អណ្តាតភ្លើងលេបត្របាក់ឆេះរថយន្តស៊េរីទំនើបក្នុងឃ្លាំងទុកចោលផ្អើលពលរដ្ឋ
- ភ្នំពេញ
អគ្គិភ័យបានឆាបឆេះរថយន្តស៊េរីទំនើបALPHARD មួយគ្រឿងនៅក្នុងឃ្លាំងទុកចោលមួយកន្លែង បង្កអោយមានការភ្ញាក់ផ្អើលដល់បងប្អូនប្រជាពលរដ្ឋ និងរថយន្ត
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា អគ្គិភ័យបានឆាបឆេះរថយន្តស៊េរីទំនើបALPHARD មួយគ្រឿងនៅក្នុងឃ្លាំងទុកចោលមួយកន្លែង បង្កអោយមានការភ្ញាក់ផ្អើលដល់បងប្អូនប្រជាពលរដ្ឋ និងរថយន្តពន្លត់អគ្គិភ័យចេញអន្តរាគមន៍បាញ់ទឹកពន្លត់ កាលពីវេលាម៉ោង១និង២០នាទីរំលងអធ្រាត្រឈានចូលថ្ងៃទី១៦ ខែតុលា ឆ្នាំ២០២១ នៅចំណុចឃ្លាំងទុកចោលមួយកន្លែង ជិតនឹងសាលាខណ្ឌដង្កោ ផ្លូវ២១៧ ក្នុងសង្កាត់ដង្កោ ខណ្ឌដង្កោ ។
តាមប្រភពព័ត៌មានពីបងប្អូនប្រជាពលរដ្ឋដែលរស់នៅជិតខាងក្បែរទីតាំងកន្លែងកើតហេតុ បានអោយដឹងថា មុនពេលកើតហេតុ ពួកគាត់បានឃើញមានផ្សែងហុយចេញពីក្នុងឃ្លាំងខាងលើ ដោយមិនដឹងថា ឆេះអ្វីនោះទេ ព្រោះថាឃ្លាំងនោះគឺចាក់សោទុកចោលទាំងក្នុងទាំងក្រៅ ហើយដោយមានមន្ទិលសង្ស័យ ពួកគាត់ក៏បានរាយការណ៍ជូនសមត្ថកិច្ចមូលដ្ឋាន អោយចុះទៅមើលឃើញថា មានផ្សែងហុយចេញកាន់តែខ្លាំងទៅខ្លាំងទៅ ។
ប្រភពដដែលបន្តថា ក្រោយមកសមត្ថកិច្ចមូលដ្ឋានក៏បានទំនាក់ទំនងហៅរថយន្តពន្លត់អគ្គិភ័យរបស់ការិយាល័យបង្ការពន្លត់អគ្គិភ័យនៃស្នងការដ្ឋានរាជធានីភ្នំពេញ ដែលប្រចាំការនៅសាលាខណ្ឌដង្កោ អោយចុះជួយអន្តរាគមន៍ចំនួន២គ្រឿង និងបានយកឧបករណ៍មកកាត់សោឃ្លាំង រួចចូលទៅទៅមើលក៏ឃើញថា មានភ្លើងកំពុងតែឆាបឆេះរថយន្តមួយគ្រឿងម៉ាក ALPHARD ដែលម្ចាស់ទុកចោលនៅក្នុងឃ្លាំង ដោយឃើញដូចនេះហើយ កម្លាំងជំនាញក៏បានធ្វើការបាញ់ពន្លត់អស់ទឹកចំនួន២រថយន្ដ ទើបធ្វើអោយភ្លើងរលត់ទៅវិញ ទៅវេលាម៉ោង១និង៤០នាទីយប់ថ្ងៃដដែល ។
ពាក់ព័ន្ធក្នុងករណីខាងលើនេះដែរ គឺមិនបង្កឲ្យមានការរីករាលដាលផ្ទះបងប្អូនប្រជាពលរដ្ឋនោះទេ គឺគ្រាន់តែឆេះរថយន្តស៊េរីទំនើបម៉ាក ALPHARD មួយគ្រឿងតែប៉ុណ្ណោះ ហើយចំពោះមូលហេតុដែលបណ្ដាលឲ្យមានការឆាបឆេះ គឺមកពីឆ្លងចរន្តអគ្គិសនី ៕
ចែករំលែកព័តមាននេះ