រាជធានីភ្នំពេញ ៖ មេការភោជនីយដ្ឋាន និងបារ យីហោ BATTOUN ត្រូវបានសមត្ថកិច្ចខណ្ឌទួលគោក កសាងសំណុំរឿងបញ្ជូន ទៅកាន់សាលាដំបូងរាជធានីភ្នំពេញចាត់ការតាមច្បាប់ ចំណែកភ្ញៀវចំនួន១៨នាក់ដែលប្រមូលផ្តុំគ្នាផឹកស៊ី ល្មើសនឹងវិធានការសុខាភិបាល និងសេចក្តីណែនាំរបស់រដ្ឋបាលរាជធានីភ្នំពេញ ក៏ត្រូវបានផាក់ពិន័យម្នាក់ៗចំនួន២លានរៀលផងដែរ ដោយឡែកបុគ្គលិក ត្រូវបានធ្វើការអប់រំរួចអោយត្រឡប់ទៅផ្ទះវិញ ។ នេះបើតាមការអោយដឹងពីលោកវរសេនីយ៍ឯក សុខ ហេង អធិការនគរបាលខណ្ឌទួលគោក បានអោយដឹងនៅមុននេះបន្តិច គឹនៅថ្ងៃទី៣០ ខែកញ្ញា ឆ្នាំ២០២១នេះ ។
គួរបញ្ជាក់ថា ភោជនីយដ្ឋាន និងបារយីហោ BATTOUN មានទីតាំងនៅអគារ SAMAI SQUARE (សម័យសឃ្វែរ) ស្ថិតនៅតាមបណ្តោយផ្លូវលេខ ៣៣៧ ក្នុងសង្កាត់បឹងកក់១ ខណ្ឌទួលគោក ត្រូវបានគណៈបញ្ជាការឯកភាពខណ្ឌទួលគោក ចុះបង្ក្រាបកាលពីវេលាម៉ោង១០យប់ ថ្ងៃទី២៩ ខែកញ្ញា ឆ្នាំ២០២១ ខណៈពេលដែលភោជនីយដ្ឋានខាងលើ បានបើកអោយមានការប្រមូលផ្តុំគ្នាផឹកស៊ី ដែលល្មើសនឹងវិធានការសុខាភិបាល និងសេចក្តីណែនាំរបស់រដ្ឋបាលរាជធានីភ្នំពេញ ដើម្បីទប់ស្កាត់ការរីករាល់ដាល់នូវជំងឺកូវីដ១៩។
នៅក្នុងការបង្ក្រាបភោជនីយដ្ឋានខាងលើនោះ សមត្ថកិច្ចបានឃាត់ខ្លួនមនុស្សប្រុសស្រីសរុបចំនូន៣០នាក់ បញ្ជូនទៅកាន់អធិការដ្ឋានខណ្ឌទួលគោក ដើម្បីមានវិធានតាមច្បាប់។
លោកវរសេនីយ៍ ឯក សុខ ហេង អធិការនគបាលខណ្ឌទួលគោក បានអោយកោះសន្តិភាពដឹងថា មនុស្សប្រុសស្រីចំនួន៣០នាក់ដែលត្រូវឃាត់ខ្លួនតាមបទបញ្ជារបស់ឯកឧត្តម ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញនេះ ត្រូវបានណែនាំអោយអធិការដ្ឋាននគរបាលទួលគោក ដើម្បីកសាងសំណុំរឿងមេការម្នាក់បញ្ជូនទៅកាន់សាលាដំបូងរាជធានីភ្នំពេញចាត់ការតាមច្បាប់, ភ្ញៀវចំនួន១៨នាក់ ដែលល្មើសនឹងបំរាមត្រូវធ្វើការផាកពិន័យតាមច្បាប់, បុគ្គលិកចំនួន១១នាក់ ត្រូវធ្វើការអប់រំរួចអោយត្រឡប់ទៅផ្ទះ វិញ ដោយមានអ្នកមកធានាត្រឹមត្រូវ ។
តាមព័ត៌មានដដែលអោយដឹងថា ភ្លៀវដែលល្មើសនឹងវិធានការសុខាភិបាល និងសេចក្តីណែនាំរបស់ រដ្ឋបាលរាជធានីភ្នំពេញនោះ បើតាមច្បាប់អន្តរកាល ត្រូវផាកពិន័យក្នុងម្នាក់ៗ២លានរៀល ដែលសរុប ទាំងអស់១៨នាក់ គឺមានចំនួន៣៦លានរៀល ។
គួររំលឹកថា ៖ ចាប់ប្រុសស្រី៣០នាក់ក្នុងភោជនីយដ្ឋាន និងបារមួយកន្លែង ផាកពិន័យតាមច្បាប់កូវីដ ៕
ចែករំលែកព័តមាននេះ