ខេត្តសៀមរាប៖ ក្រុមការងារត្រួតពិនិត្យតាមដានការអនុវត្តវិធានសុវត្ថិភាពទេសចរណ៍ខេត្តសៀម ដឹកនាំដោយលោក ពៅ ពិសិដ្ឋ អភិបាលរងខេត្ត និងជាប្រធានក្រុមការងារត្រួតពិនិត្យ បានចុះបិទអាហារដ្ឋានមួយកន្លែង បន្ទាប់ពីរកឃើញ ថា បើកហាងលក់ដូរអាហារ មិនអនុវត្ដតាមវិធានការរបស់រាជរដ្ឋាភិបាល។
វិធានការចុះបិទហាងអាហារដ្ឋាននេះ ធ្វើឡើង នាថ្ងៃទី១ ខែតុលា ឆ្នាំ២០២១ ក្រោយពេលដែលអាជ្ញាធរ ខេត្ដសៀមរាប បានសម្រេចបើកការចេញចូលក្នុងក្រុងសៀមរាប និងបិទបញ្ចប់ការកំណត់តំបន់ក្រហម និងតំបន់លឿងទុំ នៅក្នុងក្រុងទេសចរណ៍នេះ កាលពីរសៀលថ្ងៃទី៣០ ខែកញ្ញា ឆ្នាំ២០២១។
ក្នុងឱកាសនោះដែរ លោក ពៅ ពិសិដ្ឋ អភិបាលរងខេត្ត និងជាប្រធានក្រុមការងារត្រួតពិនិត្យ បានមានប្រសាសន៍ថា កន្លែងលក់អាហារដ្ឋាននោះ មានឈ្មោះ «ចែ ប៉ូរ» ស្ថិតនៅភូមិវត្ដដំណាក់ សង្កាត់សាលាកំរើក ក្រុងសៀមរាប ត្រូវបានម្ចាស់ហាងលក់អាហារឱ្យភ្ញៀវ ចូលអង្គុយហូបអាហារ ដោយមិនអនុវត្ដតាមការណែនាំរបស់អាជ្ញាធរខេត្ត ដូចជា ដាក់តុអង្គុយហូប គ្មានរក្សាគម្លាតសុវត្ថិភាព អង្គុយក្នុងបន្ទប់បិទជិត ហើយមានដាក់តុ ដោយមានមនុស្ស អង្គុយច្រើននាក់។ ពោលគឺការលក់អាហារដល់ភ្ញៀវរបស់គាត់ ខុសពីការណែនាំរបស់អាជ្ញាធរ ជាពិសេសមិនអនុវត្ដ តាមគោលការណ៍ណែនាំរបស់ក្រសួងសុខាភិបាល បើទោះបីក្រុមការងារ បានណែនាំរួចហើយក្ដី។
លោកបានបន្ដថា អាជ្ញាធរខេត្ត មិនបានហាមឃាត់ការលក់ដូរ ឬការធ្វើអាជីវកម្មរបស់ប្រជាពលរដ្ឋឡើយ ប៉ុន្ដែមុនបើកលក់ដូរឡើងវិញ ត្រូវមានការអនុញ្ញាតពីក្រុមការងារត្រួតពិនិត្យតាមដានការអនុវត្តវិធានសុវត្ថិភាពទេសចរណ៍ខេត្តសៀមរាប ដើម្បីចូលរូមកាត់បន្ថយការឆ្លងជំងឺកូវីដ១៩ ធ្ងន់ធ្ងរបន្ថែមទៀត នៅក្នុងសហគមន៍។ នេះការពង្រឹងការអនុវត្តវិធានការនានា និងការធានាប្រក្រតីភាព ក្នុងការរស់នៅ តាមបែបគន្លងថ្មី នៃបរិបទជំងឺកូវីដ-១៩ នៅក្នុងភូមិសាស្ត្រខេត្តសៀមរាប។
ប៉ុន្ដែយ៉ាងនេះក្ដី អាជ្ញាធរខេត្ត បានអនុញ្ញាតឱ្យម្ចាស់ហាងអាហារដ្ឋានយីហោ ចែ ប៉ូរ លក់វេចខ្ចប់ឱ្យភ្ញៀវជាធម្មតា ក្រោយពេលម្ចាស់ហាងនោះ បានធ្វើកិច្ចសន្យា និងបង់ប្រាក់ពិន័យរួចមក។
សេចក្ដីណែនាំរបស់រដ្ឋបាលខេត្តសៀមរាប បានបង្ហាញថា ភោជនីយដ្ឋាន-អាហារដ្ឋាន តូបអាហារ ហាងកាហ្វេ ហាងភេសជ្ជៈ និងអាជីវកម្មដ្ឋានគ្រប់ប្រភេទ អាចអនុញ្ញាតឱ្យប្រកបអាជីវកម្មរបស់ខ្លួន បានត្រឹមជាលក្ខណៈវេចខ្ចប់តែប៉ុណ្ណោះ ដោយមិនត្រូវអនុញ្ញាតឱ្យអតិថិជន ចូលមកទទួលទាន នៅក្នុងបរិវេណអាជីវកម្មដ្ឋានរបស់ខ្លួនឡើយ។ កន្លែងអាជីវកម្មទាំងនោះ ត្រូវធានាឱ្យបាននូវការអនុវត្តវិធានការសុវត្ថិភាព ផ្នែកសុខាភិបាល ពាក់ម៉ាស រក្សាឱ្យបាននូវគម្លាតសុវត្ថិភាពបុគ្គល និងសង្គម ព្រមទាំងប្រកាន់ភ្ជាប់នូវការធ្វើអនាម័យ ការសម្លាប់មរោគ ការវាស់កម្ដៅ ការស្កេន QR Code “ទប់ស្កាត់កូវីដ” (Stop Covid) និងត្រូវអនុវត្តតាមការណែនាំរបស់ក្រសួងសុខាភិបាល អនុវត្តវិធានការ “ពាការពារ និង ៣កុំ” របស់ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
សេចក្ដីជូនដំណឹងបានបន្ថែមថា ភោជនីយដ្ឋាន-អាហារដ្ឋាន តូបអាហារ ហាងកាហ្វេ ហាងភេសជ្ជៈ និងអាជីវកម្មដ្ឋានគ្រប់ប្រភេទ អាចអនុញ្ញាតឱ្យភ្ញៀវចូលទទួលទាន ក្នុងបរិវេណអាជីវកម្មរបស់ខ្លួនបាន លុះត្រាតែបានបំពេញលក្ខខណ្ឌវាយតម្លៃការអនុវត្តវិធានសុវត្ថិភាពទេសចរណ៍ និងកែសម្រួលហេដ្ឋារចនាសម្ព័ន្ធ របស់ខ្លួន ស្របតាមវិធានការសុខាភិបាល និងត្រូវមានការអនុញ្ញាតពីអាជ្ញាធរខេត្តមានសមត្ថកិច្ច បន្ទាប់ពីក្រុមការងារ ត្រួតពិនិត្យតាមដានការអនុវត្តវិធានសុវត្ថិភាពទេសចរណ៍ខេត្តសៀមរាប បានចុះពិនិត្យ និងសម្រេច៕ ច័ន្ទ រស្មី
ចែករំលែកព័តមាននេះ