រាជធានីភ្នំពេញ ៖ នៅក្នុងយុទ្ធនាការចាក់វ៉ាក់សាំងការពារជំងឺកូវីដ១៩ជួនកុមារ មានអាយុចាប់ពី០៦ឆ្នាំ ដល់ក្រោមអាយុ១២ឆ្នាំ នៅក្នុងរាជធានីភ្នំពេញបានចាប់ដំណើរបានរយៈពេល៤ថ្ងៃ មកហើយចាប់ពីថ្ងៃចាប់ផ្តើម កាលពីថ្ងៃទី១៧ ខែកញ្ញា ឆ្នាំ២០២១ ។
នៅក្នុងយុទ្ធនាការនេះ គ្រប់ឪពុកម្តាយគ្រប់រូបបាននាំគ្នាយ៉ាងសស្រាកស្រស្រាំ ដើម្បីនាំកូនទៅចាក់វ៉ាក់សាំង ដើម្បីការពារជំងឺខណៈពេលដែលស្ថានភាពជំងឺកូវីដមិនទាន់បានធូរស្បើយនៅឡើយ ។ អ្វីដែលធ្វើអោយមានការចាប់អារម្មណ៍នៅក្នុងយុទ្ធនាការប៉ុន្មានថ្ងៃនេះ នៅតាមមណ្ឌលសុខភាព ដែលជាទីតាំងចាក់វ៉ាក់សាំងខ្លះអាណាព្យាបាលបានស៊ូទ្រាំ នាំកូនតូចៗមកតម្រង់ជាជួរទាំងកណ្តាលថ្ងៃ ដើម្បីចាក់វ៉ាក់សាំង ខ្លះតម្រង់ជាជួរ ប្រជ្រៀតគ្នា រយៈពេល ៣ថ្ងៃមិនទាន់បានចាក់ផង ។
ដោយឡែក នៅមណ្ឌលសុខភាពទឹកថ្លា ដែលស្ថិតនៅតាមមហាវិថីសហព័ន្ធរ៉ុស្ស៊ី ក្នុងសង្កាត់ទឹកថ្លា ខណ្ឌសែនសុខ នៅវេលាម៉ោង ១១ព្រឹក ថ្ងៃទី២១ ខែកញ្ញា ឆ្នាំ២០២១ ដែលជាម៉ោងបញ្ចប់ការចាក់វ៉ាក់សាំងពេលព្រឹក គេសង្កេតឃើញកុមារតូចៗ និងអាណាព្យាបាលបានចាប់ផ្តើមតម្រង់ជាជួរប្រជ្រៀតគ្នាទាំងកណ្តាលថ្ងៃ ដើម្បីរងចាំចាប់លេខចូលចាក់វ៉ាក់សាំង នៅវេលារសៀលបន្តទៀត ។
ទន្ទឹមនោះ អាណាព្យាបាលក៏បានធ្វើការិះចំពោះការរៀបចំចាក់វ៉ាក់សាំងនេះមិនបានល្អដោយអោយតម្រង់ជួរប្រជ្រៀតគ្នាមិនមានគម្លាតសុវត្ថិភាពវាអាចបង្កអោយកើតមានការនូវហានិភ័យខ្ពស់ចំពោះកុមារដែលទៅចាក់វ៉ាក់សាំងបង្ការនោះ ។
តាមព័ត៌មានអោយដឹងថា ការតម្រង់ជាជួរចាំចាប់លេខនេះមិនមែន តែថ្ងៃនេះទេ គឺចាប់ផ្តើមតាំងពីថ្ងៃចាប់ផ្តើមនៃយុទ្ធនាការចាក់វ៉ាក់សាំងដល់កុមារចាប់ពីអាយុ០៦ឆ្នាំ ដល់១២ឆ្នាំមកម្លេះ ហើយអ្នកខ្លះបានតម្រង់ជាជួររយៈពេល៣ថ្ងៃ ហើយមិនទាន់បានចាក់ផង ។ នេះបើតាមអាណាព្យាបាលដែលកំពុងតែតម្រង់ជាជួរនោះអោយដឹង ។
បងប្រុសម្នាក់ ដែលជាមន្ត្រីនគរបាល នៅក្រសួងមហាផ្ទៃម្នាក់ ដែលមានលំនៅម្តុំទូរទស្សន៍អាស៊ីអាគ្នេយ៍ បានអោយកោះសន្តិភាពដឹង នៅវេលាថ្ងៃត្រង់ទី២១ ខែកញ្ញា ឆ្នាំ២០២១នេះថា គាត់បាននាំកូនប្រុសមកតម្រង់ជាជួរចាំចាប់លេខចាក់វ៉ាក់សាំងនៅមណ្ឌលសុខភាពទឹកថ្លា រយៈពេល៣ថ្ងៃមកហើយ មិនទាន់បានចាក់ផង ដោយសារតែចាប់លេខមិនទាន់គេ ។
អាណាព្យាបាលរូបនោះបានអោយដឹងថា នៅព្រឹកថ្ងៃទី២១ ខែ កញ្ញា ឆ្នាំ២០២១នេះ គាត់បាននាំកូនមកចាក់វ៉ាក់សាំងតាំងពី ម៉ោងប្រមាណ៦ព្រឹក តែចាប់លេខមិនបាន ព្រោះគេយកតែចំនួន ១៨០នាក់ រួចក៏បាននាំកូនត្រឡប់ទៅផ្ទះវិញបាយរួចក៏បាននាំកូនមកតម្រង់ជាជួរចាំចាប់លេខទៀតចាំចាក់នៅពេលល្ងាចទៀត ។
តាមអាណាព្យាបាលរូបនោះបានអោយដឹងទៀតថា ររដ្ឋាភិបាលបានយកចិត្តទុកដាក់ និងគិតគូរយ៉ាងខ្លាំង ក្នុងការចាក់វ៉ាក់សាំងការពារដល់កុមារនេះជាការល្អប្រសើរណាស់ តែការរៀបចំរបស់មណ្ឌលចាក់វ៉ាក់សាំងមិនបានល្អដោយអោយតម្រង់ជាជួរប្រជ្រៀតគ្នា និងកណ្តាលថ្ងៃបែបនេះ ។
តាមស្ត្រីដែលពុំបានអោយដឹងឈ្មោះបានអោយដឹងថា គាត់មានលំនៅមុខមន្ទីរពេទ្យ ព្រះកុសុះមះ ក្នុងភូមិបុរីកម្មករ សង្កាត់ទឹកថ្លា ខណ្ឌសែនសុខបាននាំកូនមកចាក់វ៉ាកសាំង រយៈពេល៣ថ្ងៃមកហើយ តាំងពីថ្ងៃទី១៨ ខែកញ្ញា ឆ្នាំ២០២១ ដោយមកចាំតាំងពីវេលាម៉ោង៦ព្រឹក តម្រង់ជួរ ហើយចាប់លេខត្រឹម១៨០នាក់ អត់បានក៏បានត្រឡប់ទៅផ្ទះវិញ ហើយពេលថ្ងៃត្រង់មកវិញគេចាប់លេខអស់ទៀត ។ ថ្ងៃនេះគាត់លែងត្រឡប់ទៅផ្ទះវិញហើយ គឺនៅចាំតម្រង់ជួរទាំងកណ្តាលថ្ងៃក្តៅ(ម៉ោង១១ព្រឹក)តែម្តង ដើម្បីចាំយកលេខចាក់វ៉ាក់សាំងនៅវេលារសៀល ។
អាណាព្យាបាលផ្សេងៗទៀតដែលម្នាក់ៗកំពុងតែបក់ខ្យល់អោយកូន បានអោយដឹងដូចៗគ្នាថា គាត់បានក្រោកតាំងពីម៉ោងប្រមាណ៦ព្រឹកតែតម្រូវប្រជ្រៀតគ្នាចាប់លេខអត់បានទើបរួសរាន់ដាំបាយអោយកូនញាំរួចហើយមកតម្រង់ជាជួរកណ្តាលថ្ងៃ ដើម្បីចាំយកលេខពេលចាក់ពេលរសៀលចំនួន១៣០នាក់ទៀត ។
តាមគ្រូពេទ្យនៅមណ្ឌលសុខភាពទឹកថ្លា ម្នាក់បានអោយដឹងដោយសារតែចំនួនកុមារដែលមកចាក់វ៉ាក់សាំងច្រើនតម្រូវអោយមានការតម្រង់ជួរ និងរងចាំចាប់លេខទាំងព្រឹក និងល្ងាចទើបអាណាព្យាបាលបានមកតម្រង់ជាជួរចាំយកលេខយ៉ាងច្រើនកុះករតែម្តង។
គួរបញ្ជាក់ថា ក្នុងគ្របខណ្ឌទូទាំងរាជធានីភ្នំពេញបានចាប់ផ្តើមចាក់វ៉ាក់សាំងបង្ការកូវីដ១៩ ជូនដល់កុមារដែលមានអាយុ ចាប់ពី ០៦ឆ្នាំ ដល់ក្រោមអាយុ១២ឆ្នាំក្នុងភូមិសាស្ត្ររាជធានីភ្នំពេញសម្រាប់ដូសទី១ ចាប់ផ្តើមពីថ្ងៃទី១៧ខែកញ្ញា ដល់ថ្ងៃទី០៣ ខែតុលា ឆ្នាំ២០២១និងសម្រាប់ដូសទី២ ចាប់ពីថ្ងៃទី០៨ ដល់ថ្ងៃទី២៤ខែតុលា ឆ្នាំ ២០២១រៀងរាល់ម៉ោង ៨ព្រឹកដល់ម៉ោង៥រសៀលតាមការអញ្ជើញនិងទំនាក់ទំនង់ជាមួយអាជ្ញាធរមូលដ្ឋានដែលមានទីតាំងចំនួន៤២ទីតាំងនៅក្នុងរាជធានីភ្នំពេញ ៕
ចែករំលែកព័តមាននេះ