ខេត្តមណ្ឌលគិរី ៖ ឥទ្ធិពលព្យុះ KOMPASU បណ្ដាលឱ្យមានភ្លៀងធ្លាក់ប្រមាណ១០ថ្ងៃមកហើយនៅខេត្តមណ្ឌលគិរី បង្កឲ្យមានជំនន់ទឹកភ្លៀង និងទឹកទន្លេស្រែពកហក់ឡើង ជិតដល់ចំណុចប្រកាសអាសន្ន ដែលស្ថានភាពនេះ អាជ្ញាធរកំពុងចាត់វិធានការជាបន្ទាន់ ដើម្បីរក្សាសុវត្ថិភាពជូនប្រជាពលរដ្ឋដែលរស់នៅតាមដងទន្លេ និងតាមមាត់អូរនានាក្នុងខេត្ត។
មន្ត្រីគ្រប់គ្រងគ្រោះមហន្តរាយខេត្តមណ្ឌលគិរី បានឲ្យដឹងថា គិតត្រឹមវេលាព្រឹកថ្ងៃទី១៧ ខែតុលា ឆ្នាំ២០២១នេះ នៅខេត្តមណ្ឌលគិរី មិនទាន់មានប្រជាពលរដ្ឋណាម្នាក់រងគ្រោះថ្នាក់ដោយសារគ្រោះធម្មជាតិនោះទេ។ ប៉ុន្តែដោយសារតែមេឃបង្អុរភ្លៀងចុះជាបន្តបន្ទាប់ទាំងយប់ទាំងថ្ងៃអស់រយៈជាងមួយសប្តាហ៍ បានបង្កឲ្យមានជំនន់ទឹកភ្លៀង។ ចំណែកនៅស្រុកកោះញែក ទឹកទន្លេស្រែពក ក៏បានហក់ឡើងគួរឲ្យកត់សម្គាល់ ដ្បិតមានការបើកទ្វារទឹកពីប្រទេសវៀតណាម គួបផ្សំគ្រប់ដងអូរទាំងអស់មានទឹកហូរបុកចូលទន្លេ ទើបធ្វើឲ្យកម្ពស់ទឹងទន្លេឡើងរាល់ថ្ងៃ។
រដ្ឋបាលស្រុកកោះញែក បានជូនដំណឹងដល់បងប្អូនប្រជាពលរដ្ឋទាំងអស់ដែលរស់នៅតាមបណ្តោយដងទន្លេស្រែពក និងដងអូរច្បារឲ្យថា ដោយសារមានភ្លៀងធ្លាក់ស្ទួនៗជាប់គ្នាមួយរយៈពេលកន្លងមកនេះ នៅតំបន់ប៉ែកខាងលើ ហើយបានបន្តហូរចូលមកក្នុងទន្លេស្រែពកផ្នែកខាងក្រោម និងនៅតំបន់ប៉ែកខាងលើ អូរច្បារ បន្តហូរចូលក្នុងអូរច្បារផ្នែកខាងក្រោម ធ្វើឱ្យជំនន់ទឹកភ្លៀងមានការកើនឡើងខ្ពស់ ។ ហេតុដូច្នេះ សូមបងប្អូនប្រជាពលរដ្ឋនៅផ្នែកខាងក្រោមតាមបណ្តោយទន្លស្រែពក និង អូរច្បារ ត្រូវបង្កើនការប្រុងប្រយ័ត្នឱ្យបានខ្ពស់បំផុត។ រីឯស្រុកពេជ្រាដា មានភ្លៀងធ្លាក់ពេលយប់ច្រើន បណ្ដាលឲ្យមានទឹកជន់លិច ផ្លូវនៅឃុំពូជ្រៃ២កន្លែងស្មើនឹង ១ ០០០ម៉ែត្រ ផ្លូវក្នុងឃុំប៊ូស្រាមួយកន្លែង១០០ម៉ែត្រ។
សេចក្តីរាយការណ៏ពីស្រុកកែវសីមា បានឱ្យដឹងដែរថា ជំនន់ទឹកភ្លៀងនៅថ្ងៃទី១៧ ខែតុលានេះ ទឹកបានឡើងលិចនៅលើដងផ្លូវ នៅចំណុចភូមិពូហ៊ូង ប្រវែងជិត១០០ម៉ែត្រ មានជម្រៅជិត១ម៉ែត្រ ទឹកនៅបន្តឡើង ព្រោះភ្លៀងនៅតែបន្តធ្លាក់។
លោក ស៊ន សារុន អ្នកនាំពាក្យសាលាខេត្តមណ្ឌលគិរី បានឲ្យដឹងថា ទោះបីនៅខេត្តមណ្ឌលគិរី មិនទាន់មានបញ្ហាទឹកជំនន់វាយប្រហារភូមិឋានរបស់អ្នកស្រុកមែន ប៉ុន្តែរដ្ឋបាលខេត្តបានចាត់វិធានការត្រៀមបង្ការ ស្បៀងអាហារ និងសម្ភារៈសម្រាប់សង្គ្រោះដល់ប្រជាពលរដ្ឋដែលប្រឈមទៅនឹងការជន់លិចប៉ះពាល់ដល់សុវត្ថិភាពពួកគាត់ និងបានត្រៀមរៀបចំទុកសម្រាប់ជួយសង្គ្រោះនៅតំបន់ហានិភ័យ។
លោក ស៊ន សារុន បញ្ជាក់ថា រដ្ឋបាលខេត្តក៏បានត្រៀមរៀបចំទីទួលសុវត្ថិភាព ដើម្បីជម្លៀសបងប្អូនប្រជាពលរដ្ឋ ដែលមានលំនៅដ្ឋាន តាមមាត់ទន្លេ ឬដងអូរនានា ក្នុងករណីមានការជន់លិចធ្ងន់ធ្ងរ ដើម្បីត្រៀមជម្លៀសពួកគាត់ទៅកាន់ទីទួលសុវត្ថិភាព បង្ការគ្រោះថ្នាក់ជាយថាហេតុ៕
ចែករំលែកព័តមាននេះ