កំពង់ស្ពឺ៖ ក្រោយពីសុំលុយប្រពន្ធបានហើយ បុរសនោះ បានជិះម៉ូតូ ទៅបាត់ពីផ្ទះ លុះអ្នកភូមិប្រទះឃើញ ក្លាយជាស.ពអណ្តែតទឹកស្ទឹង នាំអោយសមត្ថកិច្ចពីរស្រុក ចុះស្រាវជ្រាវយ៉ាងសស្រាក់សស្រាំ ដើម្បីបញ្ជាក់ពីមូលហេតុនៃការស្លាប់របស់ជនរងគ្រោះ។
ចំពោះមូលហេតុ ដែលសមត្ថកិច្ចទាំងពីរស្រុកដុតដៃជើង ចុះធ្វើការស្រាវជ្រាវនេះ ក្រោយពីមានពាក្យចចាមអារាមថា ជនរងគ្រោះ ស្លា.ប់ ដោយអំពើឃាតកម្មវាយប្លន់យកម៉ូតូ តែលទ្ធផលចុងក្រោយ ពិតជាមិននឹកស្មានដល់មែន។
ប្រភពពីសមត្ថកិច្ចនគរបាលស្រុកបសេដ្ឋ បានអោយដឹងថា កាលពីថ្ងៃទី១០ ខែតុលា ឆ្នាំ២០២១ ឈ្មោះ ណេន សម្បត្តិ ភេទស្រី អាយុ ៣១ឆ្នាំ រស់នៅភូមិចំរើនផល ឃុំពោធិម្រាល ស្រុកបសេដ្ឋ ខេត្តកំពង់ស្ពឺ បានឲ្យឈ្មោះ ស៊ីម សាវន ភេទប្រុស អាយុ ៣២ឆ្នាំ ត្រូវជាប្តី ជូនទៅខ្ចីលុយគេ បានចំនួន ១លានរៀល។
ប្រភពបន្តថា ក្រោយពីខ្ចីលុយគេបានហើយ ឈ្មោះ ស៊ីម សាវន បានសុំលុយប្រពន្ធ ៥សែនរៀល ថា យកទៅបង់ថ្លៃរំលោះម៉ូតូ។ ពេលនោះ ប្រពន្ធ ក៏អោយ បន្ទាប់មក គេក៏បានជិះម៉ូតូ ១គ្រឿង ម៉ាកហុងដា C125 ពណ៌ខ្មៅ ស៊េរីឆ្នាំ២០២១ ស្លាកលេខកំពង់ស្ពឺ 1T-6065 ជិះទៅបាត់តែម្តង។ ក្រោយពីប្តីទៅបាត់ប្រពន្ធ ក៏មិនចាប់អារម្មណ៍ រកដែរ ព្រោះជាទម្លាប់ទៅហើយ។
ប្រភពបន្តទៀតថា លុះដល់ថ្ងៃទី១២ ខែតុលា ឆ្ន២០២១ វេលាម៉ោង ១០ និង ៣០នាទី ទទួលបានព័ត៌មានថា មានមនុស្សស្លា.ប់អណ្តែតទឹកស្ទឹងស្លាគូរ។ ភ្លាមៗនោះ ក្រុមគ្រួសារសាច់ញ្ញាតិ ទៅមើលឃើញសាកស.ព ក៏ស្គាល់ជាក់ថា គឺជាស.ពឈ្មោះ ស៊ីម សាវន ប្រាកដមែន។ ស.ពនេះអណ្តែតទឹកស្ទឹងស្លាគូរ នៅចំណុចខាងលិចរោងចក្រ ស្ថិតនៅភូមិចោមពល ឃុំពរពេល ស្រុកត្រាំកក់ ខេត្តតាកែវ។ រីឯម៉ូតូ និងលុយបាត់មិនឃើញ។
នៅពេលដែលប្រទះឃើញស.ពអណ្តែតទឹក ហើយមានការអះអាងពីក្រុមគ្រួសារថា បាត់លុយហាសិបម៉ឺន និងម៉ូតូស៊េរី ឆ្នាំ២០២១ មួយគ្រឿង ធ្វើអោយមជ្ឈដ្ឋាន និងមហាជននាំគ្នាវិភាគថា ឈ្មោះ ស៊ីម សាវន ស្លា.ប់ ដោយអំពើឃាតកម្ម វាយប្លន់យកម៉ូតូ។
ដោយមិនចង់អោយមហាជនវាយតម្លៃ មកលើសមត្ថកិច្ចថា អសមត្ថភាពក្នុងការបំបែកសំណុំរឿងនេះ សមត្ថកិច្ចនគរបាល ស្រុកត្រាំកក់ ខេត្តតាកែវ និងសមត្ថកិច្ចនគរបាលស្រុកបសេដ្ឋ ខេត្តកំពង់ស្ពឺ សហការគ្នា ដុតដៃដុតជើង បើកការស្រាវជ្រាវស៊ើបអង្កេត ដើម្បីបំបែកសំណុំរឿងនេះ។
ជាលទ្ធផល ក្រោយការស្រាវជ្រាវអស់រយៈពេលជាច្រើនម៉ោងរួចមក សមត្ថកិច្ច ក៏អាចបំបែកសំណុំរឿងនេះ បាននៅវេលាម៉ោង ២០ ថ្ងៃទី១២ ខែតុលា ឆ្នាំ២០២១ ដោយរកឃើញម៉ូតូរបស់ជនរងគ្រោះ ចាក់សោទុក (ឡុកសោ) នៅភូមិព្រៃខ្លុង ឃុំពោធិម្រាល (ជាប់មាត់ស្ទឹងស្លាគូ) ស្រុកបសេដ្ឋ ទល់មុខភូមិអង្គរកា ឃុំអូរសារាយ ស្រុកត្រាំកក់ ខេត្តតាកែវ។
សមត្ថកិច្ចបានបញ្ជាក់ថា តាមការស្រាវជ្រាវ គឺមានមនុស្សឃើញជនរងគ្រោះ ជិះម៉ូតូ មកឈប់ ហើយចាក់សោទុកនៅទីនោះ ក្រោយមកជនរងគ្រោះ បានហែលឆ្លងទឹកស្ទឹងស្លាគូ ពីជើងទៅត្បូង ហើយក៏គ្មានអ្នកណា ចាប់អារម្មណ៍ថា ជនរងគ្រោះហែលរួច ឬមិនរួចនោះដែរ លុះមានការភ្ញាក់ផ្អើលថា ប្រទះឃើញស.ពនៅជិតស្ពានស្លាគូ ដែលមានចំងាយជាង ៨គីឡូម៉ែត្រ ពីកន្លែងទុកម៉ូតូបែបនេះ ក៏រាយការណ៍ និងបំភ្លឺជូនសមត្ថកិច្ច ទើបឈានទៅបំបែកសំណុំរឿងនេះបាន។
អ្វីដែលជាលទ្ធផល ក្រោយការស្រាវជ្រាវ គឺជនរងគ្រោះ ហែលឆ្លងទឹកស្ទឹង ដែលកំពុងជន់លិចនោះ ក្នុងគោលបំណង ទៅទិញថ្នាំញៀន យកមកជក់សោះ។
សមត្ថកិច្ច បានបញ្ជាក់ ជាចុងក្រោយថា បន្ទាប់ពីបំបែកសំណុំរឿងនេះរួចមក សមត្ថកិច្ច បានបំពេញបែបបទប្រគល់សព អោយធ្វើបុណ្យតាមប្រពៃណី និងម៉ូតូទៅអោយក្រុមគ្រួសារ យកទៅគ្រប់គ្រងបន្ត៕ វង្ស សន
ចែករំលែកព័តមាននេះ