ឈប់សង្ស័យទៀត! ជាសះពីជំងឺកូវីដ បាន៤ខែ ស្រូតទៅទទួលការចាក់វ៉ាក់សាំងនៅទីតាំងទាំងនេះ
- ភ្នំពេញ
រាជធានីភ្នំពេញ ៖ ចាត់ទុកជាដំណឹងដ៏ល្អមួយសម្រាប់បងប្អូនដែលធ្លាប់កើតកូវីដ-១៩ ហើយទទួលបានការព្យាបាលជាសះស្បើយ
រាជធានីភ្នំពេញ ៖ ចាត់ទុកជាដំណឹងដ៏ល្អមួយសម្រាប់បងប្អូនដែលធ្លាប់កើតកូវីដ-១៩ ហើយទទួលបានការព្យាបាលជាសះស្បើយកន្លងមក នឹងទទួលបានការចាក់វ៉ាក់សាំងបង្ការជំងឺឆ្លងមួយនេះ ក្រោយពីបានព្យាបាលជាសះស្បើយពីជំងឺកូវីដ-១៩ រយៈពេលចាប់ពី ៤ខែ ឡើង នៅតាមមន្ទីរពេទ្យរដ្ឋទាំងថ្នាក់ជាតិ និងថ្នាក់ក្រោមជាតិ ។ នេះបើយោងតាមសេចក្តីជូនព័ត៌មានរបស់ក្រសួងសុខាភិបាល ។
លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាលបានបញ្ជាក់នៅក្នុង សេចក្តីជូនព័ត៌មានរបស់ក្រសួងសុខាភិបាល ចុះថ្ងៃទី២២ កញ្ញា ២០២១ ថា គណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខ័ណ្ឌទូទាំងប្រទេស (គ.វ.ក-១៩) សូមជម្រាបជូនដល់ សាធារណជនជ្រាបថា យោងតាមការណែនាំដ៏ខ្ពង់ខ្ពស់របស់ សម្តេចតេជោនាយករដ្ឋមន្ត្រី ក្នុងការចាក់វ៉ាក់សាំងកូវីដ-១៩ ជូនដល់អ្នកដែលបានព្យាបាលជាសះស្បើយពីជំងឺកូវីដ-១៩ ព្រមទាំងយោងតាមអនុសាសន៍របស់អង្គការសុខភាពពិភពលោក (World Health Organization) ដែលបានណែនាំឱ្យប្រជាពលរដ្ឋដែលបានព្យាបាលជាសះស្បើយពីជំងឺកូវីដ-១៩ អាច មកទទួលការចាក់វ៉ាក់សាំងកូវីដ-១៩ ដើម្បីបង្កើនភាពសាំទប់ទល់នឹងវីរុសកូវីដ-១៩ ដូចនេះ (គ.វ.ក-១៩) សូមគោរព អញ្ជើញប្រជាពលរដ្ឋទាំងអស់ ដែលមានអាយុចាប់ពី៦ឆ្នាំឡើង ដែលបានព្យាបាលជាសះស្បើយពីជំងឺកូរីដ-១៩ ចាប់ពី៤ខែឡើង ហើយមិនទាន់បានចាក់វ៉ាក់សាំងកូវីដ-១៩ សូមទៅចាក់វ៉ាក់សាំងកូវីដ-១៩ ដោយស្ម័គ្រចិត្ត ។
លោកជំទាវវេជ្ជបណ្ឌិត ឱ វណ្ណឌីន បានបន្តថា ស្របពេលជាមួយនឹងបរិបទបច្ចុប្បន្ន ដែលកំពុងមានការរាតត្បាតនៅលើពិភពលោក ក៏ដូចជាតាមបណ្តាប្រទេសនីមួយៗពីវីរុសកូវីដ-១៩ បំប្លែងថ្មី ជាពិសេសវីរុសបំប្លែងខ្លួនថ្មីប្រភេទ ដែលតា (Delta) កំពុងចរាចរយ៉ាងសកម្មនៅប្រទសជាច្រើន និងកម្ពុជាផងដែរនោះ លោកជំទាវអំពាវនាវឱ្យពលរដ្ឋខ្មែរអាយុចាប់ពី ៦ ឆ្នាំឡើង ក្រោយពីទទួលបានការព្យាបាលជាសះស្បើយពីជំងឺកូវីដ-១៩ ចាប់ពី ៤ ខែឡើង សូមរួសរាន់ស្ម័គ្រចិត្តទៅចាក់វ៉ាក់សាំងកូវីដ-១៩ ឱ្យបានគ្រប់គ្នា ដើម្បីបង្កើតភាពសុំាក្នុងសរីរាង្គរបស់ខ្លួន និងភាពសុំាក្នុងសហគមន៍ សម្រាប់ទប់ទល់ពីការវាយលុកនៃវីរុសកូវីដ-១៩ កាត់បន្ថយភាពធ្ងន់ធ្ងរនៃអ្នកជំងឺកូវីដ-១៩ កាត់បន្ថយនូវអត្រាសម្រាកពេទ្យ ក៏ដូចជាកាត់បន្ថយជាអតិបរមា នូវអត្រាស្លាប់ដែលបណ្តាលមកពីជំងឺកូវីដ-១៩ ។
សម្រាប់មន្ត្រីរាជការថ្នាក់ជាតិ ដែលបានព្យាបាលជាសះស្បើយពីជំងឺកូវីដ-១៩ ចាប់ពី ៤ ខែឡើង ហើយមិនទាន់បានចាក់វ៉ាក់សាំង សូមរួសរាន់ទៅទទួលការចាក់វ៉ាក់សាំងបង្ការកូវីដ-១៩ នៅមន្ទីរពេទ្យ ចំនួន ៥ ដូចជា ពេទ្យកាល់ម៉ែត មន្ទីរពេទ្យព្រះអង្គឌួង មន្ទីរពេទ្យកុមារជាតិ មន្ទីរពេទ្យមិត្តភាពខ្មែរ-សូវៀត និងមជ្ឈមណ្ឌលជាតិគំាពារមាតា និងទារក ។ និងមន្ត្រីរាជការថ្នាក់ក្រោមជាតិ ការចាក់វ៉ាក់សាំងជូនក្រោយព្យាបាលជាសះស្បើយពីកូវីដ-១៩ គឺនៅតាមមន្ទីរពេទ្យបង្អែករាជធានី-ខេត្ត និងតាបណ្តាទីតាំងចាក់វ៉ាកសាំងកូវីដ-១៩ មួយចំនួនទៀតដែលរដ្ឋបាលរាជធានី-ខេត្ត កំពុងបើកដំណើរការចាក់វ៉ាក់សាំងជូនពលរដ្ឋដែលនៅសេសសល់ ។
ទន្ទឹមនឹងនោះលោកជំទាវវេជ្ជបណ្ឌិត បានណែនាំដល់ ប្រធានអនុគណៈកម្មការចំពោះកិច្ច ចាក់វ៉ាក់សាំងកូវីដ-១៩ ក្នុងក្របខណ្ឌរាជធានី-ខេត្ត ណែនាំប្រធានមន្ទីរសុខាភិបាលរាជធានី-ខេត្ត ឱ្យគ្រប់ទីតាំងចាក់វ៉ាក់សាំងកូវីដ-១៩ ទាំងអស់ឱ្យផ្តល់ការចាក់វ៉ាក់សាំងកូវីដ-១៩ ជូនដល់ក្រុមគោលដៅដែលជាអ្នកទទួលបានការព្យាបាលជាសះស្បើយកូវីដ ១៩ បានចាប់ពី ៤ខែឡើងទៅ ៕
ចែករំលែកព័តមាននេះ