រាជធានីភ្នំពេញ ៖ សម្តេចក្រឡាហោម ស ខេង ឧបកនាយករដ្ឋមន្ត្រីបានណែនាំដល់អភិបាលខេត្តរតនគិរីថ្មីកុំឲ្យមានការរើសអើងនិងប្រកាន់និន្នាការនយោបាយចំពោះប្រជាពលរដ្ឋត្រូវតែជួយដោះស្រាយរាល់ការលំបាករបស់ពួកគាត់ ។ ថ្លែងក្នុងពិធីប្រកាសចូលកាន់តំណែងអភិបាលខេត្តរតនគិរី នាព្រឹកថ្ងៃទី១២ ខែតុលា…
រាជធានីភ្នំពេញ ៖ សម្តេចក្រឡាហោម ស ខេង ឧបកនាយករដ្ឋមន្ត្រីបានណែនាំដល់អភិបាលខេត្តរតនគិរីថ្មីកុំឲ្យមានការរើសអើងនិងប្រកាន់និន្នាការនយោបាយចំពោះប្រជាពលរដ្ឋត្រូវតែជួយដោះស្រាយរាល់ការលំបាករបស់ពួកគាត់ ។
ថ្លែងក្នុងពិធីប្រកាសចូលកាន់តំណែងអភិបាលខេត្តរតនគិរី នាព្រឹកថ្ងៃទី១២ ខែតុលា ឆ្នាំ២០២១សម្តេចក្រឡាហោមស ខេងបានណែនាំឱ្យយកចិត្តទុកដាក់ផ្ដល់ភាពកក់ក្ដៅ ជូនប្រជាពលរដ្ឋឱ្យបានល្អ ផ្ដល់សេវាសាធារណៈដោយគ្មានការរើសអើង និងប្រកាន់និន្នាការនយោបាយ ។
សម្ដេចក៏បានបន្តមានប្រសាសន៍អំពីដំណើរការនៃការធ្វើកំណែទម្រង់វិមជ្ឈការ និងវិសហមជ្ឈការ ពិសេសវឌ្ឍនភាពនៃការផ្ទេរមុខងារ ធនធាន និងសិទ្ធិអំណាចពីថ្នាក់ជាតិទៅថ្នាក់ក្រោមជាតិ ដើម្បីថ្នាក់ដឹកនាំមូលដ្ឋានមានរាជធានី ខេត្ត ក្រុង ស្រុក ខណ្ឌ ឃុំសង្កាត់កាន់តែមានលទ្ធភាពក្នុងការបំរើសេវាធារណៈ និងឆ្លើយតបតម្រូវការប្រជាពលរដ្ឋដែលនៅកៀកនឹងខ្លួនឱ្យបានកាន់តែល្អប្រសើរ។
ជាមួយគ្នានោះដែរ សម្ដេចក្រឡាហោមក៏បានណែនាំឱ្យមន្ត្រីរាជការមូលដ្ឋានទាំងអស់សូមខិតខំកៀគរការគាំទ្រពីប្រជាពលរដ្ឋបានសកម្ម ដើម្បីធានាការអនុវត្តគោលនយោបាយនានា រួមទាំងគោលនយោបាយភូមិឃុំសង្កាត់មានសុវត្ថិភាពឱ្យទទួលបានលទ្ធផលប្រសើរ ។
សម្ដេច ឧបនាយករដ្ឋមន្ត្រីក៏បានគូសបញ្ជាក់អំពីការត្រៀមរៀបចំការបោះឆ្នោតជ្រើសរើសសមាជិកក្រុមប្រឹក្សាឃុំសង្កាត់ឆ្នាំ២០២២ និងដំណើរការបោះឆ្នោតសកល និងអសកលជាបន្តបន្ទាប់ទៀត ដោយបានណែនាំឱ្យមានការចូលរួមធ្វើឱ្យដំណើរការបោះឆ្នោតនេះបានប្រព្រឹត្តទៅដោយរលូនដ្បិតការបោះឆ្នោតក្រុមប្រឹក្សា ឃុំសង្កាត់ ក្រុងស្រុកខណ្ឌ និងរាជធានីខេត្តនេះ គឺជាផ្នែកមួយយ៉ាងសំខាន់ក្នុងដំណើរការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ។
សម្ដេចឧបនាយករដ្ឋមន្ត្រីបានណែនាំអភិបាលខេត្តថ្មី រួមទាំងថ្នាក់ដឹកនាំមន្ត្រីរាជកា រស៊ីវិល និងកងកម្លាំង ពិសេសកម្លាំងការពារព្រំដែន សូមការពារឱ្យបានដាច់ខាតនូវបូរណភាព ទឹកដី និងអធិបតេយ្យភាពជាតិ ពង្រឹងកិច្ចសហប្រតិបត្តិការជាមួយខេត្តជាប់ព្រំដែន ដើម្បីជំរុញការ អភិវឌ្ឍព្រំដែនឱ្យទៅជាព្រំដែនមានទាំងសន្តិភាព និងរីកចំរើនលើវិស័យសេដ្ឋកិច្ច និងពាណិជ្ជកម្ម ព្រមទាំងខិតខំពង្រឹងកិច្ចសហប្រតិបត្តិការទប់ស្កាត់បទល្មើសឆ្លងដែនគ្រប់ប្រភេទ ។
សម្ដេចក៏បានណែនាំឱ្យខិតខំថែរក្សា និងការពារព្រៃឈើ ព្រមទាំងធនធានធម្មជាតិ ផ្សេងៗទៀតដែលមានក្នុងខេត្តឱ្យបានល្អ ។ ទន្ទឹមនឹងការបន្តលើកទឹកចិត្តឱ្យខិតខំផ្ដល់សេវាសាធារណៈជូនប្រជាពលរដ្ឋឱ្យបានល្អ សម្ដេចក្រឡាហោម ស ខេង បានផ្ដល់ទស្សនៈឱ្យថ្នាក់ដឹកនាំ និងមន្ត្រីចំណុះរដ្ឋបាលខេត្តទាំងអស់ ខិតខំប្រមូល និងដោះស្រាយបញ្ហាប្រជាពលរដ្ឋឱ្យបានល្អបើកចិត្តឱ្យបានទូលាយដើម្បីទទួលយកមតិរិះគន់កែលម្អរ និងសំណូមពរនានាពីប្រជាពលរដ្ឋ និងពីមជ្ឈដ្ឋាននានា។
សម្ដេចបានស្នើឱ្យគណៈអភិបាល និងក្រុមប្រឹក្សាត្រូវមានកិច្ចសហការគ្នា អនុវត្តភារកិច្ចតាមច្បាប់ឱ្យបានល្អ ។ ជាការកត់សំគាល់ ពីវេទិការអធិបតីនេះដែរ សម្ដេចក្រឡាហោម ស ខេង ឧបនាយករដ្ឋមន្ត្រី បានផ្ដល់អនុសាសន៍ឱ្យថ្នាក់ដឹកនាំក្រុមកា រងារចុះជួយមូលដ្ឋានខេត្ត ក្រុមប្រឹក្សាខេត្ត និងគណៈអភិបាលខេត្តរតនគិរី ត្រូវពិភាក្សាគ្នាដើ ម្បីរៀបចំសមាភាពអភិបាលរងខេត្តម្នាក់មកជំនួសឯកឧត្តម ញ៉ែម សំអឿន ដែលឡើងពីអភិបាលរងខេត្ត មកធ្វើជាអភិបាលខេត្ត ក្នុងនោះសម្ដេចបានស្នើឱ្យពិនិ ត្យលទ្ធភាពផ្ដល់អាទិភាពជូនមន្ត្រីជាជនជាតិដើមភាគតិច៕
ចែករំលែកព័តមាននេះ