ខេត្តកំពង់ស្ពឺ ៖ យុវជនម្នាក់ក្នុងចំណោមបក្សពួក៣នាក់ ត្រូវបានកម្លាំងនគរបាលធ្វើការឃាត់ខ្លួនបញ្ជូនមកកាន់អធិការដ្ឋាននគរបាលស្រុកបសេដ្ឋ ក្រោយធ្វើសកម្មភាពស្ទាក់ប្លន់យកម៉ូតូពីយុវជនម្នាក់ទៀតបានសម្រេច។ ករណីឃាត់ខ្លួន ធ្វើឡើងនៅម៉ោង២និង៣០នាទីទៀបភ្លឺថ្ងៃទី៩ ខែតុលា ឆ្នាំ២០២១ លើកំណាត់ផ្លូវក្រាលកៅស៊ូក្នុងភូមិពពូល…
ខេត្តកំពង់ស្ពឺ ៖ យុវជនម្នាក់ក្នុងចំណោមបក្សពួក៣នាក់ ត្រូវបានកម្លាំងនគរបាលធ្វើការឃាត់ខ្លួនបញ្ជូនមកកាន់អធិការដ្ឋាននគរបាលស្រុកបសេដ្ឋ ក្រោយធ្វើសកម្មភាពស្ទាក់ប្លន់យកម៉ូតូពីយុវជនម្នាក់ទៀតបានសម្រេច។ ករណីឃាត់ខ្លួន ធ្វើឡើងនៅម៉ោង២និង៣០នាទីទៀបភ្លឺថ្ងៃទី៩ ខែតុលា ឆ្នាំ២០២១ លើកំណាត់ផ្លូវក្រាលកៅស៊ូក្នុងភូមិពពូល ឃុំស្វាយចចិប ស្រុកបសេដ្ឋ ខេត្តកំពង់ស្ពឺ ។
យោងតាមរបាយការណ៍របស់នគរបាលស្រុកបសេដ្ឋបានឱ្យដឹងថា ជនសង្ស័យដែលឃាត់ខ្លួនឈ្មោះ សាន ម៉េងហ័ង អាយុ១៩ឆ្នាំ រស់នៅក្នុងភូមិសិរីអណ្តែត ឃុំនិទាន ស្រុកបសេដ្ឋ ខេត្តកំពង់ស្ពឺ ។ រីឯបក្សពួកពីរនាក់ផ្សេងទៀតដែលបានគេចខ្លួនបាត់មានឈ្មោះ ១- ស៊ឹម រស្មី អាយុ២១ឆ្នាំ រស់នៅជាមួយជនសង្ស័យខាងលើ និង ២- ឈ្មោះ វិន អាយុ២៥ឆ្នាំ មិនស្គាល់ទីលំនៅ។
នៅចំពោះមុខសមត្ថកិច្ច ជនសង្ស័យឈ្មោះ សាន ម៉េងហ័ង បានរៀបរាប់ឱ្យដឹងថា រូបគេនិងបក្សពួកប្រដាប់ដោយកាំភ្លើងខ្លីមួយដើមបានជិះម៉ូតូមួយគ្រឿងម៉ាក់ប៊ីត ពណ៌ខៀវលាយស ពាក់ស្លាក់លេខ ១R-៣៨១៥ ទៅចំណុចខាងលើរងចាំស្ទាក់ប្លន់។ គ្រានោះក៏បានធ្វើសកម្មភាពភ្ជង់ប្លន់យុវជនម្នាក់ដែលជិះម៉ូតូឌុបគ្នា យកបានម៉ូតូសង់ពណ៌ក្រហមមួយគ្រឿង ឆ្នាំ២០២០ បិទតែមឡើងស៊េរីឆ្នាំ២០២១ ជិះគេចខ្លួនតែត្រូវកម្លាំងនគរបាលស្ទាក់ចាប់តែម្តង ។
របាយការណ៍បានបញ្ជាក់ថា ជនរងគ្រោះមានឈ្មោះ យឺន កាលីន ភេទប្រុស អាយុ១៧ឆ្នាំ រស់នៅភូមិត្នោត ឃុំទួលសាលា ស្រុកបសេដ្ឋ ជិះឌុបគ្នាជាមួយឈ្មោះ សុខ ម៉ែន ភេទប្រុស អាយុ២៣ឆ្នាំ រស់នៅភូមិស្វាយរំពារ ឃុំទួលសាលា ស្រុកបសេដ្ឋ ។ ក្រោយស្ទាក់ចាប់កម្លាំងជំនាញបានឃាត់ខ្លួនយុវជនម្នាក់ដកហូតបានអាវុធខ្លីកែច្នៃមួយដើម និងមធ្យោបាយធ្វើសកម្មភាពម៉ូតូប៊ីតមួយគ្រឿង ។ ក្នុងប្រតិបត្តិការស្ទាក់ចាប់នោះដែរកម្លាំងនគរបាលស្រុកក៏បានដកហូតម៉ូតូជនរងគ្រោះម៉ាកហុងដាC១២៥ពណ៌ក្រហមពាក់ស្លាកលេខ១ID ៧១៧៩ ត្រលប់មកវិញផងដែរ។
បច្ចុប្បន្ន ជនសង្ស័យកំពុងស្ថិតក្រោមការសាកសួរពីមន្ត្រីនគរបាលជំនាញនៃអធិការដ្ឋានស្រុកបសេដ្ឋដើម្បីកសាងសំណុំរឿងបន្តនីតិវិធី រីឯម៉ូតូជនរងគ្រោះក៏បានធ្វើប្រគល់ជូនជនរងគ្រោះវិញហើយដែរ។
ចែករំលែកព័តមាននេះ