តុលាការ ខេត្តកែប ដំណើរការហើយ នៅថ្ងៃទី២៤កញ្ញានេះ
- កែប
ខេត្តកែប៖ នៅថ្ងៃទី២៤ ខែកញ្ញា ជាថ្ងៃខួប ២៨ឆ្នាំ នៃថ្ងៃប្រកាសឲ្យប្រើប្រាស់ជាផ្លូវការនូវរដ្ឋធម្មនុញ្ញ ថ្ងៃ២៤កញ្ញា ឆ្នាំ១៩៩៣ គឺនៅថ្ងៃទី២៤កញ្ញានេះ លោក…
ខេត្តកែប៖ នៅថ្ងៃទី២៤ ខែកញ្ញា ជាថ្ងៃខួប ២៨ឆ្នាំ នៃថ្ងៃប្រកាសឲ្យប្រើប្រាស់ជាផ្លូវការនូវរដ្ឋធម្មនុញ្ញ ថ្ងៃ២៤កញ្ញា ឆ្នាំ១៩៩៣ គឺនៅថ្ងៃទី២៤កញ្ញានេះ លោក កើត រិទ្ធ រដ្ឋមន្ត្រីក្រសួងយុត្តិធម៌ បានអញ្ជើញជាអធិបតី ក្នុងពិធីប្រកាសដាក់ឱ្យដំណើរការជាផ្លូវការ សាលាដំបូងខេត្តកែប និងអយ្យការអមសាលាដំបូងខេត្តកែប និងពិធីប្រកាសចូលកាន់មុខតំណែងជាផ្លូវការរបស់ប្រធានសាលាដំបូងខេត្តកែប និងព្រះរាជអាជ្ញានៃអយ្យការអមសាលាដំបូងខេត្តកែប។
លោក ហន សុខេមរិន ត្រូវបានតែងតាំង ជាប្រធានសាលាដំបូងខេត្តកែប និងលោក ខាន់ សុផល ជាព្រះរាជអាជ្ញានៃអយ្យការអមសាលាដំបូងខេត្តកែប។ ខេត្តកែប កន្លងមក មានតុលាការសាលាដំបូង ស្ថិតនៅជាមួយនឹងខេត្តកំពត ដោយសារតែខេត្តកែប ទើបបង្កើតថ្មី និងមានទំហំតូចផង។
លោករដ្ឋមន្ត្រី កើត រិទ្ធ លើកឡើងថា «ការដាក់ឱ្យដំណើរការសាលាដំបូងខេត្តកែប និងអយ្យការអមសាលាដំបូងខេត្តកែប នៅថ្ងៃទី២៤ ខែកញ្ញា ឆ្នាំ២០២១ នេះ គឺដើម្បីចូលរួមអបអរសាទរខួបលើកទី២៨ នៃទិវាប្រកាសរដ្ឋធម្មនុញ្ញនៃព្រះរាជាណាចក្រកម្ពុជា (២៤ កញ្ញា ១៩៩៣-២៤ កញ្ញា ២០២១)។ ថ្ងៃទី២៤ ខែកញ្ញានេះ ក៏នឹងត្រូវចារទុកជាថ្ងៃប្រវតិ្តសាស្ត្រថ្មីមួយទៀត សម្រាប់ទឹកដីខេត្តកែប ដែលនឹងមានសាលាដំបូង និងអយ្យការអមសាលាដំបូង ដើម្បីបម្រើសេវាយុតិ្តធម៌ជូនប្រជាពលរដ្ឋ កាន់តែងាយស្រួល និងកាន់តែមានប្រសិទ្ធភាព សម្រាប់ការធានាថែរក្សាសុខសន្តិភាព ស្ថិរភាពសង្គម និងសណ្តាប់ធ្នាប់សាធារណៈ»។
លោករដ្ឋមន្ត្រី បន្ថែមថា «សាលាដំបូងខេត្តកែប និងអយ្យការអមសាលាដំបូងខេត្តកែប ដែលជាសមិទ្ធផលថ្មីមួយទៀត ក្នុងវិស័យយុត្តិធម៌ សម្រាប់ប្រជាពលរដ្ឋខេត្តកែប ត្រូវបានដាក់ឱ្យដំណើរការដោយផ្អែកតាមការវិវត្តនៃស្ថានភាពសេដ្ឋកិច្ចសង្គមរបស់ខេត្តកែប និងផ្អែកតាមច្បាប់ស្តីពីការរៀបចំអង្គការតុលាការ ដែលតម្រូវឱ្យមានសាលាដំបូងមួយនៅបណ្តារាជធានី-ខេត្តនៅទូទាំងប្រទេស ព្រមទាំងស្របតាមទិសដៅនៃកម្មវិធីកែទម្រង់ច្បាប់ និងវិស័យយុត្តិធម៌ សំដៅបង្ខិតការផ្តល់សេវាយុត្តិធម៌ឱ្យកាន់តែខិតជិតប្រជាពលរដ្ឋ និងផ្តល់ភាពងាយស្រួលដល់ប្រជាពលរដ្ឋខេត្តកែប តាមរយៈការកាត់បន្ថយការចំណាយពេលវេលា និងថវិកាក្នុងការធ្វើដំណើរទៅទទួលយកសេវាយុតិ្តធម៌នៅសាលាដំបូងខេត្តកំពត និងអយ្យការអមសាលាដំបូងខេត្តកំពត។ ទន្ទឹមនេះ វត្តមាននៃសាលាដំបូងខេត្តកែប និងអយ្យការអមសាលាដំបូងខេត្តកែបនេះ នឹងអាចជួយសម្រាលបន្ទុកសំណុំរឿងរបស់សាលាដំបូងខេត្តកំពត ជាពិសេស អាចជួយជំរុញឱ្យមានការដោះស្រាយបណ្តឹងរបស់ប្រជាពលរដ្ឋនៅក្នុងខេត្តកែប បានកាន់តែឆាប់រហ័សជាងមុនទៅទៀត»។
ជាមួយគ្នានេះ លោករដ្ឋមន្ត្រី កើត រិទ្ធ ក៏បានណែនាំ និងផ្តាំផ្ញើដល់ប្រធានសាលាដំបូង ខេត្តកែប និងព្រះរាជអាជ្ញានៃអយ្យការអមសាលាដំបូង ខេត្តកែប ឱ្យខិតខំយកចិត្តទុកដាក់ក្នុងការបំពេញភារកិច្ចរបស់ខ្លួន ឱ្យបានម៉ឺងម៉ាត់ប្រកបដោយស្មារតីទទួលខុសត្រូវខ្ពស់ ក្នុងការដឹកនាំស្ថាប័នតុលាការ និងស្ថាប័នអយ្យការ ឱ្យមានការរីកចម្រើន ជាពិសេស ត្រូវមានកិច្ចសហការឱ្យបានល្អប្រសើរ ជាមួយអាជ្ញាធរមានសមត្ថកិច្ច និងមន្ត្រីអនុវត្តច្បាប់ទាំងអស់ ក្នុងស្មារតីគោរពគ្នាទៅវិញទៅមក ដោយផ្អែកតាមតួនាទី និងភារកិច្ចដែលច្បាប់ប្រគល់ឱ្យរៀងៗខ្លួនប្រកបដោយវិជ្ជាជីវៈ និងភាពស្មោះត្រង់ជាទីបំផុត។
ក្រសួងយុត្តិធម៌ បានគូសបញ្ជាក់ថា សាលាដំបូងខេត្តកែប និងអយ្យការអមសាលាដំបូង ខេត្តកែប មានសមត្ថកិច្ចលើសំណុំរឿង ដែលទទួលពីប្រជាពលរដ្ឋ ចាប់ពីថ្ងៃទី២៤ ខែកញ្ញា ឆ្នាំ២០២១ នេះតទៅ។ ចំពោះសំណុំរឿង ដែលមានមុនថ្ងៃទី២៤ ខែកញ្ញា ឆ្នាំ២០២១ ត្រូវបន្តស្ថិតនៅក្រោមចំណាត់ការរបស់សាលាដំបូងខេត្តកំពត និងអយ្យការអមសាលាដំបូង ខេត្តកំពត ដដែល៕
ចែករំលែកព័តមាននេះ