ខេត្តប៉ៃលិន ៖ ម្ចាស់ស្ថានីយប្រេងឥន្ធនៈមួយកន្លែងបានប្រើកម្មករកាប់រំលំដើមឈើ (អាកាស្យា) ចំនួន២ដើម នៅក្បែរចិញ្ចើមផ្លូវ ខាងមុខស្ថានីយរបស់ខ្លួនដែលអាជ្ញាធរខេត្តខិតខំដាំថែទាំរហូតដល់ធំសម្រាប់ជាម្លប់ និងលំអតាមដងផ្លូវសាធារណៈ លុះនាំគ្នាកាប់មិនបានសុំច្បាប់ពីអាជ្ញាធរមូលដ្ឋាន ត្រូវបានខាងជំនាញរដ្ឋបាលព្រៃឈើធ្វើការផាកពិន័យចំនួន៧លានរៀល និងឱ្យដាំសារជាថ្មីឡើងវិញ ។
រហូតមកដល់ថ្ងៃទី០៨ ខែតុលា ឆ្នាំ២០២១ គណ:កម្មការស្រុក ដឹកនាំដោយលោក សំ សារ៉ែត អភិបាលស្រុកសាលាក្រៅបានចុះសម្របសម្រួល និងដោះស្រាយបញ្ហាខាងលើ ។
បើតាមប្រភពព័ត៌មានពីលោក សំ សារ៉េត អភិបាលស្រុកសាលាក្រៅ បានឱ្យដឹង កាលពីរសៀលថ្ងៃទី០៩ ខែតុលា ឆ្នាំ២០២១នេះថា ៖ ពាក់ព័ន្ធនឹងការកាប់ដើមឈើដែលអាជ្ញាធរខេត្តបានដាំនៅលើដងផ្លូវ ហើយត្រូវបានប្រជាពលរដ្ឋនាំគ្នាកាប់ដោយគ្មានច្បាប់អនុញ្ញាត ក៏មានសារព័ត៌មានមួយចំនួនបានចុះផ្សាយនោះ តាមពិតទៅដើមឈើទាំងអស់នោះកើតឡើងដោយសារតែការអភិវឌ្ឍ ស្នាដៃដ៏ធំធេងរបស់ឯកឧត្តម អ៊ី ឈាន ដែលលោកបានបង្កើតបានជាផ្លូវ ហើយដាំដើមឈើទុកឱ្យប្រជាពលរដ្ឋថែ ដើម្បីបង្កើតបានជាអនុស្សាវរីយ៍ ពេលឯកឧត្តមឡើងកាន់ជាអភិបាលខេត្តប៉ៃលិន ដើម្បីលំអដងផ្លូវសាធារណៈមិនមែនចេះតែដុះខ្លួនឯងនោះទេ ។
លោកបន្តទៀតថា ប្រជាពលរដ្ឋជាម្ចាស់ស្ថានីយប្រេងឥន្ធន:ដែលលួចកាប់ដើមឈើនេះ មិនបានជម្រាប ឬសុំច្បាប់ទៅអាជ្ញាធរមូលដ្ឋាននោះឡើយ ដោយពីមុនធ្លាប់ទៅសុំខាងស្រុកម្តងពីបញ្ហាកាប់ដើមឈើចំនួន៥ដើម ដើម្បីមានផ្លូវចូលទៅក្នុងស្ថានីយប្រេងរបស់ខ្លួន ។ តែមិនអនុញ្ញាតឱ្យគាត់កាប់នោះឡើយ ទាល់តែសុំច្បាប់ទៅខាងផ្នែករដ្ឋបាលព្រៃឈើ ហើយក៏បានប្រាប់ឱ្យគាត់ស្តាប់តាមអាជ្ញាធរស្រុកខេត្ត ដើម្បីឱ្យគណ:កម្មការចំរុះដែលគ្រប់គ្រងសម្បត្តិរដ្ឋ ចុះទៅវាយតម្លៃលើការប៉ះពាល់ ឬខូចខាតនៅកន្លែងរបស់ខ្លួន ។
លោកបញ្ជាក់ទៀតថា ការកាប់ដើមឈើនេះមិនមែន២ដើមនោះទេ គឺលួចកាប់រហូតដល់ទៅ៤ដើម រួចមកហើយ ដោយជាក់ស្តែង ខណ:ដែលគាត់បន្តកាប់ពីរដើមទៀត គឺលួចកាត់ដោយខាងអាជ្ញាធរតាមទាន់ ព្រោះកន្លែងចូលទៅក្នុងស្ថានីយរបស់គាត់ អត់មានផ្លូវនោះទេ ។
ការកាប់ដើមឈើដែលអាជ្ញាធរខេត្តបានដាំនៅក្បែរចិញ្ចើមផ្លូវនេះ ទោះបីជារស់ ឬងាប់ក៏ដោយមិនអាចប្រជាពលរដ្ឋកាប់ដោយខ្លួនឯងបានឡើយ ។
ម្យ៉ាងវិញទៀត ដើមឈើទាំងនេះ មិនមែនងាប់នោះទេ គឺនៅស្រស់ញញឹមតែម្តង ដោយគាត់ឱ្យគេកាប់ទាំងបំពានតែម្តង ។ មួយវិញទៀត រឿងនេះមើលទៅតូចតាចទេ បើសិនជាអ្នកដែលលួចកាប់ដើមឈើខាងលើនេះហ៊ានសុំទោសទទួលយកការផាកពិន័យតិចតូចពីខាងរដ្ឋបាលព្រៃឈើនោះជាការស្រេច ។
ពាក់ព័ន្ធទៅនឹងបញ្ហានេះ លោក អោម វីរ: នាយខណ្ឌរដ្ឋបាលព្រៃឈើប៉ៃលិនបានឱ្យដឹងថា ៖ ខាងលោកពិន័យចំពោះប្រជាពលរដ្ឋ ដែលលួចកាប់ព្រៃឈើ ដែលអាជ្ញាធរខេត្តខិតខំដាំលំអនៅលើចិញ្ចើមផ្លូវសាធារណ:ទៅតាមផ្លូវច្បាប់ ហើយនឹងហៅម្ចាស់ស្ថានីយប្រេងឥន្ធន:ខាងលើទៅជួបសួរនាំបន្ថែម ។
តែបើចរចាគ្នាមិនត្រូវទេ ពោល គឺម្ចាស់កន្លែងខាងលើមិនព្រមបង់ថ្លៃផាកពិន័យខាងលោកនឹងរៀបចំសំណុំរឿងបញ្ជូនទៅតុលាការ ៕
ចែករំលែកព័តមាននេះ