ខេត្តព្រៃវែង ៖ កំណាត់ផ្លូវជាតិលេខ៣១០ក្នុងទីប្រជុំជនអ្នកលឿង ដែលតភ្ជាប់ពីចំណុចកែងផ្សារអ្នកលឿង ចាក់ទៅដល់សាលាឃុំព្រែកខ្សាយ(ខ) ប្រវែងជាង៧០០ម៉ែត្របានរងការខូចខាតយ៉ាងធ្ងន់ធ្ងរ រយៈពេលជិត២ឆ្នាំមកហើយ និងបានធ្វើអោយប្រជាពលរដ្ឋនៅក្នុងតំបន់នេះ មានការលំបាកជាខ្លាំង នៅពេលធ្វើដំណើរឆ្លងកាត់ផ្លូវនេះម្តងៗ…
ខេត្តព្រៃវែង ៖ កំណាត់ផ្លូវជាតិលេខ៣១០ក្នុងទីប្រជុំជនអ្នកលឿង ដែលតភ្ជាប់ពីចំណុចកែងផ្សារអ្នកលឿង ចាក់ទៅដល់សាលាឃុំព្រែកខ្សាយ(ខ) ប្រវែងជាង៧០០ម៉ែត្របានរងការខូចខាតយ៉ាងធ្ងន់ធ្ងរ រយៈពេលជិត២ឆ្នាំមកហើយ និងបានធ្វើអោយប្រជាពលរដ្ឋនៅក្នុងតំបន់នេះ មានការលំបាកជាខ្លាំង នៅពេលធ្វើដំណើរឆ្លងកាត់ផ្លូវនេះម្តងៗ ។
នៅព្រឹកថ្ងៃទី១៣ តុលា ក្នុងពេលចុះពិនិត្យសកម្មភាពជួសជុលផ្លូវនេះ ឯកឧត្តម ឌុច គន្ធា អភិបាលរងខេត្ត និងជាតំណាងរបស់ឯកឩត្តម ជា សុមេធី អភិបាលខេត្តព្រៃវែង បានមានប្រសាសន៌ថា ផ្លូវជាតិលេខ៣១០នេះ គឺក្រុមកងវិស្វកម្មក្រសួងមហាផ្ទៃ កំពុងធ្វើការសាងសង់ ដោយធ្វើដេញពីព្រំដែនកោះរកា មកដល់ទីប្រជុំជនអ្នកលឿងនេះ ប្រវែងជាង៤២គីឡូម៉ែត្រ ជាប្រភេទផ្លូវក្រាលកៅស៊ូ។ ប៉ុន្តែដោយមើលឃើញថា កំណាត់ផ្លូវនេះ នៅក្នុងទីប្រជុំជនអ្នកលឿង ក្រុមវិស្វកម្មធ្វើមិនទាន់ដល់ តែស្ថានភាពផ្លូវកំពុងខូចខាតធ្ងន់ធ្ងរ ទើបឯកឩត្តមអភិបាលខេត្ត សំរេចអោយអាជ្ញាធរស្រុកនិងមន្ទីរជំនាញ សហការគ្នាធ្វើការជួសជុលផ្លូវនេះអោយប្រជាពលរដ្ឋប្រើប្រាស់ជាបណ្តោះអាសន្នសិន។
ឯកឧត្តម ឌុច គន្ធា បានបញ្ជាក់ថា ការជួសជុលកំណាត់ផ្លូវជាតិលេខ៣១០ ប្រវែងជាង៧០០ម៉ែត្រនេះ តាមការសិក្សារបស់មន្ត្រីជំនាញ គឺត្រូវចំណាយថវិកាប្រមាណជាង២ម៉ឺនដុល្លារ ប៉ុន្តែពេលនេះកញ្ចប់ថវិកា ទើបតែមានត្រឹមជាង៥ពាន់ដុល្លារប៉ុណ្ណោះ តែដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋ កុំអោយមានការលំបាកតទៅទៀត យើងត្រូវតែដាក់គ្រឿងចក្រចុះធ្វើ ដោយធ្វើបណ្តើរ គៀងគរស្វែងរកថវិកាបណ្តើរ គឺទំរាំតែដល់ឆ្នាំ២០២២ នៅពេលដែលកំរោងថ្នាក់ជាតិទំលាក់មក យើងនិងធ្វើផ្លូវនេះជាផ្លូវបេតុងតែម្តង តែចំពោះមុខពេលនេះ គឺយើងធ្វើគ្រឹះក្រោមឱ្យរឹងមាំ ហើយចាក់ក្រាលខ្សាច់ភ្នំ អោយប្រជាពលរដ្ឋធ្វើដំណើរឆ្លងកាត់បានស្រួលសិន។
ជាមួយគ្នានេះដែរ ឯកឧត្តម ឌុច គន្ធា បានសំណូមពរដល់បងប្អូនប្រជាពលរដ្ឋ ដែលមានផ្ទះនៅតាមបណ្តោយផ្លូវនេះ បើសិនការជួសជុលផ្លូវ មានការរំខាន ឬប៉ះពាល់បន្តិចបន្តួច សូមមេត្តាយោគយល់អធ្យាស្រ័យផង ជាពិសេស អ្នកដែលមានធនធាន ចង់ចូលរួមឧបត្ថម្ភក្នុងការជួសជុលផ្លូវនេះ ក៏សូមទំនាក់ទំនងទៅខាងអាជ្ញាធរឃុំឬស្រុក ហើយបើមានការចូលរួមពីបងប្អូន នោះការជួសជុលផ្លូវនេះ និងកាន់តែឆាប់រហ័ស៕
ចែករំលែកព័តមាននេះ