ប្រទេសវៀតណាម៖ បើទោះបីជាស្ថានភាពកូវីដ-១៩ ហាក់មិនទាន់ធូរស្បើយក្តី ក្រសួងដឹកជញ្ជូន នៃប្រទេសវៀតណាម បានប្រកាសគ្រោងចាប់ផ្តើមជើងហោះហើរក្នុងស្រុកឡើងវិញឡើងវិញចំនួន ១៩ ខ្សែ សម្រាប់ខេត្ត-ក្រុងចំនួន ៣ ដែលកន្លងមកបានបិទការហោះហើរនោះ ។ អាជ្ញាធរបានបញ្ជាក់ថា កម្មវិធីសាកល្បងជើងហោះហើរឡើងវិញក្នុង ក្រុងនិងខេត្តទាំង៣ នោះរួមមាន Hải Phòng, Gia Lai និង Hà Nội ដែលត្រូវបានយល់ព្រមឱ្យចាប់ផ្តើមដំណើរការឡើងវិញហើយ ។ នេះបើយោងតាមសារព័ត៌មាន vietnamnews ចេញផ្សាយកាលពីថ្ងៃទី០៩ ខែតុលា ឆ្នាំ២០២១នេះ ។ តែយ៉ាងណាមិញ គម្រោងបើកការហោះហើរឡើងវិញ ដែលលនឹងត្រូវអនុវត្តនៅចន្លោះថ្ងៃទី ១០-២០ ខែតុលានេះ ក៏តម្រូវឱ្យអ្នកដំណើរអនុវត្តតាមវិធានការ ដាក់ឱ្យនៅដាច់ដោយឡែកសិន នៅក្នុងគោលដៅរបស់ពួកគេដែលចុះចតនោះ ។
ក្នុងកំលុងពេលអនុវត្តកម្មវិធីហោះហើរក្នុងស្រុកឡើងវិញនេះ ក្រសួងមហាផ្ទៃនឹងសម្របសម្រួលជាមួយតំបន់នានា ដើម្បីវាយតម្លៃពីកាលៈទេសៈ និងលទ្ធផលជាមុន មុននឹងដាក់ស្នើសុំការកែសម្រួលចាំបាច់ណាមួយ ជូនដល់នាយករដ្ឋមន្ត្រីខ្លួន ។
ក្រោមកម្មវិធីសាកល្បងនេះ ក្រសួងមហាផ្ទៃបានអនុញ្ញាតឱ្យបន្តការហោះហើរក្នុងស្រុកចំនួន ៣៨ ដងក្នុងមួយថ្ងៃ នៅក្នុងខេត្ត – ក្រុងចំនួន ១៩ ។ ជើងហោះដែលនឹងត្រូវបានអនុញ្ញាតឱ្យដំណើរការទៅមករួមមាន ចន្លោះជើងហោះហើយ HCM City ទៅមក Bình Định, Đà Nẵng, Huế, Khánh Hòa, Nghệ An, Phú Yên, Quảng Bình, Quảng Nam, Thanh Hóa, Hải Phòng, Phú Quốc, Gia Lai និង Rạch Giá ។
វាក៏នឹងមានជើងហោះហើរទៅមកមួយ រវាងទីក្រុងហាណូយនិងទីក្រុងហូជីមិញផងដែរ ចំណែកជើងហោះហើរ Cần Thơ នឹងមានភាពបត់បែន តាមកាលៈទេសៈជាក់ស្តែង នៃពេលវេលា។ Hải Phòng នឹងធ្វើដំណើរទៅមកជុំវិញទីក្រុងហូជីមិញ។ រីឯហាណូយ នឹងមានដំណើរវិលជុំពីរដង ទៅកាន់ទីក្រុង Đà Nẵng និងទីក្រុងហូជីមិញផងដែរ។ ចំណែក Gia Lai នឹងធ្វើដំណើរទៅមកពីទីក្រុងហូជីមិញជារៀងរាល់ថ្ងៃ។
សម្រាប់អ្នកដំណើរវិញ ក្រសួងសុខាភិបាល ក៏បានតម្រូវឱ្យមានការបញ្ជាក់ ពីការចាក់វ៉ាក់សាំងចំនួនពីរដង (កាតចាក់វ៉ាក់សាំង) ឬប្រសិនជាពួកគាត់ធ្លាប់មានវិជ្ជមានកូវីដ-១៩ ពួកគេក៏អាចធ្វើដំណើរបានដែរ ដោយត្រូវមានលិខិតបញ្ជាក់ថាពួកគេបានជាសះស្បើយរួចហើយ (ការជាសះស្បើយ ត្រូវមានរយៈពេល៦ខែចុងក្រោយ) ហើយមុនពេលធ្វើដំណើរ ៣ថ្ងៃ ពួកគេត្រូវតែមានលិខិតតេស្តអវិជ្ជមានកូវីដ ១៩ ផងដែរ ។
អ្នកដំណើរត្រូវបំពេញតាមសេចក្តីប្រកាសអំពីវេជ្ជសាស្ត្រ ប៉ុន្តែនឹងមិនត្រូវបានអនុញ្ញាតឱ្យឡើងយន្តហោះទេ ប្រសិនបើពួកគេមានគ្រុនក្តៅក្អកឬពិបាកដកដង្ហើម។ បន្ទាប់ពីការហោះហើរ អ្នកដំណើរត្រូវរាយការណ៍ទៅអាជ្ញាធរមូលដ្ឋាន ដោយដាក់ខ្លួនឯងនៅដាច់ដោយឡែកពីគេនៅផ្ទះ ដោយមានការណែនាំពីអាជ្ញាធរមូលដ្ឋាន ។
ថ្នាក់ដឹកនាំនៃគណៈកម្មាធិការទីក្រុងហាណូយ នៅថ្ងៃសៅរ៍នេះ បានស្នើសុំអ្នកដំណើរ ដែលបានចេញពីទីក្រុងហូជីមិញ ទៅដល់អាកាសយានដ្ឋានអន្តរជាតិ ណឺបៀ បង្ហាញភស្តុតាងនៃការធ្វើតេស្តអវិជ្ជមាន ឬSARS-CoV-2 ដែលបានធ្វើយ៉ាងហោចណាស់ ៧២ ម៉ោងមុនពេលចាកចេញពីទីនោះ ហើយពួកគេត្រូវតែដាក់ខ្លួនឱ្យនៅដាច់ពីគេរយៈពេល ៧ ថ្ងៃ នៅមជ្ឈមណ្ឌលដាក់ឱ្យនៅដាច់ដោយឡែកពីគេក្នុងទីក្រុងនោះ។ បន្ទាប់មកត្រូវនៅដាច់ដោយឡែក ៧ ថ្ងៃទៀត ដើម្បីតាមដានសុខភាព។ បញ្ជីឈ្មោះមជ្ឈមណ្ឌលនឹងត្រូវបានប្រកាសលម្អិត ហើយអ្នកដំណើរនឹងត្រូវចំណាយសម្រាប់ថ្លៃសេវាដាក់ឱ្យនៅដាច់ដោយឡែកពីគេ រួមជាមួយថ្លៃធ្វើតេស្តដោយខ្លួនឯងផងដែរ ។
ចំពោះអ្នកដំណើរមកពីទីក្រុង ĐàNẵng នឹងត្រូវបានស្នើសុំឱ្យមានភស្តុតាង នៃការធ្វើតេស្តអវិជ្ជមានផងដែរ ប៉ុន្តែគ្រាន់តែត្រូវនៅដាច់ដោយឡែកពីគេរយៈពេល ៧ ថ្ងៃ ជាមួយនឹងការធ្វើតេស្តរកមេរោគកូវីដ -១៩ លើកទី ១ និងទី ២ នៅថ្ងៃទី ១ដែលជាថ្ងៃមកដល់ និងថ្ងៃទី ៧ ជាថ្ងៃចុងក្រោយនៃការស្នាក់នៅ។
ឧបនាយករដ្ឋមន្ត្រី Lê Văn Thành មានប្រសាសន៍ថា៖ «ការចាប់ផ្តើមជើងហោះហើរឡើងវិញ គឺជាការចាំបាច់នៅក្នុងស្ថានភាពបច្ចុប្បន្ន ដើម្បីស្តារនិងអភិវឌ្ឍន៍សេដ្ឋកិច្ចសង្គម សម្រាប់ក្នុងតំបន់ជាបណ្តើរៗ ដោយធ្វើឱ្យជីវិតរបស់ប្រជាជនវិលត្រឡប់មករកភាពប្រក្រតីវិញ» ។
បើទោះបីជាមានការការពារខ្លាំង និងមានការយកចិត្តទុកដាក់ ពីអាជ្ញាធរមូលដ្ឋានក្តី ខ្លួនឯងក្តី ក៏ជំងឺនេះមិនអាចបំបាត់បានភ្លាមៗនោះទេ ដូចនេះយើងត្រូវមានការប្រុងប្រយ័ត្នឱ្យកាន់តែខ្លាំងកាន់តែល្អ ៕
ចែករំលែកព័តមាននេះ