អ្នកដែលទៅ វត្តចំពុះក្អែក បិណ្ឌទី១ សូមធ្វើតេស្តរកមេរោគកូវីដ-១៩
រាជធានីភ្នំពេញ ៖ លោក ចេង មុនីរ៉ា អភិបាល នៃគណៈអភិបាលខណ្ឌច្បារអំពៅ នៅថ្ងៃទី២៣ ខែកញ្ញា ឆ្នាំ២០២១…
រាជធានីភ្នំពេញ ៖ លោក ចេង មុនីរ៉ា អភិបាល នៃគណៈអភិបាលខណ្ឌច្បារអំពៅ នៅថ្ងៃទី២៣ ខែកញ្ញា ឆ្នាំ២០២១ បានអំពាវនាវដល់បងប្អូនប្រជាពលរដ្ឋដែលបានអញ្ជើញទៅកាន់បិណ្ឌទី១ ត្រូវនឹងថ្ងៃពុធ ទី២២ ខែកញ្ញា ឆ្នាំ២០២១ នៅវត្តមុនីសុវណ្ណ ហៅវត្តចំពុះក្អែក ស្ថិតក្នុងសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ត្រូវយកចិត្តទុកដាក់តាមដានសុខភាពរបស់ខ្លួន ករណីចេញរោគសញ្ញាសង្ស័យកូវីដ-១៩ សូមអញ្ជើញទៅធ្វើតេស្តសំណាក នៅតាមទីតាំងដែលជិតបំផុត ។
ដោយសារមានករណីជំងឺកូវីដ-១៩ នៅវត្តចំពុះក្អែក សង្កាត់ព្រែកថ្មី ដូច្នេះរដ្ឋបាលខណ្ឌច្បារអំពៅ សូមអញ្ជើញបងប្អូនប្រជាពលរដ្ឋដែល បានចូលទៅទីតាំងនិងពេលវេលាខាងលើ ទៅធ្វើតេស្តសំណាក រកមេរោគកូវីដ-១៩ នៅទីតាំងមជ្ឈមណ្ឌលកោះពេជ្រ (ក្រោយអគារស៊ីធីហល City hall) ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ជារៀងរាល់ថ្ងៃចាប់ពីវេលាម៉ោង ៨:០០ព្រឹក រហូតដល់ម៉ោង ១៧:០០រសៀល ។
សូមចូលរួមពាក់ម៉ាស់ រក្សាគម្លាត និង ឧស្សាហ៍លាងដៃ គ្រប់ទីកន្លែង គ្រប់ពេលវេលា ៕
ចែករំលែកព័តមាននេះ