ខេត្តប៉ៃលិន ៖ បើតាមរបាយការណ៍របស់មន្ត្រីជំនាញប៉ុស្ថិ៍សង្កាត់អូរតាវ៉ៅ បានឲ្យដឹងថា មានករណីបុរសម្នាក់បានបាត់ខ្លួននៅក្នុងទឹកស្ទឹងភ្នំដំបង ជាប់ព្រំប្រទល់ស្រុកសំឡូត ដោយសារតែបុរសរងគ្រោះរូបនេះបានឃើញឈើអណ្ដែតទឹកក៏លោ.តចុះទៅតោងឈើនោះ ក៏ស្រាប់តែលិចបាត់ទាំងឈើទាំងមនុស្សតែម្តង រហូតមកដល់ព្រឹកថ្ងៃទី១៦ ខែតុលា ឆ្នាំ២០២១នេះ នៅមិនទាន់រកឃើញនៅឡើយទេ ។
ហេតុការណ៍បុរសម្នាក់លោ.តចាប់ឈើអណ្តែតទឹក ហើយលិចបាត់ក្នុងទឹកស្ទឹងនេះ បានកើតឡើងកាលពីវេលាម៉ោង១០និង៤៧នាទី ថ្ងៃទី១៥ ខែតុលា ឆ្នាំ២០២១ ស្ថិតនៅចំណុចភ្នំដំបង ភូមិក្រចាប់ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
បើតាមសមត្ថកិច្ចមូលដ្ឋានបានឲ្យដឹងថា ៖ បុរសម្នាក់ដែលបាត់ខ្លួននេះ មានឈ្មោះ ណាង ស៊ីណាល់ អាយុ៤៤ឆ្នាំ រស់នៅភូមិ-កើតហេតុខាងលើ ។
ប្រភពដដែលបន្តទៀតថា ក្រោយពីកើតហេតុ កម្លាំងសមត្ថកិច្ចប៉ុស្តិ៍រដ្ឋបាលអូរតាវ៉ៅ និងកម្លាំងប្រជាការពារភូមិ បានមកចុះពិនិត្យ និងសាកសួរជុំវិញកន្លែងកើតហេតុ ដោយនៅមុនពេលកើតហេតុ មានប្រជាពលរដ្ឋម្នាក់ឈ្មោះ ស៊ាង ម៉ាល័យ ភេទប្រុស អាយុ២៧ឆ្នាំ រស់នៅភូមិ-ឃុំជាមួយគ្នា បានឃើញបុរសខាងលើឈរនៅម្ខាងស្ទឹង ហើយក៏បានលោ.តចុះចូលទៅក្នុងស្ទឹងដែលមានជំនន់ទឹកភ្លៀង កំពុងហូរខ្លាំង ដើម្បីចុះចាប់ឈើដែលអណ្តែតតាមទឹកនោះ ហើយក៏លិចបាត់ទៅតែម្តង ។ បន្ទាប់មកសាក្សីខាងលើ ក៏បានស្រែកនៅឱ្យគេជួយ រួចក៏រាយការណ៍ទៅសមត្ថកិច្ចភ្លាមៗផងដែរ ។
ប្រភពដដែលបញ្ជាក់ថា បន្ទាប់មកសមត្ថកិច្ច និងកម្លាំងប្រជាការពារ ព្រមទាំងបងប្អូនប្រជាពលរដ្ឋបាននាំគ្នាដើររកមើលតាមមាត់ស្ទឹង តែមិនទាន់ឃើញអណ្តែតនៅឡើយទេ ។ ទោះបីជាយ៉ាងណា ក្រោយពីបាត់ខ្លួនជនរងគ្រោះ ក៏មានបន្សល់ទុកនូវវត្ថុតាងនៅទីតាំងកើតហេតុ ដោយមានកាំបិតខ្វែវមួយដើមផងដែរ ៕
ចែករំលែកព័តមាននេះ