រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនសង្ស័យម្នាក់ត្រូវបានម្ចាស់ម៉ូតូតាមរកឃើញនៅក្នុងសណ្ឋាគារ និងចាប់ប្រគល់អោយសមត្ថកិច្ចចាត់ការតាមនីតិវិធី ព្រោះជនសង្ស័យរូបនោះបានខ្ចីម៉ូតូមិត្តភ័ក្ដិខ្លួនជិះ និងបានយកទៅបញ្ចាំនៅឃ្លាំងរំសេវបានលុយចំនួន៥០០ដុល្លារ ហើយយកលុយនោះទៅចាយហ៊ីហាលេងល្បែងចាញ់អស់ មិនព្រមយកម៉ូតូមកប្រគល់ជូនជនរងគ្រោះវិញ បង្កការភ្ញាក់ផ្អើលកាលពីវេលាម៉ោង១រំលងអធ្រាត្រឈានចូលថ្ងៃទី៩ ខែតុលា ឆ្នាំ២០២១ នៅក្នុងសណ្ឋាគារ «អង្គរភ្នំមាស 81» កែងផ្លូវ២៥៤ ស្ថិតក្នុងសង្កាត់បឹងរាំង ខណ្ឌដូនពេញ ។
សេចក្តីរាយការណ៍បន្តថា ជនសង្ស័យដែលឃាត់ខ្លួនបានខាងលើនេះ មានឈ្មោះ ឃូ អាយុ៣០ឆ្នាំ មុខរបរ និងស្នាក់នៅមិនពិតប្រាកដ ។
បើតាមប្រភពពីម្ចាស់ម៉ូតូរងគ្រោះបានប្រាប់អោយដឹងខ្លីៗថា មុនកើតហេតុ គឺនៅថ្ងៃទី៦ ខែតុលា វេលាល្ងាចមិនចាំម៉ោង នៅក្រុងតាខ្មៅ ជនសង្ស័យដែលជាមនុស្សទើបនឹងស្គាល់គ្នាមិនសូវច្បាស់បានខ្ចីម៉ូតូខ្លួនម៉ាកហុងដា ស្កុបពី ស៊េរីឆ្នាំ២០២០ ពាក់ស្លាកលេខ កណ្ដាល1AE-7945 ដោយថា ជិះទៅទិញអីមួយភ្លែត ដោយសារតែជឿទុកចិត្តរូបគេក៏អោយខ្ចី ស្រាប់តែជនសង្ស័យរូបនេះបានជិះទៅបាត់ មិនត្រលប់មកវិញ និងទាក់ទងក៏លែងបាន ទើបខ្លួនដឹងថាត្រូវគេបោក ។
ប្រភពដដែលបានបន្តទៀតថា បន្ទាប់ពីកើតហេតុ រូបគេបានទៅដាក់ពាក្យបណ្ដឹងនៅអធិការដ្ឋានក្រុងតាខ្មៅ និងបានតាមរកជនសង្ស័យតាមរយៈអ្នកស្គាល់ រហូតរកឃើញនៅសណ្ឋាគារកើតហេតុខាងលើ ។ ពេលនោះដែរ ជនរងគ្រោះក៏ចូលទៅដល់បន្ទប់ជនសង្ស័យស្នាក់នៅ ស្រាប់តែជនសង្ស័យរូបនេះបានស្ទុះមកវាយពួកគាត់ទាំងកំរោល និងបានស្រែកថាអោយជនរងគ្រោះថា ជាចោរថែមទៀត ដោយអត់ទ្រាំមិនបាន ពួកគាត់ក៏តដៃទៅវិញ បណ្តាលឲ្យជនសង្ស័យរូបនេះរបួសបែកមុខបែកមាត់តែម្តង ។
បន្ទាប់ពីឃាត់ខ្លួនបាន ជនសង្ស័យបានសារភាពថា ម៉ូតូនោះរូបគេពិតជាបានខ្ចីពីជនរងគ្រោះពិតប្រាកដមែន ហើយម៉ូតូនោះរូបគេបានយកទៅដាក់បញ្ចាំបាត់នៅឃ្លាំងរំសេវបានលុយចំនួន៥០០ដុល្លារ និងយកលុយនោះទៅចាយហ៊ីហា ព្រមទាំងសងគេខ្លះ ហើយសល់ប៉ុន្មានគឺចាញ់ល្បែងអនឡាញអស់ហើយ។
ក្រោយពេលឃាត់ខ្លួន ជនសង្ស័យត្រូវបានជនរងគ្រោះនាំខ្លួនទៅកាន់អធិកាដ្ឋាក្រុងតាខ្មៅវិញ រួចប្រគល់អោយសមត្ថកិច្ចចាត់ការតាមនីតិវិធី ៕
ចែករំលែកព័តមាននេះ