រាជធានីភ្នំពេញ៖ បន្ទប់ផ្ទះល្វែងមួយកន្លែង បានឆ្លងចរន្តអគ្គិសនីនៅម៉ាស៊ីនត្រជាក់ ក្លាយជាអគ្គិភ័យ ឆាបឆេះផ្អែងហុយទ្រលោម បណ្តាលអោយខូចខាតសម្ភារៈ នៅខាងក្នុងទាំងស្រុង។ ហេតុការណ៍នេះ បង្កអោយមានការភ្ញាក់ផ្អើល កាលពីវេលាម៉ោងប្រមាណ ១រសៀលថ្ងៃទី៧ ខែតុលា ឆ្នាំ២០២១ នៅផ្ទះលេខ៥១៥F ផ្លូវ៩៩R ភូមិទួលសង្កែ សង្កាត់ទួលសង្កែ១ ខណ្ឌឬស្សីកែវ រាជធានីភ្នំពេញ។
អ្នករស់នៅក្បែរខាង បានអោយដឹងថា នៅមុនពេលកើតហេតុ គេឃើញផ្សែងហុយ ខ្មួលខ្មាញ់ពីផ្ទះមួយខ្នងខាងលើ បង្កអោយមានការភ្ញាក់ផ្អើល ដល់អ្នកជិតខាង និងសមត្ថកិច្ច នាំគ្នា ជួយយកបំពង់ពន្លត់អគ្គិភ័យ បាញ់ពន្លត់ និងទាក់ទងហៅរថយន្តពន្លត់អគ្គិភ័យ ចំនួន ៣គ្រឿង ទៅអន្តរាគមន៍ ហើយបាញ់អស់ ១គ្រឿង ទើបរលត់។
នគរបាលការិយាល័យបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ បានអោយដឹងថា អគ្គិភ័យនេះ បណ្តាលមកពីឆ្លងចរន្តអគ្គិសនីម៉ាស៊ីនត្រជាក់ បានឆេះរាលដាលទៅពូក និងសម្ភារៈ នៅក្នុងបន្ទប់ដេក អស់ទាំងស្រុង។ នៅក្នុងហេតុការណ៍នេះ ពុំបណ្តាលអោយឆេះរាលដាលទៅលំនៅឋានផ្សេងទៀត និងពុំមានអ្នករងរបួសឡើយ៕ ម៉េង ធា
ចែករំលែកព័តមាននេះ