រាជធានីភ្នំពេញ ៖ នេះជាលើកដំបូងដែលយុវជនម្នាក់នៅក្នុងក្រុមព្រះសុរិយា បានបញ្ចេញនូវស្នាដៃនិពន្ធបទចម្រៀងថ្វាយព្រះនាង នរោត្តម ចេនណា ដើម្បីអបអរពិធីបុណ្យភ្ជុំនាឆ្នាំនេះ។ បទ «ទៅធ្វើបុណ្យភ្ជុំ» ត្រូវបាននិពន្ធទំនុកច្រៀង និងរបៀបច្រៀងដោយលោក វីរ: វ៉ារ៉ានី ដែលមានតួនាទីជាអនុប្រធានផ្នែកស្រាវជ្រាវ ចងក្រង និងផ្សព្វផ្សាយនៃក្រុមព្រះសុរិយា។
លោក វីរ: វ៉ារ៉ានី បានអះអាងថា លោកនិពន្ធបទនេះ ជាពិសេសមួយគត់សម្រាប់ព្រះនាង ចេនណាតាមការស្នើសុំ ដែលមានព្ រះអង្គម្ចាស់ក្សត្រី នរោត្តម បុប្ផារី ជាព្រះប្រធាន ក្រោមការព្រះរាជកិច្ចចាត់ចែងនៃសម្តេចព្រះមហិស្សរា នរោត្តម ចក្រពង្ស់ ។
លោកបញ្ជាក់ថា ខ្ញុំសរសេរនេះ ក្នុងគោលបំណងបង្ហាញពីរបៀបរបបនៃទំនៀមបុណ្យភ្ជុំ និងពីប្រវត្តិបុណ្យភ្ជុំបិណ្ឌដែលកើតឡើងក្រោមស្នាព្រះហស្តព្រះបាទអង្គឌួង ដែលកូនខ្មែរមួយចំនួនពុំបានដឹង។
លោកបន្ថែមទៀតថា សព្វថ្ងៃនេះ ក្រៅពីបំពេញការងារយ៉ាងស្វិតស្វាញសម្រាប់ការស្រាវជ្រាវ ផលិតវីដេអូផ្សាយក្រុមព្រះសុរិយា លោកក៏ឆ្លៀតពេលខ្លះតែងចម្រៀងដោយក្តីស្រឡាញ់។ លោកថា លោកក៏ធ្លាប់បានជាប់ជ័យលាភីខ្លះដែរ ពាក់ព័ន្ធនឹងការតែងនិពន្ធនេះ ប៉ុន្តែកន្លងមក លោកកម្រនឹងតែងនិពន្ធបទចម្រៀងសម្រាប់អ្នកណាឡើយ ខណៈពេលកន្លងមក លោកក៏ធ្លាប់បញ្ចេញស្នាដៃបទចម្រៀងទី១ សម្រាប់កំពូលតារាចម្រៀងនាង មាស សុខសោភា តាមរយៈបទ «ថ្ងៃជួបថ្ងៃព្រាត់គ្នា»។
យ៉ាងណា បើតាមលោក វីរ: វ៉ារ៉ានី ប្រសិនបើស្នាដៃរបស់លោកមានការគាំទ្រខ្លាំងនោះ លោកនឹងបន្តស្នាដៃនិពន្ធនេះថ្មីបន្ថែមទៀត ព្រោះវាក៏ជាការស្រឡាញ់ និងចូលចិត្តរបស់លោកផងដែរ ក្រៅពីការស្រាវជ្រាវ និងចងក្រងឯកសារភាពយន្តនាសម័យដើម៕
ចែករំលែកព័តមាននេះ