រាជធានីភ្នំពេញ ៖ រហូតមកទល់នាពេលនេះ ស្ថានភាពរបស់លោកព្រឹទ្ធាចារ្យ លី ប៊ុនយីម នៅតែមានសភាពធ្ងន់ធ្ងរ ក្រោយពេលដែលលោកត្រូវបានគេរកឃើញថា បានឆ្លងជំងឺកូវីដ១៩ កាលពីពេលថ្មីៗនេះ។ ស្ថានភាពនៅតែធ្ងន់ធ្ងរ ដោយសារលោកព្រឹទ្ធាចារ្យផ្នែកសិល្បកររៀមច្បង ក្នុងវិស័យភាពយន្តខ្មែរ តាំងពីសម័យដើមរូបនេះ កាន់តែចាស់ជរា បូករួមទាំងមានជំងឺប្រចាំកាយផងនោះ។
កូនប្រុសរបស់លោក គឺលោក លី រដ្ឋា បានអះអាងប្រាប់កោះសន្តិភាពតាមទូរស័ព្ទថា បច្ចុប្បន្នលោកមិនទាន់ដឹងពីស្ថានភាពវិវត្តន៍ថ្មីបន្ថែមទៀតពីឪពុករបស់លោកឡើយ ដោយសារលោកកំពុងស្ថិតនៅសហរដ្ឋអាមេរិក។
លោកបញ្ជាក់ថា នាពេលនេះ លោកគ្រាន់តែដឹងថា ឪពុករបស់លោកត្រូវបានក្រុមគ្រូពេទ្យយកទៅសម្រាកព្យាបាលនៅមណ្ឌលមួយកន្លែងនាខេត្តកណ្តាល។ លោកបន្ថែមថា នៅពេលសម្រាកព្យាបាលជំងឺកូវីដ១៩នោះ ក្រុមគ្រួសារបានប្រាប់សាច់ញាតិអោយត្រៀមចិត្ត ព្រោះឪពុករបស់លោកអាចនៅបន្តត្រឹមមួយសប្តាហ៍ ឬលើលពីនេះតិចតួចប៉ុណ្ណោះ។
លោកថា បច្ចុប្បន្នឪពុករបស់លោកមានវ័យ៨៧ឆ្នាំហើយ ហើយសម្រាកតែនៅលើគ្រែដោយមានជំងឺប្រចាំកាយ ខណៈពេលខ្លះឪពុករបស់លោកក៏មានការវង្វេងវង្វាន់ផងដែរ។ លោកនិយាយថា គាត់ចាស់ជរា មានជំងឺប្រចាំកាយទៀត ដូចនេះនៅពេលមានជំងឺកូវីដវាយលុកទៀតនោះ វាជាការពិបាកណាស់ បើសូម្បីក្មេងនៅពិបាក ចុះទម្រាំគាត់ចាស់។
យ៉ាងណា បើតាមលោក លីរដ្ឋា រហូតមកដល់ពេលនេះ លោកនៅមិនទាន់ដឹងទេថា ឪពុករបស់លោកបានឆ្លងជំងឺនេះមកពីណា បើគាត់នៅតែផ្ទះ។ លោកបញ្ជាក់ថា ឪពុកលោកសម្រាកតែនៅផ្ទះដោយមានអ្នកមើលថែបញ្ចុកបាយ រឿងអ្វីបានគាត់ឆ្លងជំងឺនេះ។ យ៉ាងណាលោកគិតថា ឪពុករបស់លោកទំនងជាអាចឆ្លងមកពីសមាជិកគ្រួសារដែលមើលថែឪពុករបស់លោក ព្រោះបច្ចុប្បន្នលោកកំពុងស្នាក់នៅជាមួយនឹងនារីម្នាក់ដែលលោកមិនដឹងច្បាស់ថា គាត់ជាភរិយាថ្មីឪពុកលោកឬយ៉ាងណា?។
លោកថា នារីដែលស្នាក់នៅជាមួយឪពុករបស់លោកតែងតែនាំសមាជិកក្រុមគ្រួសារចេញចូលជាញឹកញាប់នៅផ្ទះឪពុករបស់លោក។ កត្តានេះលោកគិតថា ឪពុករបស់លោកអាចឆ្លងមកពីពួកគេ ដោយសារពួកគេដើរហើរច្រើន ហើយទំនងមិនបានការពារដោយការពាក់ម៉ាស ទើបបណ្តាអោយឆ្លងបែបនេះ។ មួយទៀតលោកក៏ឆ្ងល់ថា ហេតុអ្វីនារីម្នាក់នោះមិននាំឪពុករបស់លោកចាក់ថ្នាំវ៉ាក់សាំងការពារ? ព្រោះថ្នាំនេះ គេចាក់មិនគិតថ្លៃផងនោះ។
ទោះជាយ៉ាងណា រហូតមកទល់ពេលនេះ លោកក៏កំពុងរង់ចាំដំណឹងបន្ថែមពីស្ថានភាពជំងឺឪពុករបស់លោក ខណៈពេលសាច់ញាតិរបស់លោកនៅស្រុកខ្មែរកំពុងព្យាយាម ដើម្បីបានទៅទិដ្ឋភាពនៃការសម្រាកព្យាបាលឪពុកលោក។
គួរបញ្ជាក់ថា ព្រឹទ្ធាចារ្យ លី ប៊ុនយីម គឺជាផលិតករភាពយន្តដ៏ល្បីល្បាញមួយរូបនាសម័យដើម ដោយលោកមាននាទីជាអ្នកនិពន្ធ អ្នកដឹកនាំរឿង អ្នកបច្ចេកទេស និងផលិតករ ដែលមានស្នាដៃល្អចំណាន ហើយបានទទួលការសរសើរពីមហាជនគ្រប់ស្រទាប់ទាំងជាតិ និងអន្តរជាតិ។
កាលពីមុនឆ្នាំ១៩៧៥ លោក លី ប៊ុនយីម បានកសាងស្នាដៃភាពយន្តជាច្រើន សម្រាប់ផលិតកម្មរន្ទះពេជ្រភាពយន្តរបស់លោក មានដូចជារឿង «សព្វសិទ្ធិ» រឿង «ពុទ្ធិសែននាងកង្រី» រឿង «អនអើយស្រីអន» រឿង «សេះសមុទ្រ» រឿង «ចំណងដៃទឹកភ្នែក» ដែលសុទ្ធតែជាភាពយន្ត ដែលល្បីល្បាញកំពូលតែម្តង។
លោកព្រឹទ្ធាចារ្យ លី ប៊ុនយីម បានត្រឡប់មករស់នៅប្រទេសកម្ពុជាវិញ នៅក្នុងទសវត្ស៩០ ក្រោយពីលោក និងក្រុមគ្រួសារ បានភៀសខ្លួនរត់ចេញពីរបបប្រល័យពូជសាសន៍ខ្មែរក្រហមនៅខែមិថុនា ឆ្នាំ១៩៧៥ ជាជនភៀសខ្លួន នៅប្រទេសវៀតណាម ហើយបន្តទៅរស់នៅប្រទេសបារាំង។
លោកព្រឹទ្ធាចារ្យ លី ប៊ុនយីម សព្វថ្ងៃ បានរស់នៅក្នុងគេហដ្ឋាននៅសង្កាត់ព្រែកហូរ ក្រុងតាខ្មៅ ខេត្តកណ្តាល។ លោកមានកូនប្រុសចំនួន៥នាក់ ជាមួយនឹងភរិយារបស់លោកក៏ជាតារារភាពយន្តល្បីឈ្មោះម្នាក់ គឺលោកស្រី វីរ: តារា។ ក្នុងចំណោមកូនប្រុសទាំងប្រាំនោះ គឺលោក លី រដ្ឋា ដែលសព្វថ្ងៃមានអាយុ៥៤ឆ្នាំ រស់នៅរដ្ឋកាលីហ្វញ៉េ សហរដ្ឋអាមេរិក ជាអ្នកកាត់តភាពយន្តនៅក្នុងក្រុមហ៊ុនភាពយន្តអន្តរជាតិមួយ ហើយលោកធ្លាប់មករស់នៅប្រទេសកម្ពុជារយៈពេលពីរឆ្នាំ មកជួយការងារលោក លី ប៊ុនយីម ជាឪពុក ក្នុងការផលិតខ្សែភាពយន្តរឿងតុលាការអទិទេព កាលពីប៉ុន្មានកន្លងទៅ។ លោក លី រដ្ឋា ក៏បានទទួលសញ្ញាបត្រផ្នែកកាត់តភាពយន្តនេះពីក្រុមហ៊ុន ហូលីវូដ ផងដែរ៕
ចែករំលែកព័តមាននេះ