ខេត្តកំពង់ស្ពឺ ៖ មានជនសង្ស័យមួយក្រុម ប្រដាប់ដោយអាវុធខ្លីមួយដើមមិនស្គាល់ម៉ាក បានបាញ់ប្រហារទៅលើគូបក្សដិបក្ស បណ្ដាលឲ្យរងរបួសជាទម្ងន់ ក្រោយពេលបង្ករួច ក្រុមជនសង្ស័យនាំគ្នារត់គេចខ្លួនបាត់អស់ បន្សល់តែរថយន្តមួយគ្រឿងនិងស្បែកជើងពីរគូនៅនឹងកន្លែងកើតហេតុ ។ ហើយករណីទំនាស់នេះ ត្រូវបានគេបង្ហើបថា បណ្ដាលមកពីរឿងកាយពំនូកដីនៅមុខផ្ទះ ។
ហេតុការណ៍បាញ់ប្រហារនេះ កើតឡើងកាលពីវេលាម៉ោង២០និង១០នាទីយប់ថ្ងៃទី០៣ តុលា ២០២១ ស្ថិតនៅចំណុចភូមិសាយ៉ាវ ឃុំព្រះនិព្វាន ស្រុកគងពិសី ខេត្តកំពង់ស្ពឺ ។ ប្រភពពីសមត្ថកិច្ចមូលដ្ឋានបានបញ្ជាក់ប្រាប់ថា ហេតុការណ៍នេះ បង្កឡើងដោយជនមិនស្គាល់អត្តសញ្ញាណមួយក្រុម ជាបក្សពួករបស់ម្ចាស់ផ្ទះឈ្មោះ ហួត អុីសារី (ប្តី ប្រពន្ធ) មានទំនាស់ជាមួយឈ្មោះម៉ាក ម៉េតដែលនៅផ្ទះជិតគ្នា ដែលទំនាស់នេះបណ្ដាលមកវារឿងកាយដីនៅមុខផ្ទះរៀងរៀងខ្លួន។
ក្រោយពីមានទំនាស់ភាគីហួត អ៊ីសារី និងភាគីជនរងគ្រោះបានឈ្លោះទាស់ទែងប្រវាយប្រតប់ដេញវៃគ្នាទៅវិញទៅមក បង្កឲ្យមានការភ្ញាក់ផ្អើលដល់អ្នកជិតខាង និងសមត្ថកិច្ចតែដោយសារតែការចង់ឈ្នះចង់ចាញ់ ភាគីបង្កបានហៅបក្សពួករបស់ខ្លួនជិះរថយន្តមួយគ្រឿងពេលមកដល់ជនសង្ស័យម្នាក់បានបកអាវុធខ្លីមិនស្គាល់ម៉ាកធ្វើការបាញ់ប្រហារទៅលើភាគីជនរងគ្រោះចំនួន 4 គ្រាប់ ចំទៅលើជនរងគ្រោះឈ្មោះ ម៉ាក់ ម៉េត ភេទប្រុស អាយុ២៥ឆ្នាំ នៅភូមិសាយ៉ាវ ឃុំព្រះនិព្វាន ស្រុកគងពិសី ខេត្តកំពង់ស្ពឺ បណ្តាលអោយរងរបួសធ្ងន់ត្រង់ចង្កេះ ។ ប្រភពបន្តថា ក្រោយកើតហេតុជនរងគ្រោះ ត្រូវបានក្រុមគ្រួសារបញ្ជូនទៅពេទ្យលោក
សង្ឃភ្នំពេញទាំងយប់។នៅកន្លែងកើតហេតុបន្សល់ទុក ស្បែកជើងចំនួន២គូ មួក១ ពណ៌ខ្មៅ(របស់ជនសង្ស័យ) និងកាំបិតប៉័ងតោ១ (របស់ជនរងគ្រោះ)។
នៅព្រឹកថ្ងៃទី០៤ តុលានេះ សមត្ថកិច្ចបានចុះទៅធ្វើការស្រាវជ្រាវដើម្បីសាកសួរព័ត៌មានពីម្ចាស់ផ្ទះ តែពុំមាននរណានៅផ្ទះនោះទេ
(ផ្ទះជនសង្ស័យបានចាក់សោរត់គេចខ្លួនអស់បន្សល់ទុកនៅរថយន្ត១គ្រឿង ម៉ាក់ កាម៉ារី ពណ៍ស ពាក់ផ្លាកលេខ កំពង់ឆ្នាំង2C 3669 ជារបស់ជនសង្ស័យ )គឺរត់គេចខ្លួនបាត់ស្រមោលតែម្តង។
បច្ចុប្បន្ន វត្ថុតាងនៅនឹងកន្លែងកើតហេតុសមត្ថកិច្ចរកឃើញសំបកគ្រាប់ចំនួន៤ និងរថយន្តរបស់ជនសង្ស័យដែលជាមធ្យោបាយជិះមកធ្វើសកម្មភាព ហើយត្រូវបាននាំយកទៅរក្សាទុកនៅអធិការរដ្ឋាននគរបាលស្រុកគងពិសី ដើម្បីស្រាវជ្រាវរកម្ចាស់រថយន្តបង្កនិងជាជនដៃដល់ដែលបានធ្វើការបាញ់ប្រហារមកលើជនរងគ្រោះដោយគ្មានញញើតដៃ។ បើតាមប្រជាពលរដ្ឋដែលរស់នៅជិតកន្លែងកើតហេតុនិយាយខុសគ្នាថា ជនបង្កអាចជាទាហាន ឬប៉ូលិសខ្លះទៀតថា ជាសន្តិសុខដែលទើបនឹងចូលធ្វើការហើយត្រូវជាមិត្តភក្កិរបស់ម្ចាស់ផ្ទះ(រត់គេចខ្លួនជាមួយគ្នា)នៅពេលដែលឃើញមិត្តភក្តិរបស់គេមានបញ្ហាក៏ចេញមុខអន្តរាគមន៍ ហើយបាញ់ប្រហារទៅលើភាគីជម្លោះរបស់មិត្តភក្តិរបស់គេតែម្តង។
រីឯអ្នកខ្លះទៀតនិយាយថា ជនបង្កមិនមែនជាមិត្តភក្កិនោះទេ គឺជាសាច់ញាតិផ្ទាល់របស់ម្ចាស់ផ្ទះដែលមានជម្លោះជាមួយភាគីរងគ្រោះដែលទំនងម្ចាស់ផ្ទះតេហៅអោយមកជួយពេលមកដល់ដោយអាងថាខ្លួនមានអាវុធនិងចង់អោយអ្នកភូមិដឹងថា គេមានអំណាចក៏តាំងមកបញ្ចេញអំនាចដោយប្រើប្រាស់អាវុធបាញ់ប្រហារក្នុងន័យចង់ឱ្យអ្នកស្រុកអ្នកភូមិដឹងថា គេធ្វើជាទាហានមានកាំភ្លើង គឺមានអំណាចអញ្ចឹង ។
ដោយឡែក សមត្ថកិច្ចនគរបាលបច្ចេកទេសនិងកោសល្យវិច័យនៃស្នងការដ្ឋាននគរបាលខេត្តមិនទាន់បញ្ជាក់ប្រាប់អំពីប្រភេទអាវុធដែលជនសង្ស័យយកមកធ្វើការបាញ់ប្រហារលើជនរងគ្រោះនោះទេ។ពេលនេះ សមត្ថកិច្ចកំពុងតែស្រាវជ្រាវសាកសួរព័ត៌មានអំពីស្ថានភាពរបួសរបស់ជនរងគ្រោះ។
អ្នករស់នៅជិតខាង បានសំណូមពរឲ្យបើកការស៊ើបអង្កេតស្រាវជ្រាវ ដើម្បីចាប់ជនដៃដល់យកមកផ្ដន្ទាទោសកុំឱ្យគេធ្វើអ្វីស្រេចតែអំពើចិត្តយ៉ាងនេះ ម្យ៉ាងការប្រើអាវុធបាញ់បោះបង្កសំឡេងផ្ទុះបែបនេះ ធ្វើឲ្យក្នុងភូមិអសន្តិសុខប្រជាពលរដ្ឋមានការភ័យខ្លាចយ៉ាងខ្លាំង។ ទោះជាយ៉ាងណា សមត្ថកិច្ចកំពុងតែដុតដៃដុតជើងក្នុងការស្រាវជ្រាវវែកមុខជនបង្កមិនឱ្យរួចខ្លួនពីសំណាញ់ច្បាប់បានឡើយនេះ បើយោងតាមការបញ្ជាក់ពីនគរបាលស្រុកគងពិសីដែលចុះមកធ្វើការនៅកន្លែងកើតហេតុ ។
ចែករំលែកព័តមាននេះ