ខេត្តប៉ៃលិន ៖ រហូតមកដល់ថ្ងៃទី២៨ ខែកុម្ភៈ ឆ្នាំ២០១៦នេះ ប្រជាពលរដ្ឋជាច្រើននាក់ ដែលចូលចិត្តទទួលទានគ្រឿងសមុទ្រ ដូចជា បង្គា បង្កង ក្តាម និងមឹកជាដើម មានការខ្លាចញញើតយ៉ាងខ្លាំង ស្ទើរមិនហ៊ានទិញយកទៅធ្វើម្ហូបនោះឡើយ ។ ខាងមន្ត្រីកាំកុងត្រូលសាខាខេត្តប៉ៃលិន បានដឹកនាំកម្លាំងចុះត្រួតពិនិត្យទំនិញខូចគុណភាព និងហួសកាលបរិច្ឆេទ ព្រមទាំងធ្វើពិសោធន៍ រកមើលសារធាតុគីមីនៅលើតូបលក់មឹកមួយកន្លែង ដែលអាជីវករដាក់លក់នៅក្នុងផ្សារអូរច្រា ក្នុងភូមិអូរច្រាកណ្តាល សង្កាត់ទួលល្វា ក្រុងប៉ៃលិន ស្រាប់តែឃើញមានសារធាតុគីមី (កកបូលីន) ដែលប៉ះពាល់ដល់សុខភាពយ៉ាងធ្ងន់ធ្ងរ ។
កាលពីព្រឹកថ្ងៃទី២៥ ខែកុម្ភៈ កន្លងទៅនេះ ខាងមន្ដ្រីកាំកុងត្រូលសាខាខេត្តប៉ៃលិន សហការជាមួយមន្ត្រី នៃមន្ទីរពាណិជ្ជកម្ម ចុះត្រួតពិនិត្យទំនិញខូចគុណភាព បានពិនិត្យលើមឹកដែលអាជីវករដាក់លក់ ស្រាប់តែរកឃើញសារធាតុគីមីម្យ៉ាង សម្រាប់ដាក់ទៅលើមឹកមិនឱ្យមានក្លិបស្អុយ ហើយឱ្យម្ចាស់យកទៅបោះចោលមិនឱ្យលក់បន្តជូនប្រជាពលរដ្ឋឡើយ ។ ប្រជាពលរដ្ឋជាច្រើននាក់រស់នៅក្នុងខេត្តប៉ៃលិន បានសម្តែងការព្រួយបារម្ភយ៉ាងខ្លាំង ចំពោះសុវត្ថិភាព សុខភាព បន្ទាប់ពីខាងមន្ត្រីកាំកុងត្រូលពិនិត្យលើមឹកនោះឃើញមានសារធាតុគីមី ព្រោះរបស់របរ និងម្ហូបអាហារទាំងនោះ ត្រូវគេលើកពីផ្សារសាមគ្គីហៅប៉ាហ៊ី ក្នុង ភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន យកទៅលក់បន្តនៅតាមផ្សារតូចៗក្នុងភូមិនានា ។
ដូច្នេះនៅក្នុងផ្សារធំខេត្តប៉ៃលិន ដែលអាជីវករលក់ដូរ ម្ហូបរួមមាន មឹក បង្គា បង្កង និងក្តាមសមុទ្រ ក៏សង្ស័យថា មានសារធាតុគីមីច្រើនផងដែរ ។ ប្រជាពលរដ្ឋបន្តទៀតថា មើលទៅអ្នកទិញម្ហូបអាហារ ដែលគេយកមកលក់នៅក្នុងខេត្តប៉ៃលិន អាចប្រឈមការប៉ះពាល់សុខភាពប្រជាពលរដ្ឋស្ទើរគ្រប់ៗគ្នា ព្រោះម្ហូបអាហារទាំងនោះ មិនបានដឹងថា អ្នកលក់ដាក់សារធាតុគីមី ឬអត់នោះទេ ។
ប៉ុន្តែបើឈ្មួញយកមកពីស្រុកឆ្ងាយៗ ប្រហែលជាដាក់សារធាតុ ដើម្បីរក្សាឱ្យសាច់ និងគ្រឿងសមុទ្រទាំងនោះ នៅស្រ ស់បានយូរ ហើយក៏ធ្វើឱ្យអ្នកទិញរងគ្រោះថ្នាក់ដែលបង្កជំងឺទៅជាទឹកនោមផ្អែម ទឹកនោមប្រៃ រលាកក្រពះ ពោះវៀន លើសឈាម ខ្សោយបេះដូង និងជំងឺផ្សេងៗថែមទៀតផង ។ ប្រជាពលរដ្ឋសំណូមពរដល់មន្ត្រីពាក់ព័ន្ធ និងមន្ត្រីកាំកុងត្រូលមេត្តាចុះត្រួតពិនិត្យ និងធ្វើតេស្តរកសារធាតុគីមីនៅក្នុងត្រី សាច់ជ្រូក ព្រមទាំងគ្រឿងសមុទ្រ ឱ្យបានញឹកញាប់ ដើម្បីចៀសវាងការទិញយកទៅទទួលទានដែលប៉ះពាល់ដល់សុខភាពយ៉ាងធ្ងន់ធ្ងរ ។ បើតាមលោក សាន វិជ្ជាសារ៉ាវុធ ប្រធានកាំកុងត្រូលសាខាខេត្តប៉ៃលិន បានឱ្យដឹងថា ការដាក់សារធាតុគីមីនៅលើមឹកនេះ ភាគច្រើនគឺគេដាក់តាំងពីលើទូកនេសាទមកម្លេះ លុះអាជីវករមិនដឹង ក៏ទិញយកមកលក់ដូរបន្ត ។
លោកបន្តទៀតថា កាលពីមុន ខាងលោកធ្លាប់ពិនិត្យមើលទៅលើគ្រឿងសមុទ្រនៅក្នុងផ្សារសាមគ្គី ហៅប៉ាហ៊ី ធ្លាប់រកឃើញសារធាតុគីមីនៅលើគ្រឿងសមុទ្រដូចជា (កកបូលីន, បូរ៉ាក់ ) ដែលគេប្រើសម្រាប់ដាក់ទៅលើសាកសពមិនឱ្យឆាប់ស្អុយរលួយ លុះឈ្មួញដាក់នៅលើម្ហូបអាហារបែបនេះ នឹងបង្កផលប៉ះពាល់ធ្ងន់ធ្ងរ ចំពោះសុខភាពប្រជាពលរដ្ឋ ។ ខាងលោកសុំឱ្យអ្នកលក់យកមឹកដែលមានសារធាតុគីមីទាំងនោះ ទៅបោះចោលមិនឱ្យលក់ដូរជូនប្រជាពលរដ្ឋឡើយ ៕
ចែករំលែកព័តមាននេះ