមានឈ្មោះ ប្រាក់ ចាន់រដ្ឋា ជាម្ចាស់គម្រោង ហើយក៏ត្រូវបានអភិបាលខេត្តតាកែវ បោះត្រាយល់ព្រមឲ្យមានការសាងសង់ហើយដែរ។
ដោយសារតែមានការអនុញ្ញាតនេះហើយ ទើបក្រុមឈ្មួញចាប់ផ្តើមធ្វើការលក់តូបផ្សារ ដែលគេបានបង្កើតរាប់រយតូប ដោយតាមអាជីវករខ្លះថា តម្លៃតូបនោះក៏មានតម្លៃថ្លៃ ដោយ១តូបមានពី១ម៉ឺន៥ពាន់ដុល្លារ រហូតដល់ទៅ៣ម៉ឺនដុល្លារក៏មានទៅតាមទីតាំង។
ព្រោះតែអាជីវករពុំមានប្រាក់សម្រាប់ទិញតូបដែលមានតម្លៃថ្លៃ ខណៈពេលស្ថានភាពសេដ្ឋកិច្ចកំពុងតែដុនដាបនោះហើយ ទើបកាលពីចុងខែកញ្ញា ក្រុមអាជីវករផ្សារតាកែវរាប់រយនាក់បានលើកគ្នាមកតវ៉ាដល់ខាងមុខសាលាខេត្តតាកែវ ប៉ុន្តែត្រូវបានបំបែក ដោយសារអាជ្ញាធរក្រោមហេតុផលខុសវិធានសុខាភិបាលស្តីពីការទប់ស្ការជំងឺកូវីដ១៩។
យ៉ាងណាក៏ដោយ នៅថ្ងៃទី១៤ ខែតុលា កន្លងទៅថ្មីៗនេះ ក្រុមអាជីវករបានសម្រុកចូលមកដល់ខាងក្នុងសាលាខេត្ត ដើម្បីជួបលោកអភិបាលខេត្តតាកែវដោយផ្ទាល់ ហើយនៅចំពោះមុខក្រុមអាជីវករទាំងនោះ លោក អ៊ូច ភា បានអះអាងថា លោកមិនដែលបានចេញលិខិតអនុញ្ញាតឲ្យមានការសាងសង់វិនិយោគផ្សារតាកែវនោះទេ តែឥឡូវឯកសារបានបង្ហាញយ៉ាងច្បាស់ថា លោកអភិបាលខេត្តបានសម្រេចអនុញ្ញាតឲ្យមានការសាងសង់ផ្សារតាកែវតាំងតែពីកំឡុងខែឧសភា ឆ្នាំ២០២១មកម្ល៉េះ ដូច្នេះតើការថ្លែងរបស់លោកអភិបាលខេត្ត ចំពោះមុខប្រជាពលរដ្ឋដែលថា មិនបានអនុញ្ញាតឲ្យមានការសាងសង់នោះ ជាការនិយាយ ព្រោះតែភ្លេច ឬជាការបោកប្រជាពលរដ្ឋដោះទ័លមួយគ្រា?
ចំពោះករណីខាងលើនេះ យើងនៅមិនទាន់មានការបកស្រាយពីលោក អ៊ូច ភា អភិបាលខេត្តតាកែវ នៅឡើយទេនៅថ្ងៃនេះ។
គួរបញ្ជាក់ដែរថា ក្នុងមួយរយៈពេលចុងក្រោយនេះ ខេត្តតាកែវ បានកើតមានរឿងមិនប្រក្រតីជាច្រើន តួរយ៉ាងដូចជា ករណីចាក់ដីលុបបឹងតាកែវយកដីធ្វើកម្មសិទ្ធិ ការកាយរណ្តៅដីក្នុងបឹងតាកែវ រហូតដល់មានការចេញលិខិតពីអង្គភាពប្រឆាំងអំពើពុករលួយ ក៏ដូចជាការវិនិយោគផ្សារណាត់ ដែលតាមក្រុមប្រជាពលរដ្ឋខ្លះថា ជាវិនិយោគរបៀបធ្វើនំអត់ម្សៅជាដើម។
គួរបញ្ជាក់ថា ៖ អាជីវករផ្សារតាកែវលើកគ្នាតវ៉ា ក្រោយឮថា ផ្សារនឹងត្រូវរុះរើ រួចឲ្យឈ្មួញលក់តូបម្តងទៀត ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព៕
ចែករំលែកព័តមាននេះ