រាជធានីភ្នំពេញ ៖ ផ្ទះឈើលើ ថ្មក្រោមមួយខ្នង មានបន្ទប់ជួល៨ ត្រូវបានភ្លើងឆេះយ៉ាងសន្ធោសន្ធៅអស់ស្ទើរទាំងស្រុង និងឆេះម៉ូតូអស់៤គ្រឿង បង្កឲ្យមានការភ្ញាក់ផ្អើលកាលពីវេលាម៉ោង១១និង៣០នាទីយប់ថ្ងៃទី១៦ មីនា នៅតាមបណ្តោយផ្លូវលេខ២៤៥ ស្ថិតក្នុងភូមិបឹងសាឡាង សង្កាត់បឹងសាឡាង ខណ្ឌទួលគោក ។
ផ្ទះដែលត្រូវអគ្គិភ័យលេបត្របាក់ខាងលើនេះ មានទំហំ១៧ម៉ែត្រគុណ១២ម៉ែត្រ ជាផ្ទះជួលមាន៨បន្ទប់ ម្ចាស់ផ្ទះស្នាក់នៅជាន់លើ ឈ្មោះ ឆាយ សេង ភេទប្រុស អាយុ៤៧ឆ្នាំ ជាអ្នករត់ម៉ូតូឌុប ស្នាក់នៅផ្ទះកើតហេតុ ។
ប្រភពព័ត៌មានបានឲ្យដឹងថា មុនពេលកើតហេតុ ម្ចាស់ផ្ទះ និងអ្នកជួលផ្ទះដេកលង់លក់អស់ ដោយមិនបានដឹងថាបណ្តាលមកពីមូលហេតុអ្វីស្រាប់តែមានផ្សែងហុយទ្រលោមបង្កជាអណ្តាតភ្លើងឆេះផ្ទះយ៉ាងសន្ធោសន្ធៅ និងឆេះម៉ូតូអស់ស្ទើរទាំងស្រុងចំនួន៤គ្រឿង សង្ស័យបណ្តាលមកពីការទុស្សេខ្សែភ្លើងទើបធ្វើឱ្យឆេះបែបនេះ ។
អគ្គិភ័យខាងលើ ត្រូវបានអ្នកភូមិជួយយកបំពង់ពន្លត់អគ្គិភ័យមកបាញ់អស់ជាច្រើនបំពង់ហើយនៅតែមិនរលត់ ទើបសមត្ថកិច្ចហៅរថយន្តពន្លត់អគ្គិភ័យរបស់ស្នងការនគរបាលរាជធានីភ្នំពេញ បាញ់អស់ចំនួន៦គ្រឿងទើបរលត់ទាំងស្រុង ៕
ចែករំលែកព័តមាននេះ