រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ភោជនីយដ្ឋាន និង បារ យីហោ BATTOUN នៅអគារសម័យ សឃ្វែរ នៅតាមបណ្តោយផ្លូវ៣៣៧ ដែលបានលួចបើកដំណើរការ ជួបជុំផឹកស៊ី ល្មើសនឹងវិធានការរដ្ឋបាលរាជធានីភ្នំពេញ ហើយត្រូវបានកម្លាំងគណៈបញ្ជាការឯកភាពខណ្ឌទួលគោក ចុះបង្ក្រាប និងឃាត់ខ្លួនមនុស្សប្រុសស្រីចំនួន៣០នាក់ នាំទៅកាន់អធិកាដ្ឋានខណ្ឌអប់រំ និងចាត់ការតាមនីតិវិធីនៃច្បាប់កូវីដ១៩ បង្កឱ្យមានការភ្ញាក់ផ្អើលកាលពីវេលាម៉ោង១០យប់ ថ្ងៃទី២៩ ខែកញ្ញា ឆ្នាំ២០២១ នៅអគារ SAMAI SQUARE (សម័យសឃ្វែរ) ចំណុចភោជនីយដ្ឋាន និងបារ យីហោ BATTOUN ស្ថិតនៅក្នុងសង្កាត់បឹងកក់១ ខណ្ឌទួលគោក ។
សេចក្តីរាយការណ៍បានឱ្យដឹងថា មនុស្សប្រុសស្រីទាំង៣០នាក់ខាងលើនោះ រួមមានភ្ញៀវ និងបុគ្គលិក មិនត្រូវបានស្គាល់អត្តសញ្ញាណនោះទេ ។
បើតាមប្រភពពីសមត្ថកិច្ច បានបង្ហើបប្រាប់ឲ្យដឹងថា បន្ទាប់ពីទទួលដំណឹងថា ភោជនីយដ្ឋាន និងបារខាងលើនេះ បានលួចបើកដំណើរការទទួលភ្ញៀវចូលជួបផឹកស៊ី ដែលល្មើសនឹងបំរាមរដ្ឋបាលរាជធានីភ្នំពេញ កម្លាំងគណៈបញ្ជាការឯកភាពខណ្ឌ និងកម្លាំងអន្តរាគមន៍ខណ្ឌទួលគោក បានធ្វើការបង្ក្រាបជាក់ស្តែង ហើយក៏បានឃាត់ខ្លួនមនុសប្រុសស្រីជាង៣០នាក់ សរុបទាំងបុគ្គលិក និងភ្ញៀវ ។
បន្ទាប់ពីឃាត់ខ្លួនមនុស្សប្រុសស្រីទាំង៣០នាក់នោះហើយ ត្រូវបានសមត្ថកិច្ចទាក់ទងហៅក្រុមគ្រូពេទ្យ ចុះយកសំណាកធ្វើតេស្តភ្លាមៗ ជាចេញលទ្ធផលគឺអវិជ្ជមាន រួចក៏បានបញ្ជូនខ្លួនបន្តទៅកាន់អធិកាដ្ឋានខណ្ឌទួលគោក ធ្វើការពិន័យជាប្រាក់តាមច្បាប់កូវីដ១៩ ៕
ចែករំលែកព័តមាននេះ