ខេត្តព្រះសីហនុ ៖ ខេត្តព្រះសីហនុ ជាខេត្តមួយដែលមានសោភ័ណភាពស្រស់ស្អាត ស្ថិតនៅភាគនិរតីនៃប្រទេស និងជាខេត្តដែលគួរឲ្យចាប់អារម្មណ៍បំផុតសម្រាប់ភ្ញៀវទេសចរជាតិ និងទេសចរអន្តរជាតិ ព្រោះមានឆ្នេរសមុទ្រដ៏ស្រស់ស្អាត ខ្យល់អាកាសបរិសុទ្ធ និងបណ្ដុំដោយកោះជាច្រើន ។ កោះក្នុងខេត្តព្រះសីហនុមានចំនួន៣២កោះ តែកោះដែលបានវិនិយោគជាប់លាប់ និងកំពុងដំណើរការទទួលភ្ញៀវទេសចរទស្សនាកម្សាន្ត គឺមានចំនួនតិចតួចនៅឡើយ ។
អ្វីដែលគួរឱ្យកត់សម្គាល់នោះ ភាគច្រើន ឬស្ទើរតែទាំងអស់នៃទុនវិនិយោគទៅលើបណ្ដាកោះទាំងនោះ ជាទុនវិនិយោគមកពីខាងក្រៅស្រុក ហើយនៅមិនទាន់មានទុនវិនិយោគក្នុងស្រុកដែលបានដំណើរការទទួលភ្ញៀវទេសចរនៅឡើយទេ ។ តែនៅពេលឆាប់ៗនេះ កោះដែលវិនិយោគដោយទុនក្នុងស្រុក នឹងចាប់ផ្ដើមបើកដំណើរការទទួលភ្ញៀវទេសចរហើយ ។
លោក យន្ត មីន អភិបាលខេត្តព្រះសីហនុ បានមានប្រសាសន៍ថា ៖ « កោះនៅក្នុងខេត្តព្រះសីហនុទាំងមូលមានចំនួន៣២កោះ តែកោះដែលបានវិនិយោគ និងដើរដោយរលូនល្អមានតែ៣កោះប៉ុណ្ណោះ ។ ក្នុងចំណោមកោះដែលបានវិនិយោគ និងដើរដោយរលូននោះ មានកោះសង្សារ ជាទុនវិនិយោគក្រៅស្រុក, កោះក្របី ក៏ជាទុនក្រៅស្រុក ហើយមួយផ្នែកនៃកោះឫស្សី ក៏ជាទុនវិនិយោគក្រៅស្រុកដែរ ។ សរុបមក ការវិនិយោគនៅតាមកោះស្ទើរតែទាំងអស់ក្នុងខេត្តព្រះសីហនុ គឺជាទុនក្រៅស្រុក ហើយក្រៅពីនោះ ក៏មានទុនក្នុងស្រុកដែរ គ្រាន់តែមិនទាន់បានដើរដោយរលូននៅឡើយទេ » ។
លោកមានប្រសាសន៍បន្តថា ៖ « នៅតាមបណ្ដាកោះក្នុងដែនសមុទ្រខេត្តព្រះសីហនុនេះឃើញថា មានភ្ញៀវទេសចរទៅកម្សាន្តច្រើន ដោយសារតែនៅតាមកោះទាំងនោះមានឆ្នេរស្រស់ស្អាត ទេសភាពល្អ ជាពិសេស មានបរិយាកាស និងខ្យល់អាកាសបរិសុទ្ធ ដែលធ្វើឱ្យភ្ញៀវទេសចរទៅទស្សនាជាប់មិនដាច់ ។ បើយើងនិយាយពីកោះរុង ដែលជាផ្នែកមួយនៃការវិនិយោគរបស់ក្រុមហ៊ុនរ៉ូយ៉ាល់គ្រុប តែដោយមិនទាន់បានសាងសង់ឱ្យរួចរាល់ចប់សព្វគ្រប់នោះ យើងក៏មិនទាន់អាចថា ដើរដោយរលូនបានទេ តែនៅកោះនោះកំពុងនឹងរៀបចំសាងសង់ជាសណ្ឋាគារលំដាប់ផ្កាយប្រាំមួយសម្រាប់ទទួលភ្ញៀវទេសចរ » ។
យោងតាមរបាការណ៍សិ្ថតិទេសចរណ៍របស់ក្រសួងទេសចរណ៍បានឲ្យដឹងថា ក្នុងឆ្នាំ២០១៥កន្លងមក កម្ពុជាទទួលបានភ្ញៀវទេសចរអន្តរជាតិ៤,៧៨លាននាក់ បន្តកើនឡើង៦,១% ថែមទៀត ក្នុងនោះតំបន់ឆ្នេរសមុទ្រកើនឡើង២% ។
ពាក់ព័ន្ធនឹងបញ្ហាមួយចំនួនដែលធ្វើឱ្យមានការរាំងស្ទះដល់ការវិនិយោគនៅតាមកោះនាពេលកន្លងមក ក៏ដូចជាពេលបច្ចុប្បន្ននេះ លោកយន្ដ មីន បានបញ្ជាក់ថា ៖ « ដោយសារទាក់ទងជាមួយនឹងច្បាប់ ។ អ្នកមានទុនធំបានសុំច្បាប់អភិវឌ្ឍន៍នៅតាមកោះនោះហើយ តែមិនទាន់បានអភិវឌ្ឍន៍ ដែលជាកត្តាធ្វើឱ្យអ្នកមានទុនតិចតួចមិនហ៊ានធ្វើ ដោយសារតែកោះនោះមានគេអ្នកសុំច្បាប់រួចទៅហើយ ដែលអាចធ្វើឱ្យគាំងដល់ដំណើរការអភិវឌ្ឍន៍ » ។
លោកអភិបាលខេត្តរូបនេះ ក៏បានបញ្ជាក់ផងដែរថា ៖ « ពាក់ព័ន្ធនឹងការសុំច្បាប់វិនិយោគហើយតែមិនអភិវឌ្ឍន៍នោះ លោកនឹងចាត់ចែងឬធ្វើសំណើទៅថ្នាក់លើ ដើម្បីដកហូតមកវិញ និងប្រគល់ទៅឱ្យវិនិយោគិនណាដែលមានទុន ហើយអភិវឌ្ឍន៍ភ្លាមៗ ។ យើងមិនអាចបង្កកគម្រោងវិនិយោគនោះឱ្យនៅដដែលនោះទេ ។ បើសិនជាវិនិយោគិនរូបណាសុំបានច្បាប់ហើយតែមិនអភិវឌ្ឍន៍នោះយើងនឹងដកហូតមកវិញ ដើម្បីប្រគល់ទៅឱ្យវិនិយោគិនដែលចង់វិនិយោគពិតប្រាកដ ។ ការដកហូតនូវគម្រោងវិនិយោគនេះ មិនមែនតែនៅតាមកោះទេ សូម្បីតែនៅតាមឆ្នេរមួយចំនួន ក៏ដូចគ្នាដែរ ។ ដូចនេះ សូមឱ្យម្ចាស់គម្រោង ឬអ្នកវិនិយោគដែលសុំបានច្បាប់វិនិយោគហើយ មេត្តារួសរាន់អភិវឌ្ឍន៍គម្រោងរបស់ខ្លួនឱ្យបានឆាប់ៗ ដើម្បីអភិវឌ្ឍន៍តំបន់ទាំងនោះឱ្យមានការរីកចម្រើនឆាប់រហ័ស » ។
គួរបញ្ជាក់ដែរថា នៅពេលថ្មីៗនេះ មានអ្នកវិនិយោគក្នុងស្រុក និងក្រៅស្រុកជាច្រើនបានសហការគ្នាដើម្បីអភិវឌ្ឍន៍តំបន់ទេសចរណ៍តាមឆ្នេរកោះក្នុងខេត្តព្រះសីហនុ ដោយមូលហេតុថា កំណើនភ្ញៀវទេសចរបរទេស និងភ្ញៀវទេសចរក្នុងស្រុកដែលទៅទស្សនាកម្សាន្តនៅតាមបណ្ដាកោះនានា បានកើនឡើងជាលំដាប់ ៕
ចែករំលែកព័តមាននេះ