ឱក សុគន្ឋកញ្ញា បច្ចុប្បន្នជាតារាចម្រៀង ដែលមានភាពជោគជ័យស្ថិតនៅលំដាប់កំពូល និងមានការគាំទ្រខ្ពស់បំផុតពីសំណាក់ប្រិយមិត្ត។ ចំណេះដឹងពីសិល្បៈរបស់ ឱក សុគន្ឋកញ្ញាឃើញថា
រាជធានីភ្នំពេញ ៖ ឱក សុគន្ឋកញ្ញា បច្ចុប្បន្នជាតារាចម្រៀង ដែលទទួលបានជោគជ័យស្ថិតនៅលំដាប់កំពូល និងមានការគាំទ្រខ្ពស់បំផុតពីសំណាក់ប្រិយមិត្ត នៅក្នុងស្រុកនិងក្រៅសុ្រក ។ ក្រៅពីអាជីពជាតារាចម្រៀងមានទឹកដមសម្លេងពិរោះរណ្តំ តារាស្រីរូបនេះគឺមានចំណេះដឹងខាងសិល្បៈបុរាណមិនធម្មតានោះទេ ដែលចំណេះដឹងអំពីទម្រង់សិល្បៈបុរាណរបស់អ្នកនាង គឺទទួលបានការហាត់រៀនយ៉ាងស្ទាត់ជំនាញ ហើយសិល្បៈបុរាណដែលជាបាតគ្រឹះយ៉ាងរឹងមាំនោះគឺ ជំនាញខាង របាំបុរាណខ្មែរ ។
ថ្មីៗនេះ អ្នកនាង បានរំលេចនូវក្បាច់រាំបុរាណខ្មែរ ដោយទទួលបានការចាប់អារម្មណ៍ និងការគាំទ្រយ៉ាងខ្លាំងក្លាពីមហាជន។ អ្នកនាងពេលរំលេចនូវក្បាច់រាំជាទម្រង់របាំបុរាណ ក្រោមការតុបតែងទ្រង់គ្រឿងខ្លួនជា «នាថការិនីរបាំ» ជាមួយដៃពត់ពេនល្វត់ល្វន់ តែរឹងមាំ ឆ្លុះបញ្ចាំងឱ្យឃើញថា អ្នកនាងនៅតែមិនភ្លេចវិជ្ជាដែលបានរៀនតាំងកុមារភាពនៅសាលវិចិត្រសិល្បៈរាប់សិបឆ្នាំកន្លងទៅនោះទេ ។
អ្នកនាងត្រូវបានគេចាត់ទុកថា ជាតារាចម្រៀងដែលដុះចេញពីសាលាវិចិត្រសិល្បៈមានគ្រឹះច្បាស់លាស់។ បើទោះជាពេលនេះ អ្នកនាងជាតារាឈរលើតួលេខកំពូល នៃសិល្បៈចម្រៀងសម័យ ក៏ពិតមែន ក៏ឃើញថា ឱក សុគន្ធកញ្ញា នៅមិនភ្លេចវិជ្ជាគ្រឹះនៃសិល្បៈរបាំបុរាណខ្មែរ នាគ្រាដែលរូបនាងកំពុងល្បីឈ្មោះនោះឡើយ។
ឱក សុគន្ធកញ្ញា ដែលជា នាថការីរបាំល្បីមួយរូបនោះបានវិវត្តន៍ខ្លួនមកជាតារាចម្រៀងសម័យ និងឈរឈ្មោះជាតារាស្រីឈានមុខគេនៅផលិតកម្ម ហង្សមាស រយៈពេលជាង១០ឆ្នាំមកហើយ ។ រហូតនាងត្រូវបានអ្នកគាំទ្រស្រលាញ់ពេញចិត្ត និងចាត់ទុកជាតារាចម្រៀងដែលមានវាសនាខ្ពស់ ដោយបានក្លាយខ្លួនជាប្អូនថ្លៃ របស់ម្ចាស់ផលិតកម្មដែលនាងជ្រកកោន និងជាតារាចម្រៀងនារីដែលជោគជ័យទាំងជីវិតស្នេហា និងការងារ។ ស្រីស្រស់មានសម្រស់សោភា រូបនេះ បានរំលឹកពីស្នាដៃនាពេលអតីតកាលជាង២០ឆ្នាំមុនឡើងវិញ ក្នុងការសម្តែងរបាំបុរាណក្នុង MV មួយដែលទើបផលិតថ្មីៗនេះ ដែលកាន់តែជួយឱ្យរូបនាងទទួលបានការទាក់ទាញថែមមួយកម្រិតទៀត ទៅលើទេព្យកោសល្យរាំរបាំបុរាណរបស់នាង ហើយស្វាមីរបស់នាងលោក អ៊ឹង សុខលី គាំទ្រពេញទំហឹងតែម្ដង។
គេកត់សម្គាល់ថា នេះជាការចេញវាយលុកទីផ្សារចម្រៀងសារជាថ្មីឡើងវិញរបស់ សុគន្ធកញ្ញា ក្រោយពីនាងបានសម្រកគីឡូដោយជោគជ័យពីរាងកាម៉ាប់ៗ សាច់ណែនៗ មកជាតារាស្រីរាងស្វែលស្ទើរតែដូចកាលនៅក្រមុំ។ អ្វីដែលសុគន្ធកញ្ញា មានសង្ឃឹមនោះ គឺថា នាងអាចរក្សារតំណែងជាតារាស្រីឈានមុខគេនៅផលិតកម្មបាន តាមរយៈការត្រៀមបង្ហាញមុខជាថ្មី តាមកម្មវិធីប្រលងចម្រៀងធំៗលំដាប់អន្តរជាតិ ទាំង៤ផ្សេងៗគ្នាក្នុងនាមជាគណៈកម្មាការ និងគ្រូបង្វឹក The Voice Cambodia ,The Voice Kids Cambodia ,Cambodian Idol និង X Factor Cambodia ដែលលោកវណ្ណា អ្នកគ្រប់គ្រងកម្មវិធីខាងលើថា នឹងចេញដំណើរការរដូវកាលថ្មីនាពេលស្ងាត់កូវីដខាងមុខនេះហើយ។
តែសម្រាប់ទីផ្សារចម្រៀងវិញ សុគន្ធកញ្ញា នៅតែត្រូវបានអ្នកជំនាញសិល្បៈយល់ថា ស្វាមីនាងលោកអ៊ឹង សុខលី ដែលជានាយកទូរទស្សន៍ហង្សមាស និងបងថ្លៃនាងលោកឧកញ៉ា អ៊ឹង ឆៃងួន ជាថៅកែហង្សមាស នឹងមិនបណ្ដោយឲ្យនាងធ្លាក់ចុះជាដាច់ខាត៕
ចែករំលែកព័តមាននេះ