ខេត្តព្រៃវែង ៖ ករណីសំណុំរឿងឃាតកម្មសម្លា.ប់ស្ត្រីជាប្រធានគណនេយ្យម្នាក់ នៅម៉ោង១០ព្រឹកថ្ងៃទី២៧ កញ្ញា ២០២១នេះ កម្លាំងសមត្ថកិច្ចចម្រុះ បាននាំខ្លួនជនសង្ស័យ យកទៅកន្លែងកើតហេតុ នៅក្នុងគ្រឹះស្ថានមីក្រូហិរញ្ញវត្ថុ វិវឌ្ឍន៍ សាខាស្រុកស្វាយអន្ទរ ដើម្បីធ្វើត្រាប់នៃការសម្លា.ប់នារីរងគ្រោះឡើងវិញ ទុកធ្វើជាភស្តុតាង ។
ស្ត្រីម្នាក់ដែលជាប្រធានគណនេយ្យគ្រឹះស្ថានមីក្រូហិរញ្ញវត្ថុ វិវឌ្ឍន៍ សាខាស្រុកស្វាយអន្ទរ ត្រូវបានគេប្រទះឃើញដេកស្លា.ប់នៅក្នុងបន្ទប់ទឹកធ្វើការ នៅក្នុងអគារគ្រឹះស្ថាន បង្កការភ្ញាក់ផ្អើលកាលពីរសៀលថ្ងៃទី២៦ កញ្ញា ២០២១ ដោយនៅលើដងខ្លួនមានស្នាមរបួសជាច្រើនកន្លែង ។
«នៅទីបំផុតនោះ សំណុំរឿងឃាតកម្មសម្លា.ប់ប្រធានគណនេយ្យគ្រឹះស្ថានមីក្រូហិរញ្ញវត្ថុ វិវឌ្ឍន៍ សាខាស្រុកស្វាយអន្ទរ ត្រូវបានលាតត្រដាងហើយ»
ស្ត្រីរងគ្រោះមានឈ្មោះ មុំ ចិន្តា អាយុ២៧ឆ្នាំ មានទីលំនៅក្នុងភូមិលេខ៨ សង្កាត់កំពង់លាវ ក្រុងព្រៃវែង និងមានមុខរបរជាប្រធានគណនេយ្យគ្រឹះស្ថានមីក្រូហិរញ្ញវត្ថុវិវឌ្ឍន៍ សាខាស្រុកស្វាយអន្ទរ ។ ចំណែកឯ ជនសង្ស័យឈ្មោះ យ៉ុម ចន្ថា ជាប្រធានសាខាគ្រឹះស្ថានមីក្រូហិរញ្ញវត្ថុ វិវឌ្ឍន៍ ស្រុកស្វាយអន្ទរ ។
ប្រភពព័ត៌មានពីសមត្ថកិច្ច បានឲ្យកោះសន្តិភាពដឹងថា នៅថ្ងៃកើតហេតុនោះ គឺជាថ្ងៃអាទិត្យ ដែលធម្មតាគ្មានមនុស្សធ្វើការទេ ប៉ុន្តែនៅរសៀលថ្ងៃនេះ មានបុគ្គលិកចូលមកប្រចាំការ (វេនយប់) ហើយបានចូលទៅខាងក្នុងពិនិត្យមើល ស្រាប់តែឃើញជនរងគ្រោះដេកស្លា.ប់ម្នាក់ឯង នៅក្នុងបន្ទប់ទឹកធ្វើការបាត់ទៅហើយ ដោយមិនដឹងស្លា.ប់តាំងពីពេលណា និងអ្នកណាជាអ្នកសម្លា.ប់នោះទេ ទើបរាយការណ៍ទៅសមត្ថកិច្ច បង្កឲ្យមានការភ្ញាក់ផ្អើលឡើងពេញកន្លែងកើតហេតុតែម្តង ។
ប្រភពដដែលនេះ បានបញ្ជាក់ថា តាមការពិនិត្យលើខ្លួនប្រាណសព គឺឃើញមានស្នាមរបួសជាច្រើនកន្លែង ទាំងនៅលើដៃជើង ខ្លួនប្រាណ ពិសេសគឺនៅលើគល់ក គឺមានស្នាមជាំពេញតែម្ដង ដែលនេះសបញ្ជាក់ថា មុនពេលស្លា.ប់ជនរងគ្រោះត្រូវបានជនល្មើសធ្វើទារុណកម្ម ចងវាយនិងច្របាច់កខ្លាំង ទើបបណ្ដាលឱ្យស្លា.ប់ ។
សមត្ថកិច្ចបានបន្តទៀតថា តាមការស្តាប់ចម្លើយរបស់ក្រុមគ្រួសារជនរងគ្រោះ នៅព្រឹកថ្ងៃកើតហេតុ នារីរងគ្រោះបានប្រាប់ម្តាយថា ប្រធានរបស់នាង ឈ្មោះ យ៉ុម ចន្ថា ( ប្រធានសាខា ) បានហៅនាងទៅប្រជុំតែ២នាក់នៅកន្លែងធ្វើការ មិនដឹងមានរឿងអ្វីនោះទេ និយាយរួចក៏ចេញទៅបាត់ រហូតដល់ល្ងាចស្រាប់តែទទួលបានដំណឹងថា កូនស្រីស្លា.ប់បាត់ទៅហើយ។
យោងតាមចម្លើយរបស់ក្រុមគ្រួសារនារីរងគ្រោះ ទើបសមត្ថកិច្ចកំណត់មុខសញ្ញាជនសង្ស័យបាន ហើយក៏តាមស្រាវជ្រាវរហូតទទួលបានដំណឹងថា ជនសង្ស័យបានត្រឡប់ទៅផ្ទះនៅឯឃុំពាមរក៍ ស្រុកពាមរក៍ ហើយត្រូវបានគ្រួសារនាំទៅកាន់មន្ទីរពេទ្យបង្អែកអ្នកលឿង ទើបសមត្ថកិច្ចបន្តតាមទៅដល់មន្ទីរពេទ្យ និងដាក់កម្លាំងការពារមិនឱ្យជនសង្ស័យរត់គេចខ្លន រហូតដល់ព្រឹកឡើង ទើបក្រុមគ្រូពេទ្យប្រគល់ឯកសារ និងជនសង្ស័យឲ្យសមត្ថកិច្ចនាំយកទៅកាន់ស្រុកស្វាយអន្ទរវិញ នៅព្រឹកថ្ងៃទី២៧ កញ្ញានេះ ។
លោកឧត្តមសេនីយ៍ត្រី ពៅ ជីវី ស្នងការរងទទួលផែនព្រហ្មទណ្ឌ នៃស្នងការដ្ឋាននគរបាលខេត្តព្រៃវែង បានបញ្ជាក់ប្រាប់កោះសន្តិភាព នារសៀលថ្ងៃទី ២៧ កញ្ញា នេះថា ក្រោយពីត្រូវបានចាប់ខ្លួន និងតាមរយៈការសួរចម្លើយអស់រយៈពេលមួយព្រឹក ជនសង្ស័យឈ្មោះ យ៉ុម ចន្ថា ( ប្រធានសាខា ) បានឆ្លើយសារភាពថា «ខ្លួនពិតជាបានសម្លា.ប់នារីរងគ្រោះមែន ដោយសារតែចង់បំបិទមាត់ កុំឱ្យនាងប្តឹងទៅសមត្ថកិច្ច» ។
លោកស្នងការរង ពៅ ជីវី បានបន្ថែមថា តាមចម្លើយសារភាពរបស់ជនសង្ស័យ រូបគេបានរៀបចំផែនការទុកជាមុន ដោយឲ្យបុគ្គលិកទាំងអស់ នាំគ្នាទៅដើរលេងកំសាន្ត នៅខេត្តកំពង់ចាម បន្ទាប់មកក៏ហៅនារីរងគ្រោះឲ្យទៅកន្លែងធ្វើការ រួចបង្ខំអោយនាងប្រាប់លេខកូដសម្ងាត់ទូដែក យកលុយបានមួយចំនួនធំ រួចក៏ចាប់នារីរងគ្រោះចងដៃចងជើង នឹងច្របាច់.ក ខ្ទប់ដង្ហើមសម្លា.ប់ចោលតែម្ដង ។
ក្រោយធ្វើសកម្មភាពរួច រូបគេក៏យកលុយដែលយកបានពីក្នុងទូដែក ធ្វើដំណើរទៅផ្ទះនៅស្រុកពាមរក៍ ហើយជួបជុំផឹកស៊ីជាមួយមិត្តភក្តិបងប្អូនធ្វើដូចធម្មតា រហូតដល់ល្ងាចទើបសម្តែងធ្វើជាចុកពោះឱ្យប្រពន្ធមកមើល ហើយប្រាប់ប្រពន្ធថា «ខ្លួនបានលេបថ្នាំកណ្តុរ» ទើបប្រពន្ធ និងក្រុមគ្រួសារ នាំគ្នាដឹកយកទៅព្យាបាលនៅមន្ទីរពេទ្យបង្អែកអ្នកលឿងរហូតត្រូវបានសមត្ថកិច្ចតាមរកឃើញ និងចាប់ខ្លួនបានតែម្ដង ។
លោកឧត្តមសេនីយ៍ត្រី ពៅ ជីវី បានអោយដឹងទៀតថា គិតត្រឹមវេលាម៉ោង១០ព្រឹកថ្ងៃដដែលនេះ សមត្ថកិច្ចបាននាំខ្លួនជនសង្ស័យឲ្យទៅធ្វើត្រាប់ពីការសម្លា.ប់ជនរងគ្រោះ និងចាត់កម្លាំងឱ្យចុះទៅតាមស្វែងរកលុយមួយចំនួនធំ ដែលជនសង្ស័យបានលួចយកទៅនោះត្រឡប់មកវិញ ។
ចំពោះលុយដែលសមត្ថកិច្ចរកឃើញមកវិញជាក់ស្តែង មានចំនួន ៥,៩០០,០០០រៀល ដែលជនសង្ស័យច្រកដាក់ក្នុងថង់ខ្មៅ យកទៅកប់ដីលាក់ទុកនៅខាងក្រោយផ្ទះ ក្នុងឃុំពាមរក៍ ស្រុកពាមរក៍ ក្នុងខេត្តព្រៃវែង ។ បើតាមចម្លើយសារភាពរបស់ជនសង្ស័យឈ្មោះ យ៉ុម ចន្ថា (ប្រធានសាខា) ប្រាប់ថា លុយដែលខ្លួនយកបានពីក្នុងទូដែក ទាំងអស់ជិត ១០លានរៀល ប៉ុន្តែរូបគេបានវេរប្រគេនទៅព្រះសង្ឃ តាមវត្តមួយចំនួនហើយ ក្នុងខេត្តព្រៃវែងផង និងភ្នំពេញផង (ប្រមាណពីរបីវត្ត) ដូច្នេះលុយនៅសល់តែ៥លាន៩សែនទេ ។ កម្លាំងសមត្ថកិច្ចរក្សាលុយទាំងនោះ ទុកធ្វើជាភស្តុតាង ។
បច្ចុប្បន្ន សមត្ថកិច្ចកំពុងកសាងសំណុំរឿង ដើម្បីបញ្ជូនជនសង្ស័យទៅកាន់សាលាដំបូងខេត្តព្រៃវែង ចាត់ការបន្តទៅតាមនីតិវិធី ៕
ខាងក្រោម មានវីដេអូ ការធ្វើត្រាប់ឡើងវិញ ៖
ចែករំលែកព័តមាននេះ