ទឹកទន្លេមេគង្គនៅស្ទឹងត្រែងហក់ឡើងកំពស់ជិត១ម៉ែត្រនៅថ្ងៃនេះ
- ស្ទឹងត្រែង
ទឹកទន្លេមេគង្គខេត្តស្ទឹងត្រែង បានហក់ឡើង០,៩០ម៉ែត្រ។ នេះបើយោងតាមរបាយការណ៍របស់មន្ទីរធនធានទឹក និងឧតុនិយមខេត្ត បានប្រកាសនៅថ្ងៃនេះ
ខេត្តស្ទឹងត្រែង ៖ នៅថ្ងៃទី២៦ ខែកញ្ញា ឆ្នាំ២០២១នេះ ទឹកទន្លេមេគង្គខេត្តស្ទឹងត្រែង បានហក់ឡើង០,៩០ម៉ែត្រ។ នេះបើយោងតាមរបាយការណ៍របស់មន្ទីរធនធានទឹក និងឧតុនិយមខេត្ត បានប្រកាសនៅថ្ងៃនេះ ។
នៅក្នុងរបាយការណ៍បានបង្ហាញថា កាលពីម្សិលមិញថ្ងៃទី២៥ ខែកញ្ញា ទឹកទន្លេមេគង្គមានកំពស់តែ៧,៤០ម៉ែត្រ ប៉ុន្តែនៅព្រឹកថ្ងៃទី២៦ កញ្ញានេះវិញ ទឹកមានកំពស់៨,៣០ម៉ែត្រ ពោលគឺទឹកហក់ឡើងខ្ពស់ជាងថ្ងៃមិលមិញ០,៩០ម៉ែត្រ ដែលកំពស់ទឹកហោះឡើងខ្ពស់ដូច្នេះ គឺពុំធ្លាប់មាននោះទេ នាពេលកន្លងមក។
លោកប៉ាង ប៉េង ប្រធានមន្ទីរធនធានទឹក និងឧតុនិយម បានឲ្យដឹងថា ទឹកទន្លេមេគង្គហក់ឡើងលឿនដូច្នេះ ដោយសារប៉ុន្មានថ្ងៃនេះនៅតំបន់ខាងលើនៃខេត្តស្ទឹងត្រែង និងក្នុងខេត្តស្ទឹងត្រែងទាំងមូល មានភ្លៀងធ្លាក់គ្រប់ទីកន្លែងពីតិចទៅមធ្យម។
លោកបន្តថា ហើយនៅថ្ងៃទី២៦ ខែកញ្ញានេះដែរ ទឹកទន្លេទាំង៣នៅខេត្តស្ទឹងត្រែងមានកំពស់ខុសៗគ្នា ដោយ ១- ទឹកទន្លេមេគង្គថ្ងៃនេះមានកំពស់៨,៣០ម៉ែត្រ ចំណុចប្រកាសអាសន្នគឺ១០,៧០ម៉ែត្រ, ២-ទន្លេសេសាន មានកំពស់៨,២៥ម៉ែត្រ ចំណុចប្រកាសអាសន្ន១០,៥០ម៉ែត្រ និង៣-ទន្លេសេកុងទឹកមានកំពស់៩,៥២ម៉ែត្រ ចំណុចប្រកាសអាសន្ន គឺ១១,៥០ម៉ែត្រ។
សូមបញ្ជាក់ផងដែរថា នៅថ្ងៃទី២៥ និងថ្ងៃទី២៦ ខែកញ្ញា ឆ្នាំ២០២១នេះ នៅចំណុចឃុំតាឡាត់ ស្រុកសេសាន ក៏មានកន្លែងមួយចំនួនកំពុងទឹកជន់លិចផងដែរ។
ចែករំលែកព័តមាននេះ