រាជធានីភ្នំពេញ ៖ មិនចម្លែកទេប្រសិនបើវត្ថុអ្វីមួយដែលបានច្នៃ និងបង្កើតឡើងដោយមានដាំពេជ្រ ត្បូង និងមាស លក់ក្នុងតម្លៃថ្លៃនោះ ។ ក៏ព្រោះថា គ្រាន់តែតម្លៃគ្រាប់ពេជ្រ…
រាជធានីភ្នំពេញ ៖ មិនចម្លែកទេប្រសិនបើវត្ថុអ្វីមួយដែលបានច្នៃ និងបង្កើតឡើងដោយមានដាំពេជ្រ ត្បូង និងមាស លក់ក្នុងតម្លៃថ្លៃនោះ ។ ក៏ព្រោះថា គ្រាន់តែតម្លៃគ្រាប់ពេជ្រ និងមាសសុទ្ធវាសឹងតែមានតម្លៃកប់ពពកបាត់ទៅហើយ មិនខុសអីនឹងខ្សែកដែលគេបានដាក់ឈ្មោះថា Heritage in Bloom ដែលជាខ្សែកពេជ្រ លក់បានថ្លៃរហូតដល់ទៅ ២០០ លានដុល្លារអាមេរិកឯណោះ ។ តោះ ! មកដឹងពីការច្នៃប្រឌិត និងប្រវត្តិខ្លះៗរបស់ខ្សែកត្បូងពេជ្រ Heritage in Bloom ដែលជាខ្សែកជាប់លំដាប់ទី ១ ក្នុងបញ្ជីខ្សែកពេជ្រថ្លៃជាងគេលើលោកក្នុងឆ្នាំ ២០២១ ។
Heritage in Bloom អាចនិយាយបានថា «មរតកកេរ្តិ៍តំណែលក្នុងរដូវផ្ការីក» លក់ក្នុងតម្លៃ ២០០ លានដុល្លារអាមេរិក វាជាគ្រឿងអលង្ការដែលបានរចនាស្នាដៃដោយវិចិត្រករជនជាតិចិនមានឈ្មោះថា Wallace Chan ។ ខ្សែក «មរតកកេរ្តិ៍តំណែលក្នុងរដូវផ្ការីក» មានដាំត្បូងដែលមានតម្លៃ និងត្បូងពេជ្រគ្មានពណ៌ដែលមានតែមួយគត់ ហើយគ្រាន់តែតម្លៃត្បូងពេជ្រគ្មានពណ៌នោះ គឺថ្លៃ ៣៥ លានដុល្លារអាមេរិកបាត់ហើយ ដូចនេះសរុបទាំងត្បូងមានតម្លៃ និងពេជ្រគ្មានពណ៌ គឺធ្វើអស់ ៣៨៣.៤ ការ៉ាត់ ។
នៅលើកំពូលនៃខ្សែកនេះ មានត្បូង jade (ខ្មែរយើងគេហៅថា ហ្គេច) ម៉ាប់ពណ៌ស ៧២ គ្រាប់, ហ្គេចទឹកកពណ៌បៃតង មានចំនួន ១១៤ ដុំ គ្រាប់ពេជ្រពណ៌ផ្កាឈូក ៦០០ គ្រាប់ និងពេជ្រគ្មានពណ៌ចំនួន ១៩ គ្រាប់ទៀត ដែលធ្វើឱ្យខ្សែកមួយខ្សែនេះ មានទម្ងន់រហូតដល់កន្លះផោន ។ ខ្សែក «មរតកកេរ្តិ៍តំណែលក្នុងរដូវផ្ការីក» ត្រូវបានរចនាឡើង ដោយត្បូងពេជ្រឥតខ្ចោះ ដែលឆ្លាក់ចេញពីត្បូងពេជ្រ the Cullinan Heritage ដែលជាពេជ្រប្រភេទ IIA ទំហំ ៥០៧.៥៥ ការ៉ាត់ ដ៏កម្រ ។ ប្រភេទទី IIA គឺជាត្បូងពេជ្រដែលសុទ្ធ និងគ្មានជាតិពុល ។ ដើម្បីបង្កើតស្នាដៃនេះ សិប្បករបានធ្វើការអស់រយៈពេលជាង ៤៧.០០០ ម៉ោង ដើម្បីច្នៃចេញជាភាពស្រស់ស្អាតនៃមេអំបៅ ដែលបង្ហាញពីក្តីស្នេហា ចំណែករូបប្រចៀវ ដំណាងឱ្យសំណាងល្អ ។
ចំណុចដែលគួរឱ្យចាប់អារម្មណ៍នោះ គឺថាខ្សែកនេះរចនាម៉ូដដែលអាចពាក់បាន ២៧ ទំរង់ ឬកាលៈទេសៈ ហើយវាបានបញ្ជាក់ពីសមាសភាពដ៏ល្អប្រណីត និងការរចនាដ៏វិសេសវិសាល នៃស្នាដៃដ៏អស្ចារ្យរបស់លោក Wallace Chan ផងដែរ ៕ ប្រភព ៖ financesonline
ចែករំលែកព័តមាននេះ