ឲ្យលុយរត់ការដេញថ្លៃគំរោងជួសជុលផ្លូវ តែបានត្រឹមចាប់នាង លុយក៏អស់ ផ្លូវបានគេ
- ភ្នំពេញ
ស្ត្រីម្នាក់ត្រូវបានកម្លាំងសមត្ថកិច្ចការិល័យព្រហ្មទណ្ឌ នៃកងរាជអាវុធហត្ថរាជធានីភ្នំពេញ ចាប់ខ្លួនបញ្ជូនទៅតុលាការ ពាក់ព័ន្ធពីបទ
រាជធានីភ្នំពេញ ៖ ស្ត្រីម្នាក់ត្រូវបានកម្លាំងសមត្ថកិច្ចការិល័យព្រហ្មទណ្ឌ នៃកងរាជអាវុធហត្ថរាជធានីភ្នំពេញ ចាប់ខ្លួនបញ្ជូនទៅតុលាការ កាលពីរសៀលថ្ងៃទី១៤ ខែតុលា ឆ្នាំ២០២១ ពាក់ព័ន្ធពីបទ «រំលោ.ភលើទំនុកចិត្ត» និងមិនបំពេញកាតព្វកិច្ចចំពោះឧបករណ៍អាចជួញដូរបាន ពោលគឺប្រើប្រាស់សែកស្អុយដាក់តម្កល់នៅធនាគារ ។
ស្ត្រីរូបនោះមានឈ្មោះ ឈាង នាងល័ក្ត អាយុ៣៩ឆ្នាំ មុខរបរនៅផ្ទះ ទីលំនៅភូមិ-សង្កាត់ព្រែកអំពិល ខណ្ឌដង្កោ រាជធានីភ្នំពេញ ។
នៅសាលាដំបូងរាជធានីភ្នំពេញ ត្រូវបានគេដឹងថា ស្ត្រីឈ្មោះ ឈាង នាងល័ក្ត ត្រូវបានតំណាងអយ្យការបើកការស៊ើបសួរលើពាក្យបណ្តឹងព្រហ្មទណ្ឌ ពាក់ព័ន្ធក្នុងការទទួលយកប្រាក់ពីក្រុមហ៊ុនមួយប្រមាណជាង ៣០ ០០០ ដុល្លារអាមេរិក ដោយសន្យាយកទៅរត់ការដេញថ្លៃគម្រោងជួសជុលផ្លូវជាតិលេខ៤ និងផ្លូវជាតិ ៦A ដែលមិនបានសម្រេច ថែមទាំងស៊ីដាច់ប្រាក់នោះ ហើយគេចវេសមិនព្រមដោះស្រាយជាមួយដើមបណ្តឹងទៀតផង ។
ក្រោយសាកសួរអស់រយៈពេលជាច្រើនម៉ោង តំណាងអយ្យការបានផ្ញើជនសង្ស័យទៅសមត្ថកិច្ចកងរាជអាវុធហត្ថវិញ ដោយមិនទាន់សម្រេចធ្វើការចោទប្រកាន់ជាផ្លូវការយ៉ាងណានោះនៅឡើយទេ តែតម្រូវឲ្យនាំខ្លួនទៅសាកសួរបន្តនៅព្រឹកថ្ងៃទី១៥ ខែតុលា នេះទៀត ។
តាមប្រភពព័ត៌មានបានបង្ហើបឲ្យដឹងថា បើទោះបីជាការសាកសួរនៅមិនទាន់ត្រូវបានបញ្ចប់យ៉ាងណាក្តី ប៉ុន្តែជនសង្ស័យទំនងជាគ្មានលទ្ធភាពរកប្រាក់ ដើម្បីដោះបន្ទុកលើបណ្តឹងរដ្ឋប្បវេណីនោះទេ នាងអាចនឹងផ្ញើខ្លួនក្នុងពន្ធនាគារចោលប្តីមួយរយៈ ពាក់ព័ន្ធប្រើប្រាស់សែកស្អុយចំនួន ៣៥ ០០០ ដុល្លារអាមេរិក (សងខ្លះវិញហើយនៅសល់២៤ ០០០ដុល្លារ) ដែលទទួលយកទៅរត់ការដេញថ្លៃគម្រោងជួសជុលផ្លូវជាមួយក្រុមហ៊ុនមួយនោះ មិនបានសម្រេច ។ ចំណែកដើមបណ្តឹងវិញ មិនខុសពាក្យថា «ប្រាក់ក៏បង់ថង់ក៏ដាច់» ឲ្យលុយយកទៅរត់ការដេញថ្លៃគម្រោងជួសជុលផ្លូវ តែលទ្ធផលបានត្រឹមចាប់នាងបញ្ជូនទៅតុលាការ ឬឲ្យដាក់ពន្ធនាគារ លុយក៏អស់ គម្រោងជួសជុលផ្លូវក៏បានទៅគេ ។
ករណីដាច់ដោយឡែកមួយទៀត ប៉ុន្តែពេលវេលា និងថ្ងៃដដែល កម្លាំងសមត្ថកិច្ចការិយាល័យព្រហ្មទណ្ឌ នៃកងរាជអាវុធហត្ថរាជធានីភ្នំពេញ បានចាប់បញ្ជូនបុរសជនជាតិកូរ៉េម្នាក់បញ្ជូនទៅសាលាដំបូងកាលពីព្រឹកថ្ងៃទី១៤ ខែតុលា នេះដែរ ពាក់ព័ន្ធនឹងសំណុំរឿងខ្ចីប្រាក់មិត្តភក្តិចំនួន១៣ ម៉ឺនដុល្លារអាមេរិក ដើម្បីយកទៅពង្រីកមុខរបររកស៊ី តែបែរជាប្រើប្រាស់មូលប្បទានប័ត្រ (សែកស្អុយ) ដាក់តម្កល់នៅធនាគារ ដែលកំពុងជាប់សង្ស័យពីបទ.មិនបំពេញកាតព្វកិច្ចចំពោះឧបករណ៍ដែលអាចជួញដូរបាន ។
ជនសង្ស័យរូបនេះ ឈ្មោះ KIM MOO JIN ភេទប្រុស អាយុ៦៥ឆ្នាំ ជាជនជាកូរ៉េ និងជាពាណិជ្ជករនៅក្នុងស្រុកខ្មែរ មានទីលំនៅបុរី វ៉ារីណា ស្ថិតនៅក្នុងភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ ។
អង្គហេតុ ដែលបណ្តាលឲ្យសមត្ថកិច្ចចាប់ខ្លួនជនជាតិកូរ៉េរូបនេះ បញ្ជូនទៅសាលាដំបូងរាជធានីភ្នំពេញនោះ កឺកាលពីអំឡុងខែកុម្ភៈ ឆ្នាំ២០២១ ឈ្មោះ KIM MOO JIN បានទៅសុំខ្ចីប្រាក់ពីឈ្មោះ JUNG HEUIN TAE ជាជនជាតិកូរ៉េដូចគ្នា ចំនួន១៣ម៉ឺនដុល្លារអាមេរិក ដើម្បីយកទៅពង្រឹងមុខរបររកស៊ី ។ លុះដល់ប្រទេសជាតិធ្លាក់ក្នុងវិបត្តិសេដ្ឋកិច្ច ដោយសារជំងឺកូវីដកូវីដ១៩ កំពុងរាតត្បាត ជនសង្ស័យបានធ្វើកិច្ចសន្យាសងប្រាក់ទៅដើមបណ្តឹងតាមដំណាក់កាលវិញ ។
អង្គហេតុខាងលើបន្តថា ប៉ុន្តែដល់ថ្ងៃកំណត់ឈ្មោះ KIM MOO JIN មិនមានប្រាក់សងទៅដើមបណ្តឹងទេ ហើយម្ចាស់ប្រាក់ក៏បានដាស់តឿនជាច្រើនដងដែរ តែបែរជាជនសង្ស័យប្រើមូលប្បទានប័ត្រ (សែកស្អុយ) ចំនួន២សន្លឹក ចុះថ្ងៃទី៣១ ខែមីនា ឆ្នាំ២០២១ ដោយមានទឹកប្រាក់ចំនួន៤៥ ០០០ ដុល្លារអាមេរិក និងសែកមួយសន្លឹកទៀតចុះថ្ងៃទី១៧ ខែឧសភា ឆ្នាំ២០២១ មានទឹកប្រាក់ចំនួន៩ ម៉ឺន ដុល្លារអាមេរិក ។
អង្គហេតុនេះបញ្ជាក់ទៀតថា លុះដល់ថ្ងៃកំណត់ ម្ចាស់បំណុលបានយកសែកទាំង២នោះទៅបើកនៅធនាគារ ស្រាប់តែខាងធនាគារ ABA បញ្ជាក់មកវិញថា ជាសែកគ្មានសាច់ប្រាក់ ។ ចំណែកជនសង្ស័យឈ្មោះ KIM MOO JIN ក៏បានគេចវេសមិនជួបដោះស្រាយជាមួយឈ្មោះ JUNG HEUIN TAE ជាដើមបណ្តឹង ទើបត្រូវគេប្តឹងសមត្ថកិច្ចឲ្យចាប់ខ្លួន ដើម្បីចាត់ការតាមផ្លូវច្បាប់នោះ ។
សំណុំរឿងជនសង្ស័យជាជនជាតិកូរ៉េរូបនេះ ក៏កំពុងស្ថិតក្នុងការស៊ើបសួររបស់ស្ថាប័នអយ្យការអមសាលាដំបូងរាជធានីភ្នំពេញដែរ ដោយមិនទាន់ចោទប្រកាន់ជាផ្លូវការនៅឡើយទេ ៕
ចែករំលែកព័តមាននេះ