ភ្នំពេញ៖ ក្រសួងសុខាភិបាល បានប្រកាសនៅថ្ងៃទី២២ ខែកញ្ញានេះថា ប្រជាពលរដ្ឋ ក្រោយពីបានព្យាបាលជាសះស្បើយពីជំងឺកូវីដ-១៩ រយៈពេលចាប់ពី ៤ខែឡើង អាចទៅចាក់វ៉ាក់សាំងកូវីដ១៩ បាន។ កន្លែងចាក់វ៉ាក់សាំង នៅភ្នំពេញ សម្រាប់មន្ត្រីរាជការថ្នាក់ជាតិ អាចទៅចាក់ នៅមន្ទីរពេទ្យកាល់ម៉ែត មន្ទីរពេទ្យព្រះអង្គឌួង មន្ទីរពេទ្យកុមារជាតិ មន្ទីរពេទ្យមិត្តភាពខ្មែរ-សូវៀត និងមជ្ឈមណ្ឌលជាតិគាំពារមាតា និងទារក។
តាមសេចក្តីជូនដំណឹង ចំពោះមន្ត្រីរាជការថ្នាក់ក្រោមជាតិ និងប្រជាពលរដ្ឋទូទៅ ដែលស្ថិតនៅក្រោមឱវាទរដ្ឋបាលរាជធានីខេត្ត ដែលបានព្យាបាលជាសះស្បើយពីជំងឺកូវីដ១៩ ចាប់ពី ៤ខែឡើង ហើយមិនទាន់បានចាក់វ៉ាក់សាំងកូវីដ១៩ សូមអញ្ជើញទៅចាក់វ៉ាក់សាំងកូវីដ១៩ នៅតាមមន្ទីរពេទ្យបង្អែករាជធានីខេត្ត និងនៅតាមបណ្តាទីតាំងចាក់វ៉ាក់សាំងកូវីដ១៩ មួយចំនួនទៀត ដែលរដ្ឋបាលរាជធានីខេត្ត កំពុងបើកដំណើរការចាក់វ៉ាក់សាំងកូវីដ១៩ ជូនប្រជាពលរដ្ឋ ដែលនៅសេសសល់។
សេចក្តីជូនដំណឹង លើកឡើងថា ការតម្រូវឲ្យអ្នកកើតជំងឺកូវីដ១៩ ដែលបានព្យាបាលជាសះស្បើយ ក្នុងរយៈពេល ៤ខែឡើង ទៅចាក់វ៉ាក់សាំងនេះ ធ្វើឡើងតាមការណែនាំរបស់សម្តេចតេជោ ហ៊ុន សែន និងតាមអនុសាសន៍របស់អង្គការសុខភាពពិភពលោក។ ម្យ៉ាងទៀត ក៏ដើម្បីបង្កើនភាពស៊ាំ ទប់ទល់នឹងវីរុសកូវីដ១៩។
សេចក្តីប្រកាស លើកឡើងថា ប្រជាពលរដ្ឋ ដែលកើតកូវីដ ហើយព្យាបាលជាសះស្បើយ ចាប់ពី ៤ខែឡើង ដែលមិនទាន់បានចាក់វ៉ាក់សាំងកូវីដ១៩ អាចទៅចាក់វ៉ាក់សាំងដោយស្ម័គ្រចិត្ត ចាប់ពីថ្ងៃទី២២ ខែកញ្ញានេះតទៅ គឺត្រូវមានអាយុចាប់ពី ៦ឆ្នាំឡើង។
សូមរម្លឹកថា កន្លងមក អ្នកឆ្លងជំងឺកូវីដ១៩ ហើយក្រោយពីជាសះស្បើយ មិនត្រូវបានអនុញ្ញាតឲ្យចាក់វ៉ាក់សាំងឡើយ ដោយថ្នាក់ដឹកនាំក្រសួងសុខាភិបាល លើកឡើងថា ពួកគេមានភាពស៊ាំនឹងជំងឺកូវីដ១៩ ហើយ។ តែក៏នៅតែមានលទ្ធភាពលាប់ ឆ្លងឡើងវិញដែរ៕
ចែករំលែកព័តមាននេះ