ប្រុងប្រយ័ត្ន! ទឹកស្ទឹងព្រែកត្នោតកំពុងហក់ឡើងខ្លាំង៤ថ្ងៃមកហើយ
- ភ្នំពេញ
រាជធានីភ្នំពេញ ៖ រយៈពេល៤ថ្ងៃមកនេះ គិតត្រឹមថ្ងៃទី១០ ខែតុលា ឆ្នាំ២០២១ ទឹកស្ទឹងព្រែកត្នោតបានហក់ឡើងយ៉ាងគំហុក និង
រាជធានីភ្នំពេញ ៖ រយៈពេល៤ថ្ងៃកន្លងមកនេះ គិតត្រឹមថ្ងៃទី១០ ខែតុលា ឆ្នាំ២០២១ ទឹកស្ទឹងព្រែកត្នោតបានហក់ឡើងយ៉ាងគំហុក និងបណ្ដាលឲ្យហូរចូលលិចផ្លូវមួយចំនួននៅក្នុងភូមិវាលថ្លាន់ សង្កាត់គងនយ ខណ្ឌដង្កោ រាជធានីភ្នំពេញ រួមទាំងផ្ទះមួយចំនួនទៀត ដែលស្ថិតនៅនៅកៀកជាប់និងមាត់ស្ទឹងនេះផងដែរ។
បើតាមប្រជាពលរដ្ឋដែលរស់នៅជាប់មាត់ស្ទឹងព្រែកត្នោតនេះបាននិយាយថា នៅក្នុងរដូវវស្សាជារៀងរាល់ឆ្នាំឲ្យតែដល់ខែតុលា គឺទឹកស្ទឹងព្រែកត្នោតតែងតែជន់ឡើងយ៉ាងទៀងទាត់ពុំដែលខកខានមួយឆ្នាំណាឡើយ ។ ដោយគ្រាន់តែនៅក្នុងឆ្នាំខ្លះបើមានភ្លៀងធ្លាក់នៅឯក្នុងខេត្តកំពង់ស្ពឺខ្លាំង ទឹកស្ទឹងក៏ជន់ឡើងខ្លាំងរហូតក្លាយជាទឹកជំនន់ ជន់ហូរផ្ដាច់ទំនប់ផ្ដាច់ផ្លូវបណ្ដាលលិចលង់តំបន់នានាមិនខាន ប៉ុន្តែបើពុំសូវមានភ្លៀងធ្លាក់នោះទេគឺមិនអីឡើយនៅក្នុងស្ទឹងប៉ុណ្ណោះ។
តាមប្រភពដដែលបានប្រាប់ឲ្យដឹងបន្តទៀតថា ជាក់ស្ដែងដូចជានៅក្នុងឆ្នាំ២០២០កន្លងទៅជាដើម ដោយសារតែនៅក្នុងខេត្តកំពង់ស្ពឺមានភ្លៀងធ្លាក់ច្រើនរាល់ថ្ងៃបានធ្វើឲ្យទឹកស្ទឹងជន់ខ្លាំងរហូតហូរបុកដាច់ទំនប់សណ្ដរស្ទឹង បណ្ដាលឲ្យលិចលង់លំនៅដ្ឋានរាប់ពាន់ខ្នង រួមជាមួយផ្លូវលេខ២១៧ហៅផ្លូវចំការដូងចាប់ពីស្ពានព្រែកជ្រៃរហូតដល់រង្វង់មូលដីក្រហម ។ ក្រៅពីនេះលិចផ្លូវបេតុង ផ្លូវលំច្រើនខ្សែ ព្រមទាំងរោងចក្រកាត់ដេរ ស្រែស្រូវ និងដំណាំផ្សេងជាច្រើនហិចតា នៅក្នុងសង្កាត់ស្ទើរតែទាំងអស់របស់ខណ្ឌដង្កោ ជាពិសេសនៅសង្កាត់ស្ពានថ្មដែលមានការលិចលង់ខ្លាំងជាងគេ។
តាមប្រភពខាងលើបានបន្តទៀតថា ដោយឡែកនៅក្នុងឆ្នាំ២០២១នេះវិញ ទឹកស្ទឹងព្រែកត្នោតក៏កំពុងតែជន់ឡើងយ៉ាងគំហុករយៈពេល៤ថ្ងៃមកហើយ ដោយបរិមាណទឹកពេញប្រៀបស្ទឹងតែម្ដង ។ មិនតែប៉ុណ្ណោះបានហៀរនិងហូរចូលទៅក្នុងភូមិវាលថ្លាន់ សង្កាត់គងនយខណ្ឌដង្កោ បណ្ដាលឲ្យលិចផ្លូវបេតុងនិងផ្ទះដែលមានសណ្ឋានដីទាបៗថែមទៀតផង ។ ប្រការនេះបានធ្វើឲ្យអ្នកភូមិមានការព្រួយបារម្ភសុវត្ថិភាព របស់ពួកគាត់ ហើយប្រសិនបើទឹកស្ទឹងនៅតែបន្តកើនឡើងមិនឈប់នោះការលិចលង់ភូមិទាំងមូលនិងតំបន់មួយចំនួនទៀតគឺចៀសមិនផុតឡើយ ។ ចំណែកឯផ្ទះដែលស្ថិតនៅជាប់ផ្ទាល់និងមាត់ស្ទឹងវិញទោះជាទឹកតូចឬធំគឺតែងតែលិចលង់មុនគេរហូត ដែលនេះគឺជាទម្លាប់ទៅហើយ វាលែងតែទីតាំងផ្ទះដែលចាក់ដីខ្ពស់ទើបអត់លិច។
ដោយឡែកប្រភពមួយទៀតបាននិយាយថា រយៈពេលពេល៤ថ្ងៃនេះទឹកស្ទឹងពិតជាកើនឡើងច្រើនជាលំដាប់មែន រីឯការជន់លិចផ្លូវនិងផ្ទះមួយចំនួននៅក្នុងភូមិវាលថ្លាន់ សង្កាត់គងនយនោះ។គឺដោយសារតែទឹកហូរពីលើមកខ្លាំង ហើយមកដល់ត្រឹមស្ពានវត្តសាក់សំពៅចាស់ មានកំប្លោកងា.ប់ និងរស់យ៉ាងក្រាស់រមូរផ្ដុំជាប់គ្នាដូចគេគ្រីបយ៉ាងណែន ។ មិនតែប៉ុណ្ណោះកំប្លោកនេះមានទំហំរាប់សិបម៉ែត្រការ៉េ បិទជិតមុខទឹកក្រោមស្ពាននោះតែម្ដង ជាហេតុធ្វើឲ្យទឹកពុំអាចហូររួចឡើយ ហើយក៏បានធ្វើឲ្យទឹក១កំណាត់ស្ទឹងប៉ែកខាងលិចចាល់ទើបហូរចូលភូមិវាលថ្លាន់នេះ។
តាមប្រភពមួយនេះបានបញ្ជាក់បន្ថែមទៀតថា បន្ទាប់មកព្រះសង្ឃគង់នៅវត្តសាក់សំពៅ រួមជាមួយអ្នកភូមិនៅតំបន់នោះបាននាំគ្នាយកចបកាប់ ចបជីក ប៉ែល និងកាំបិតទៅកាត់កំប្លោកជាដុំៗនិងប្រើខ្សែចងរួចយករថយន្តបែនដឹកដីកង់៦ទៅអូសចេញម្ដង១ដុំៗដើម្បីបើកមុខទឹកឲ្យហូរលឿន ។ សកម្មភាពអូសកំប្លោកចេញនេះមានរយៈពេល៣ថ្ងៃកន្លងមកហើយនិង បានបើកមុខទឹកបានធំជាងមុន តែនៅពុំទាន់យកកំប្លោកចេញអស់នៅឡើយទេ គឺនៅសល់ច្រើនម៉ែត្រការ៉េទៀត ។ ដោយយ៉ាងហោចណាស់ក៏ត្រូវប្រើរយៈពេល១ថ្ងៃឬ២ថ្ងៃទៀត ទើបយកកំប្លោកទាំងនោះចេញអស់ពីក្រោមស្ពានចាស់នេះ ។ ប៉ុន្តែគិតត្រឹមថ្ងៃទី១០ ខែតុលា ឆ្នាំ២០២១ ក្រោយយកកំប្លោកចេញបានខ្លះបានធ្វើឲ្យទឹកដែលហូរចូលភូមិវាលថ្លាន់ស្រកបន្តិចវិញហើយ និងអាចស្រកទៅវិញទាំងស្រុង ប្រសិនបើគ្មានភ្លៀងធ្លាក់បន្តទៀតទេនោះ ៕
ចែករំលែកព័តមាននេះ