ព្រៃវែង៖ បើទោះបីជាជំងឺកូវីដ១៩ កាចសាហាវខ្លាំង ហើយកំពុងឆ្លងរាតត្បាតច្រើនក៏ដោយ ប៉ុន្តែគេសង្កេតឃើញថា ប្រជាពលរដ្ឋច្រើនកោះករ ទៅលេងនៅទំនប់បង្ហៀរបឹងស្នេហ៍ ក្នុងខេត្តព្រៃវែង អំឡុងពេលបុណ្យភ្ជុំបិណ្ឌ។ អ្នកទាំងនោះ ក៏ហាក់ដូចជាភ្លេចខ្លួន ហើយពុំសូវចូលរួមការពារទប់ស្កាត់កូវីដ១៩ តាមវិធានសុខាភិបាលប៉ុន្មាននោះទេ ជាពិសេសគឺប្រមូលផ្តុំគ្នាផឹកស៊ីយ៉ាងសប្បាយ មិនខុសពីទិដ្ឋភាពនៅទំនប់ទឹកអន្លង់ជ្រៃ ក្នុងខេត្តត្បូងឃ្មុំប៉ុន្មានឡើយ។
នៅក្នុងរយៈពេល ៣ថ្ងៃ នៃឱកាសបុណ្យភ្ជំបិណ្ឌ គឺនៅថ្ងៃទី៥-៧ ខែតុលានេះ គេឃើញនៅចំណុចទំនប់បង្ហៀរបឹងស្នេហ៍ ក្នុងឃុំធាយ ស្រុកបាភ្នំ ខេត្តព្រៃវែង មានភ្ញៀវទេសចរជាតិ ប្រមាណជាង ១ម៉ឺននាក់ បាននាំគ្នា ទៅមុជទឹកលេងកម្សាន្ដ និងជួបជុំផឹកស៊ីយ៉ាងគគ្រឹកគគ្រេង ដោយគ្មានការរក្សាគម្លាត ឬពាក់ម៉ាសទេ។ ករណីនេះ ធ្វើឲ្យមានមតិខ្លះ បានលើកឡើងទាំងព្រួយបារម្ភថា ភ្ជុំរួច មិនដឹងមានអ្នកឆ្លងជំងឺកូវីត១៩ ប៉ុន្មានពាន់នាក់នោះទេ។
លោក ហាក់ វង្ស មេឃុំធាយ បានឲ្យដឹងថា ដើម្បីទប់ស្កាត់ការឆ្លងរាលដាលជំងឺកូវីត១៩ អាជ្ញាធរស្រុក បានដាក់ផែនការ និងមន្ត្រីជំនាញ ចុះមកធ្វើការអប់រំណែនាំដល់ក្រុមអាជីវករ ក៏ដូចជាភ្ញៀវទេសចរទាំងអស់ ឲ្យចួលរួមអនុវត្តតាមវិធានការសុខាភិបាល និងហាមជួបជុំផឹកស៊ី។ ប៉ុន្ដែជាក់ស្ដែង ក្រុមភ្ញៀវទេសចរទាំងអស់ គឺមិនបានសហការ និងចូលរួមអនុវត្តតាមវិធានសុខាភិបាលនោះទេ ជាហេតុធ្វើឲ្យខាងអាជ្ញាធរ មានការព្រួយបារម្ភជាខ្លាំង។ ប៉ុន្ដែទោះជាយ៉ាងនេះក្ដី រយៈពេលប៉ុន្មានថ្ងៃមកនេះ យើងអាចការពារសន្ដិសុខ និងសណ្តាប់ធ្នាប់បានយ៉ាងល្អប្រសើរ។
សូមរម្លឹកថា ដោយសារតែអ្នកទៅលេងច្រើន ហើយមិនសហការ ដោយមិនពាក់ម៉ាស និងមិនរក្សាគម្លាតសុវត្ថិភាពឲ្យបានត្រឹមត្រូវ អាជ្ញាធរសមត្ថកិច្ច កាលពីថ្ងៃទី៦ ខែតុលា បានសម្រេចបិទជាបណ្តោះអាសន្ន មិនឲ្យមានអ្នកចូលលេងទៀតទេ នៅទំនប់ទឹកអន្លង់ជ្រៃ ស្ថិតក្នុងខេត្តត្បូងឃ្មុំ។ រូបភាពយុវវ័យទៅលេងទឹក រហូតដល់កកុញ ប្រជ្រៀតគ្នា នៅទំនប់ទឹកអន្លង់ជ្រៃ ក្នុងថ្ងៃបុណ្យភ្ជុំបិណ្ឌ គឺមិនខុសពីទិដ្ឋភាពនៅទំនប់បង្ហៀរបឹងស្នេហ៍ ក្នុងខេត្តព្រៃវែងប៉ុន្មានឡើយ៕
ចែករំលែកព័តមាននេះ