រាជធានីភ្នំពេញ ៖ នគរបាលព្រហ្មទណ្ឌ នៃអធិការដ្ឋានខណ្ឌបឹងកេងកង បាននិងកំពុងតែធ្វើការស្រាវជ្រាវយ៉ាងសកម្ម ដើម្បីកំណត់មុខសញ្ញាក្រុមក្មេងទំនើងមួយក្រុម ដែលបានធ្វើសកម្មភាពព្រួតគ្នា កា.ប់យុវជន២នាក់ និងម៉ូតូយ៉ាងសាហាវដូចរឿងចិនហុងកុង ។
ការប្រើហិង្សានេះ ត្រូវបានមហាជនបង្ហោះវីដេអូ ពីសកម្មភាពយ៉ាងសាហាវ ពីសំណាក់ជនមួយក្រុម និងបានស៊ែរតៗគ្នា នៅក្នុងបណ្តាញសង្គម ដែលសកម្មភាពបែបនេះ មិនគួរអោយកើតមាននៅរាជធានីភ្នំពេញ ដែលជាបេះដូង នៃព្រះរាជាណាចក្រកម្ពុជាឡើយ ។
ទោះបីជាយ៉ាងណា គេពុំទាន់ដឹងថា ករណីនេះ ប្រើហិង្សានេះ ជារឿងគំនុំ ដែលផ្តើមចេញពីទំនាស់ ឬក៏ជាករណី វាយប្លន់យកម៉ូតូ ឬយ៉ាងណានោះទេ ។
តាមគណនីហ្វេសប៊ុកដែលបានបង្ហោះវីដេអូ នៅរសៀលថ្ងៃទី១៥ ខែតុលាឆ្នាំ ២០២១ បានអោយដឹងថា «អនាធិបតេយ្យពេកហើយ! ហេតុការណ៍បែបនេះ មិនគួរណាកើតឡើងនៅក្នុងរាជធានីភ្នំពេញរបស់យើងឡើយ ។ ក្រុមក្មេងស្ទាវជាច្រើននាក់ ព្រួតគ្នាកាប់លើយុវជន២នាក់ ហើយកាប់ទាំងម៉ូតូ និងកាប់យកស្លាកលេខម៉ូតូ ទៅបាត់ទៀតយប់មិញនេះ នៅម្តុំកៅដាយ» ។
នៅក្នុងការបង្ហោះសារនោះ ក៏មានវីដេអូរបានបង្ហាញពីសកម្មភាពក្រុមយុវជនទំនើងមួយក្រុមនោះ បានត្រួតគ្នា កាប់លើយុវជន២នាក់ និងកាប់ម៉ូតូផងដែរ ។ តាមវីដេអូរនោះ អាចជារឿងទំនាស់ពាក្យសម្តីតាមដងផ្លូវ ឬជារឿងគំនុំ ព្រោះសកម្មភាពជនដៃដល់ គឺកាប់ និងវាយកំទេចម៉ូតូ ។
ទាក់ទិនហេតុការណ៍នេះ លោកវរះសេនីយ៍ឯក ស៊ឹម ពិសិដ្ឋ អធិការនគរបាលខណ្ឌបឹងកេងកង បានអោយកោះសន្តិភាពដឹងថា ករណីប្រើហិង្សានេះ បានកើតឡើងនៅតាមផ្លូវលេខ ២០៥ សង្កាត់ ទួលស្វាយព្រៃ២ ខណ្ឌបឹងកេងកង ។ បន្ទាប់ពីកើតហេតុ ជនរងគ្រោះ ដែលមានរបួសស្រាល បានមកដាក់ពាក្យបណ្តឹងហើយ ។
លោកអធិការ បានអោយដឹងទៀតថា បន្ទាប់ពីមានអំពើហិង្សាកើតឡើង នគរបាលព្រហ្មទណ្ឌ នៃអធិការដ្ឋាន បឹងកេងកង បានចុះធ្វើការស្រាវជ្រាវភ្លាមៗ ដោយឆែកកាមេរ៉ាកំណត់មកសញ្ញាជនដៃដល់ ដើម្បីឈានទៅឃាត់ខ្លួនមកផ្តន្ទាទោសតាមច្បាប់ ។
លោកអធិការក៍បានបញ្ជាក់ថា តាមវីដេអូ ដែលបានបង្ហោះនេះ មានអំពើហិង្សា ២ករណីផ្សេងគ្នា រូបភាពមួយនៅតាមផ្លូវកោសដូង ក្នុងខណ្ឌទួលគោក និងមួយទៀត ស្ថិតនៅក្នុងមូលដ្ឋាន របស់លោក ។ ទោះបីជាយ៉ាងណា លោកអធិការខណ្ឌ បឹងកេងកង មិនបានបញ្ជាក់ទេថា ការប្រើហិង្សាខាងលើនេះ ជាករណីគំនុំ ឬក៏ជាករណីប្លន់នោះទេ ៕
ចែករំលែកព័តមាននេះ