រាជធានីភ្នំពេញ ៖ តារាសម្តែងជើងចាស់អ្នកនាង សឿ សុធារ៉ា បានបោះពាក្យហាក់បង្ហាញអារម្មណ៍មិនសប្បាយចិត្តនូវរឿងរ៉ាវមួយចំនួនដែលខ្លួនបានពើបប្រទះ ក្នុងពេលដែលនាងទើបតែឈានជើងចូលសិល្បៈមិនទាន់បានប៉ុន្មានផងនោះ។ ដោយមិនបញ្ជាក់ថា តើបញ្ហាដែលនាងកំពុងតែជួបនោះជារឿងអ្វី? ប៉ុន្តែអ្នកនាង សឿ សុធារ៉ា ហាក់បង្ហាញអារម្មណ៍រំគាលចិត្តយ៉ាងខ្លាំងចំពោះបញ្ហាដែលបានកើតឡើង ខណៈពេលនាងបានព្យាយាមដោះស្រាយ។
សឿ សុធារ៉ា បានបង្ហាញអារម្មណ៍របស់ខ្លួនតាមរយៈសារដែលបានបង្ហោះតាមគណនេយ្យហ្វេសប៊ុករបស់ខ្លួនថា «ក្នុងមួយឆាកជីវិតខ្ញុំនេះ ខ្ញុំបានមានបំណងជួយចិញ្ចឹមមើលថែជីវិតគ្រួសារខ្ញុំទាំងអស់ ជាពិសេសគឺឪពុកម្តាយចាស់របស់ខ្ញុំ»។ នាងថា «គិតទៅខ្ញុំចេះជួយមនុស្សជុំវិញខ្លួនតាំងពីអាយុ៦ឆ្នាំ ទោះបីថា ការជួយតិចក្តី ច្រើនក្តី ព្រោះខ្ញុំក្រដែរ។ តែនៅគ្រាចុងក្រោយនេះ ខ្ញុំទើបតែបានចូលរួមក្នុងវិស័យសិល្បៈវិញ ខ្ញុំចាប់អារម្មណ៍ថា ពេលខ្ញុំមានបញ្ហាតិចតូច ខ្ញុំកំពុងបានព្យាយាមដោះស្រាយដោយមានទំនួលខុសត្រូវយ៉ាងប្រយ័ត្នបំផុត ហើយខំទប់ទល់ណាស់ តែនៅទប់មិនជាប់ទៀត ព្រោះខ្ញុំចង់សុខ រស់នៅសាមញ្ញធម្មតាៗ តែពេលខ្ញុំខំតស៊ូឈានចូលសិល្បៈវិញ បែរជាមានរឿងគួរអោយខ្ញុំគិតពិចារណាទៅវិញ»។
សឿ សុធារ៉ា បានចោទជាសំណួរថា «តើអាចមានរឿងអ្វីនៅពីក្រោយខ្នងក្រោយ ពេលខ្ញុំបានវិញត្រឡប់មកបំពេញការងារសិល្បៈរបស់ខ្ញុំវិញដែលទេ….?»។
ជាការកត់សម្គាល់ការបញ្ចេញសារខាងលើពីអ្នកនាង សឿ សុធារ៉ា នាពេលនេះ ចាត់ទុកជាលើកដំបូង បន្ទាប់ពីនាងបានជួបរឿងចម្រូងចម្រាស់មួយពាក់ព័ន្ធបញ្ហាលុយតុងទីន។ គួររំលឹកថា ៖ រឿងលុយតុងទីន សឿ សុធារ៉ា ជំពាក់គេ ឥឡូវធ្លាយដល់តារាសម្តែងម្នាក់ទៀត ។
ស្ត្រីម្នាក់ រួមទាំងអ្នកសិល្បៈម្នាក់ផងដែរ បានធ្វើការចោទប្រកាន់ទៅតារារូបនេះថា កំពុងព្យាយាមគេចវេសមិនព្រមដោះស្រាយលុយតុងទីនដែលនៅសេសសល់។ ពួកគេហាក់មិនសប្បាយចិត្ត ត្បិតពួកគេបានព្យាយាមទាក់ទងអ្នកនាង សឿ សុធារ៉ា ជាច្រើនដង តែមិនបានសម្រេច ដើម្បីអោយតារារូបនេះជួយទូទាត់លុយដែលនៅសល់នោះ។
ទោះជាយ៉ាងណា រហូតមកទល់នាពេលនេះ គេនៅមិនទាន់ដឹងនៅឡើយទេថា ដំណើរការនៃការដោះស្រាយរបស់អ្នកនាង សឿ សុធារ៉ា ពាក់ព័ន្ធលុយតុងទីននេះបានឈានដល់ដំណាក់កាលណាមួយណាហើយ ខណៈពេលភាគីដែលនាងជំពាក់នោះបានរក្សាភាពស្ងប់ស្ងាត់នៅក្នុងប៉ុន្មានថ្ងៃចុងក្រោយនេះ៕
ចែករំលែកព័តមាននេះ