រាជធានីភ្នំពេញ ៖ ក្រោយការសម្រុកធ្វើតេស្តសំណាកលើព្រះសង្ឃ និងអ្នកស្នាក់នៅក្នុងវត្តអារាមជាង ១៥០ វត្តនៅទូទាំងរាជធានីភ្នំពេញ មន្ត្រីជាន់ខ្ពស់នៃមន្ទីរធម្មការ និងសាសនា រាជធានីភ្នំពេញបានឱ្យដឹងថា លទ្ធផលយកសំណាករកមេរោគកូវីដ១៩ដល់ព្រះសង្ឃ និងអ្នកស្នាក់នៅក្នុងវត្តទូទាំងរាជធានីភ្នំពេញ រកឃើញវិជ្ជមានកូវីដ១៩ចំនួន១៤១អង្គ/នាក់ ក្នុងចំណោមអ្នកយកសំណាកចំនួន៨៩៧៥អង្គ/នាក់ ។
លោក ទេព គង្គា ប្រធានមន្ទីរធម្មការ និងសាសនារាជធានីភ្នំពេញ បានឱ្យកោះសន្តិភាពដឹងមុននេះបន្តិចថា ព្រះសង្ឃ គណៈកម្មការអាចារ្យ និងសិស្សនិស្សិតស្នាក់នៅតាមវត្តក្នុងរាជធានីភ្នំពេញ បានយកសំណាករកមេរោគកូវីដ១៩រួចរាល់អស់ហើយ គឺចំនួន៨៩៧៥អង្គ/នាក់ ក្នុងចំណោមវត្តចំនួន១៥០វត្តត្រូវបានក្រុមការងារសុខាភិបាលយកសំណាករកមេរោគកូវីដ១៩ បានរកឃើញវិជ្ជមានកូវីដ១៩ចំនួន១៤១អង្គ/នាក់ ក្នុងនោះព្រះសង្ឃមានចំនួន៩៧ អាចារ្យចំនួន៩នាក់ ដូនជីតាជីចំនួន១៥នាក់ និង សិស្សនិស្សិតចំនួន២០នាក់ ។
លោក បានបន្តថា បើតាមតួលេខពិតប្រាកដ ព្រះសង្ឃនៅរាជធានីភ្នំពេញ មានជិត៨ពាន់អង្គ ប៉ុន្ដែមានព្រះសង្ឃប្រមាណ៥០០អង្គបាននិមន្តទៅក្រៅប្រទេស ដោយជាប់ការបិទ ឬ ធ្វើចត្តាឡីស័កនៅទីនោះ និងក៏មានព្រះសង្ឃមួយចំនួនបាននិមន្តទៅតាមខេត្តរួចចូលព្រះវស្សានៅទីនោះតែម្ដង ជាក់ស្ដែងព្រះសង្ឃនៅពេលនេះមានចំនួន៧៦១៧អង្គ។
លោក ទេព គង្គា បានបញ្ជាក់ថា វត្តនៅរាជធានីភ្នំពេញមានចំនួន១៥៤វត្ត តែពេលនេះវត្តដែលយកសំណាករកមេរោគកូវីដ១៩មានចំនួន១៥០វត្ត ចំណែក៤វត្តទៀត មានវត្តខ្លះបានយកសំណាករួចហើយ និងវត្តខ្លះមានលទ្ធភាពយកសំណាកខ្លួនឯង ។
យោងតាមរបាយការណ៍របស់មន្ទីរធម្មការ និងសាសនារាជធានីភ្នំពេញ បានឱ្យដឹងថា ក្នុងចំណោម វត្តអារាមក្នុងខណ្ឌទាំង ១៤ ក្នុងរាជធានី គឺវត្តនៅខណ្ឌច្បារអំពៅ រកឃើញឆ្លងច្រើនជាងគេ គឺមានចំនួន ៨៨ អង្គ/នាក់ (ព្រះសង្ឃចំនួន ៧១អង្គ គណៈកម្មការអាចារ្យ ចំនូន ២នាក់ តាជីយាយជី ៧នាក់ និងនិស្សិតស្នាក់នៅវត្តចំនួន ៨ នាក់)
បន្ទាប់មកគឺ ខណ្ឌមានជ័យ ចំនួន ១២ អង្គ/នាក់ (ព្រះសង្ឃ ៣ អង្គ គណៈកម្មការវត្តចំនួន ៤នាក់ យាយជីតាជី១នាក់ និងនិស្សិតស្នាក់នៅវត្តចំនួន ៤នាក់) និងខណ្ឌ ៧ មករា ចំនូន ១២ អង្គ/នាក់ (មានព្រះសង្ឃ៧ អង្គ គណៈកម្មការវត្ត ១នាក់ យាយជីតាជី ២នាក់ និងនិស្សិតស្នាក់នៅវត្ត ២នាក់) ។ យ៉ាងណាមិញក្រៅពីនោះគឺ វត្តអារាម ខ្លះរកឃើញវិជ្ជមានចំនួនតិចតូច ត្រឹម ១ អង្គ ឬទៅ ៥អង្គ/នាក់ តែប៉ុណ្ណោះ ក្នុងមួយ ខណ្ឌៗ ។
គួរបញ្ជាក់ផងដែរថា សម្តេចតេជោហ៊ុន សែន នាយករដ្ឋមន្ត្រីកម្ពុជាបានប្រកាសឱ្យដឹងថា ក្រុមគ្រូពេទ្យបានយកសំណាកនៅវត្តអារាមនៅរាជធានីភ្នំពេញ និងបានរកឃើញថា ស្ទើរតែពាក់កណ្តាល នៃវត្តសរុប នៅក្នុងទីក្រុងភ្នំពេញនេះ គឺមានឆ្លងនៃជំងឺកូវីដ-១៩ ។
នៅក្នុងសារសម្លេងពិសេសមានរយៈពេលជិត ៣០ នាទី សម្តេចតេជោ ហ៊ុន សែន បានគោរពក្រាបថ្វាយបង្គុំ ដល់សម្តេចព្រះសង្ឃរាជទាំងពីគណៈ សម្តេចព្រះសង្ឃនាយក សម្តេចព្រះសង្ឃនាយករង ក៏ដូចជាបងប្អូនជនរួមជាតិជាពុទ្ធបរិសទ្ធខ្មែរ ថា វាជារឿងពិតគួរឱ្យសោកស្តាយ ដែលថ្ងៃនេះ គឺជាថ្ងៃបិណ្ឌទី ៤ ដែលបងប្អូនមិនបានប្រារព្ធនូវពិធី ក្នុងការកាន់បិណ្ឌ ឆ្ពោះទៅរកបុណ្យភ្ជុំ ដោយសារតែរាជរដ្ឋាភិបាលបានសម្រេចផ្អាកពិធីកាន់បិណ្ឌ និងបុណ្យភ្ជុំបិណ្ឌ ដើម្បីទប់ស្កាត់ការឆ្លងនិងការរីករាលដាលនៃវីរុសកូវីដ-១៩ ។
សម្តេចតេជោ បានមានប្រសាសន៍បន្តថា ការចាប់ផ្តើមរបស់យើង គឺទាក់ទិនជាមួយនឹងការឆ្លងរីករាលដាល នៃកូវីដ-១៩ ហើយដែលម្សិលមិញនេះ ខាងក្រុមគ្រូពេទ្យបានយកសំណាកនៅ គ្រប់វត្ត ស្ទើរតែពាក់កណ្តាលនៃវត្ត នៅក្នុងទីក្រុងភ្នំពេញនេះ គឺមានឆ្លងនៃជំងឺកូវីដ-១៩ នេះ » ៕
ចែករំលែកព័តមាននេះ