រាជធានីភ្នំពេញ ៖ កំដៅបានចាប់ផ្តើមផ្ទុះតាមបណ្តាញសង្គមហ្វេសប៊ុក បន្ទាប់ពីអ្នកនាង សឿ សុធារ៉ា និងអ្នកនាង ខ្ញុង បានធ្វើការផ្លោងពាក្យសំដីដាក់គ្នាពាក់ព័ន្ធទៅនឹងរឿងលុយតុងទីន។ អ្នកនាង សឿ សុធារ៉ា បានសម្តែងការមិនសប្បាយចិត្ត បន្ទាប់ពីកូនតុងទីនរបស់នាងមួយចំនួនបានបង្ហោះពាក្យពេចន៍វាយប្រហារមួយចំនួនមកលើរូបនាង ដែលបានជំពាក់លុយតុងទីន ដែលមិនទាន់បានដោះស្រាយអស់។
យ៉ាងណា បន្ទាប់ពីតារារូបនេះបានចេញមុខដោះស្រាយអោយកូនតុងទីនរបស់នាងជាបន្តបន្ទាប់ហើយ សឿ សុធារ៉ា ក៏បានបញ្ចេញឈ្មោះតារា២រូបដែលនៅជំពាក់លុយតុងទីននាងដូចគ្នា។ អ្នកនាង សឿ សុធារ៉ា បានបង្ហាញមុខកូនតុងទីន២នាក់ គឺ នាង ខ្ញុង និង ស្រី អយ ដែលជំពាក់លុយនាងមិនព្រមសង ហើយធ្វើអោយនាងរងគ្រោះ។
អ្នកនាង សឿ សុធារ៉ា បានបង្ហោះសារថា បងប្អូនបានដឹងរួចមកហើយថា មានសារព័ត៌មានបានចុះផ្សាយជាហូរហែអំពីនាងខ្ញុំ ពីរឿងដែលនាងបានជំពាក់លុយគេមិនសង ក្នុងរឿងការលេងតុងទីន «ដើម្បីបង្វឹលលុយទៅអោយគ្នាទៅវិញ ទៅមក»។
នាងបញ្ជាក់ថា ទឹកប្រាក់ត្រឹមតែ 844$ តែប៉ុណ្ណោះ គេមិនទុកមុខអោយនាងខ្ញុំដែលកំពុងរងគ្រោះដោយសារតែកូនៗដេញយកលុយទៅបាត់ រួចមិនព្រមសងមកវិញ ដោយគ្មានទំនួលខុសត្រូវ រហូតធ្វើអោយគេចុះផ្សាយអំពីនាងខ្ញុំទាល់តែបាន ដែលនាងខ្ញុំកំពុងតែទទួលខុសត្រូវហើយ។
នាងថា បើនាងខ្ញុំបានជាជ្រុលប្រឡាក់ទៅហើយ អ្នកដែលជំពាក់នាងខ្ញុំក៏ត្រូវតែប្រឡាក់ជាមួយនឹងនាងខ្ញុំដែរ។ ថ្ងៃនេះ សូមបង្ហាញមុខកូនតុងទីនខ្ញុំ២នាក់ ដែលជំពាក់លុយនាងខ្ញុំមិនព្រមសង ហើយធ្វើអោយនាងខ្ញុំរងគ្រោះដោយសារតែពួកគាត់ រហូតយកប្លង់ផ្ទះដែលជាជម្រកចុងក្រោយរបស់នាងខ្ញុំទុកសម្រាប់កូនៗនាងខ្ញុំបានជ្រកនោះ យកទៅបញ្ចាំ ដើម្បីបំពេញទំនួលខុសត្រូវទៅអោយកូនៗផ្សេងៗដទៃទៀត ដើម្បីកុំអោយមានបញ្ហាចោទប្រកាន់ណាមួយឡើង។
តារាសម្តែងរូបនេះ រាយនាមកូនតុងទីនដូចខាងក្រោម ៖ ទី១- ឈ្មោះ អ្នកនាង ស្រេង សុកាន់ដា (ហៅស្រីញ៉ុង) តារាកំប្លែង ជំពាក់នូវទឹកប្រាក់នាងខ្ញុំចំនួន 10860$ គិតត្រឹមថ្ងៃទី២៨ ខែសីហា ឆ្នាំ២០២១ មកទល់នឹងថ្ងៃនេះ គាត់មិនព្រមសងប្រាក់នាងខ្ញុំទេ ដោយអោយនាងខ្ញុំទទួលខុសត្រូវបង់ប្រាក់ជំនួសគាត់ក្នុងមួយថ្ងៃ220$ រហូតចប់តុងទីននាងខ្ញុំ40ថ្ងៃទៀត… ។ បញ្ជាក់ ៖ (តុងទីនក្បាល20$ គាត់លេង11ក្បាលងា.ប់ទាំងអស់)។ ទី២- ឈ្មោះ អ្នកនាង ជួន ចាន់រតន (ហៅស្រីអយ) អតីតតារាកំប្លែង ជំពាក់នូវទឹកប្រាក់នាងខ្ញុំចំនួន 9520$ គិតត្រឹមថ្ងៃទី២៧ ខែសីហា ឆ្នាំ២០២១ មកទល់នឹងថ្ងៃនេះ គឺគាត់មិនព្រមសងប្រាក់នាងខ្ញុំទេ ដោយអោយនាងខ្ញុំទទួលខុសត្រូវបង់ប្រាក់ជំនួសគាត់ក្នុងមួយថ្ងៃ173$ រហូតចប់តុងទីននាងខ្ញុំចំនួន40ថ្ងៃទៀត…។ បញ្ជាក់ ៖ (តុងទីនក្បាល20$ គាត់លេង7ក្បាលងា.ប់5 រស់2)។
អ្នកនាងសុធារ៉ា បញ្ជាក់ទៀតថា «ខ្ញុំថែមទាំងចេញលុយជំនួសគាត់500$ ចំនួន37សប្តាហ៍ទៀត ដែលគាត់បានលេងតុងទីនជាមួយនាងខ្ញុំមួយខ្សែទៀត គឺក្បាល100$ »។ សេចក្តីដូចបានគោរពជម្រាបជូនខាងលើ សូមអ្នកនាងទាំង២ មេត្តាយកលុយមកសងនាងខ្ញុំផង ដើម្បីខ្ញុំយកលុយហ្នឹងទៅអោយកូនៗដែលគេរងគ្រោះដោយសារតែអ្នក។
ជាការកត់សម្គាល់ បន្ទាប់ពីបានបង្ហោះសារខាងលើនេះ មិនបានប៉ុន្មានម៉ោងផង គណនេយ្យហ្វេសប៊ុករបស់អ្នកនាង សឿ សុធារ៉ា ក៏ត្រូវបានលុបសារនេះចេញវិញ។ យ៉ាងណា ក្រោយការទទួលដឹងពីការបង្ហោះសារពីអ្នកនាង សឿ សុធារ៉ា នាពេលនេះ តារាកំប្លែងអ្នកនាង ខ្ញុង ក៏បានធ្វើការបង្ហោះដៀមដាមទៅវិញជាបន្តបន្ទាប់ផងដែរ។
ក្នុងសារមួយ អ្នកនាង ខ្ញុង បានបង្ហោះថា «មានបងប្អូនខ្លះមិនទាន់ដឹងរឿងច្បាស់ កុំប្រញាប់វិនិច្ឆ័យទាំងងងឹតងងុល ព្រោះអាចនាំអោយអ្នកមានវិប្បដិសារីនៅថ្ងៃក្រោយ ដោយសារតែការគិតអគតិ ដោយសារតែអណ្ដាតអត់ឆ្អឹង និងមាត់អត់គំរបរបស់អ្នក»។
សារខាងលើនេះ ក៏ត្រូវបានអ្នកនាង សឿ សុធារ៉ា ចែកចាយបន្ត (Share) ជាមួយនឹងការភ្ជាប់សារខ្លីមួយវិញថា «សងលុយខ្ញុំមក ទំហំលុយ ថ្ងៃខែជំពាក់ខ្ញុំ»។ ការភ្ជាប់សារនេះ គេក៏បានឃើញអ្នកនាង ខ្ញុង បានចូលទៅធ្វើការខំមិនក្រោមវិញថា «ចេញមុខមក កុំលាក់ខ្លួនអញ្ចឹងធារ៉ា ចេញមកដោះស្រាយជាមួយខ្ញុំ បញ្ជាក់ឱ្យច្បាស់អ្នកណាជំពាក់អ្នកណា»។
ដោយឡែកពាក់ព័ន្ធបញ្ហាខាងលើនេះ អ្នកនាង ស្រេង សុកាន់ដា ហៅខ្ញុង បានអះអាងប្រាប់កោះសន្តិភាពតាមសារអេឡិចត្រូនិចដោយខ្លីថា «រឿងខ្ញុំអោយគាត់ (សឿ សុធារ៉ា ) ផុសតាមដំណើរ និងអស់ចិត្តគាត់ចុះ ព្រោះភ្ជុំហើយខ្ញុំចាប់ផ្តើមធ្វើការងារនេះ ហើយខ្ញុំសុំមិនបកស្រាយអ្វីឡើយ គឺទុកអោយច្បាប់ជាអ្នកចាត់ចែង»។ នាងបញ្ជាក់ថា »ខ្ញុំបានដោះស្រាយរឿងនឹងរួចរាល់ហើយ បើគាត់នៅតែផុសចឹងទៀតចឹង ចឹងអ្វីដែលគាត់បានធ្វើនេះ គឺពីបទបរិហារកេរ្តិ៍ ចឹងខ្ញុំកំពុងដាក់ពាក្យបណ្តឹងទៅវិញ»៕
ចែករំលែកព័តមាននេះ