ខេត្តកណ្តាល៖ កិច្ចប្រជុំសម្របសម្រួល ដោះស្រាយបាតុភាពរវាងម្ចាស់សត្តឃាតដ្ឋាន និងប្រជាពលរដ្ឋ ជាអាជីវករ ទិញលក់សាច់ពពែ រស់នៅភូមិព្រែកតាព្រហ្ម ឃុំកំពុងអុស ស្រុកពញាឮ ខេត្តកណ្តាល…
ខេត្តកណ្តាល៖ កិច្ចប្រជុំសម្របសម្រួល ដោះស្រាយបាតុភាពរវាងម្ចាស់សត្តឃាតដ្ឋាន និងប្រជាពលរដ្ឋ ជាអាជីវករ ទិញលក់សាច់ពពែ រស់នៅភូមិព្រែកតាព្រហ្ម ឃុំកំពុងអុស ស្រុកពញាឮ ខេត្តកណ្តាល ត្រូវបានធ្វើឡើង នៅសាលាស្រុកពញាឮ ខេត្តកណ្តាល កាលពីរសៀលថ្ងៃចន្ទ ទី២០ ខែកញ្ញា ឆ្នាំ២០២១។ ក្នុងកិច្ចប្រជុំ ដែលដឹកនាំដោយអភិបាលខេត្តកណ្តាល លោក គង់ សោភ័ណ្ឌ បានសម្រេចឲ្យប្រជាពលរដ្ឋខ្មែរឥស្លាម យកពពែ ទៅកាប់នៅក្នុងសត្តឃាតដ្ឋាន ក្នុងតម្លៃព្រមព្រៀងគ្នា ដោយមានការឯកភាពពីពលរដ្ឋខ្មែរឥស្លាម និងម្ចាស់សត្តឃាតដ្ឋាន។
លោក គង់ សោភ័ណ្ឌ លើកឡើងថា ជាទូទៅការកាប់សាច់ជាលក្ខណៈគ្រួសារ ដើម្បីធ្វើជាម្ហូបអាហារ គឺមិនមានការ ហាមឃាត់ឃាំងនោះទេ ប៉ុន្តែករណីនេះ ជាការកាប់សត្វលក់ជាលក្ខណៈអាជីវកម្ម ការធ្វើអាជីវកម្មលក់ដូរ និងកាប់សាច់ធ្វើម្ហូបអាហារហូបជាលក្ខណៈគ្រួសារ គឺខុសគ្នា។
លោកអភិបាលខេត្ត បន្ថែមថា ចំពោះបាតុភាពរវាងប្រជាពលរដ្ឋជាអាជីវករ និងម្ចាស់សត្តឃាតដ្ឋាន គឺបានសម្របសម្រួលដោះស្រាយ ដោយបានឯកភាពគ្នា ដោយប្រជាពលរដ្ឋជាអាជីវករទាំង ២៥គ្រួសារ បានសំណូមពរ ដល់ម្ចាស់សត្តឃាតដ្ឋាន យកកម្រៃសេវាចំនួន ៤,០០០រៀល ក្នុង ០១ក្បាល ដោយមានអុស ខ្ទះ និងប្រកបដោយអនាម័យត្រឹមត្រូវ។
លោក កង់ សោភ័ណ្ឌ បន្ថែមថា ក្រោយការសម្របសម្រួលម្ចាស់សត្តឃាតដ្ឋានបានយល់ព្រមឯកភាពយកតម្លៃ ៤,០០០រៀល ក្នុងការសំឡេះសត្វពពែ ០១ក្បាល ដោយមានអុស ប្រកបដោយអនាម័យត្រឹមត្រូវ ក្នុងរយៈពេល ០១ឆ្នាំដំបូង និងសុំឡើងតម្លៃ ៥,០០០រៀល ក្នុង០១ក្បាល នៅឆ្នាំទី២ ទី៣ និងស្នើសុំលើកលែងតម្លៃសេវាកម្ម ពិនិត្យសុខភាពសាច់ តាមរយៈរដ្ឋបាលខេត្តកណ្តាល។
លោកអភិបាលខេត្ត បន្ថែមថា «ចំពោះសំណូមពររបស់ម្ចាស់សត្តឃាតដ្ឋាន និងប្រជាពលរដ្ឋជាអាជីវករ លើបញ្ហានេះ ខ្ញុំបាទ នឹងធ្វើរបាយការណ៍ជូនឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដើម្បីគោរពស្នើសុំគោលការណ៍សំរេចដ៏ខ្ពង់ខ្ពស់ពីសម្តេចតេជោ នាយករដ្ឋមន្ត្រី ដើម្បីពិចារណាលើការលើកលែង ចំពោះសំណូមពរខាងលើ ជូនបងប្អូនប្រជាពលរដ្ឋ»។
លោក គង់ សោភ័ណ្ឌ បន្តថា «ចំពោះមុខ ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋ ដែលបានលើកឡើងថា ផ្លូវចូលទីតាំងសត្តឃាតដ្ឋាន មានការលំបាកក្នុងការធ្វើដំណើរចេញចូល ខ្ញុំបាទសន្យានឹងជួយស្ថាបនាផ្លូវបេតុង ០១ខ្សែ ប្រវែងប្រមាណ ១គីឡូម៉ែត្រជាង និងបំពាក់ទៅដោយភ្លើងបំភ្លឺសូឡា តាមផ្លូវទៅទីតាំងសត្តឃាតដ្ឋាននោះផងដែរ។ ជាមួយគ្នានេះដែរ ក្រុមមន្ត្រីសមត្ថកិច្ចអនុវត្តច្បាប់ ដែលបានប្រើប្រាស់ពាក្យសំដីមិនសមរម្យ ទៅលើប្រជាពលរដ្ឋនាថ្ងៃប៉ះទង្គិចគ្នានោះ សូមសំដែងនូវការសោកស្តាយ និងសូមអភ័យទោស ចំពោះពាក្យសំដីលើសលស់ ទៅលើបងប្អូនប្រជាពលរដ្ឋ និងបានសន្យាចំពោះមុខ ថ្នាក់ដឹកនាំគ្រប់រូប គ្រប់ជាន់ថ្នាក់ ព្រមទាំងប្រជាពលរដ្ឋ ដោយសន្យាឈប់ប្រព្រឹត្តទង្វើបែបនេះតទៅទៀត ដោយសូមកែសម្រួលឥរិយាបទ ក្នុងការនិយាយស្តី និងទង្វើឲ្យបានល្អប្រសើរសក្តិសមជាមន្ត្រីបម្រើប្រជាពលរដ្ឋយ៉ាងពិតប្រាកដរបស់សម្តេចតេជោ គ្រប់ទីកន្លែង និងគ្រប់ពេលវេលា។
សូមរំលឹកថា នៅថ្ងៃទី១៧ ខែកញ្ញា ឆ្នាំ២០២១ វេលាម៉ោង ០៦ព្រឹក នៅចំណុចភូមិ ព្រែកតាព្រហ្ម ឃុំកំពង់អុស ស្រុកពញាឮ ខេត្តកណ្តាល មានការឃាត់សួររបស់មន្ត្រីបសុពេទ្យ ខេត្តកណ្តាល ទៅលើបងប្អូនប្រជាពលរដ្ឋ ដែលបានដឹកជញ្ជូនសាច់សត្វពពែ ចំនួន ១៧គីឡូក្រាម ដែលការណ៍នេះ បានបណ្តាលឱ្យឈ្លោះប្រកែកគ្នា រហូតដល់មានការបង្ហោះហ្វេសប៊ុក ទៅក្នុងផេកសម្តេចតេជោ នាយករដ្ឋមន្ត្រី នៃព្រះរាជាណាចក្រកម្ពុជា បង្កើតឲ្យដល់មានការខមមិនវែកញែក មានខុស មានត្រូវ ទៅលើគូភាគីទាំងពីរជាច្រើន នៅតាមបណ្តាញផ្សព្វផ្សាយសង្គម ពីសំណាក់បងប្អូនប្រជាពលរដ្ឋកម្ពុជាយើងយ៉ាងផុលផុស។
ករណីនេះ ក៏ត្រូវបានសម្តេចតេជោ ហ៊ុន សែន បង្ហោះខ្លីបវិដេអូនោះ ហើយទាមទារឲ្យរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឆ្លើយតបសម្តេចតាមហ្វេសប៊ុកផងដែរ៕
ចែករំលែកព័តមាននេះ