ភ្លើងឆេះផ្ទះក៏ឃើញចៅលូនចេញក្រៅរត់គេចបាត់ ស្រាប់តែឮលោកយាយស្រែកហៅឱ្យជួយយ៉ាងរន្ធ.ត់
- ភ្នំពេញ
រាជធានីភ្នំពេញ ៖ លោកយាយវ័យ៧៥ឆ្នាំម្នាក់ ត្រូវភ្លើងឆេះ បណ្តាលឱ្យបាត់បង់ជិវិតក្នុងផ្ទះយ៉ាងអាណោចអាធ័ម បន្ទាប់ពីគេមាន
រាជធានីភ្នំពេញ ៖ លោកយាយវ័យ៧៥ឆ្នាំម្នាក់ ត្រូវភ្លើងឆេះ បណ្តាលឱ្យបាត់បង់ជិវិតក្នុងផ្ទះយ៉ាងអាណោចអាធ័ម បន្ទាប់ពីគេមាន
រាជធានីភ្នំពេញ ៖ លោកយាយវ័យ៧៥ឆ្នាំម្នាក់ ត្រូវភ្លើងឆេះ បណ្តាលឱ្យបាត់បង់ជិវិតក្នុងផ្ទះយ៉ាងអាណោចអាធ័ម បន្ទាប់ពីគេមានការសង្ស័យថា ចៅប្រុសដែលមានសតិមិនប្រក្រតីបានដុតសម្ភារៈដែលនៅខាងក្នុងផ្ទះ បង្កជាអគ្គិភ័យឆាបឆេះផ្ទះយ៉ាងសន្ធោសន្ធៅ ខណៈដែលលោកយាយរងគ្រោះកំពុងសំរាកនៅផ្ទះជាន់លើ តែម្នាក់ឯង ។
ហេតុការណ៍ខាងលើនេះបានបង្កឲ្យមានការភ្ញាក់ផ្អើលកើតឡើងកាលពីវេលាម៉ោង១២យប់ថ្ងៃទី១៩ ខែកញ្ញា ឆ្នាំ២០២១ នៅចំណុចផ្លូវលំ ស្ថិតក្នុងភូមិដំណាក់ធំ៤ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។
លោកយាយរងគ្រោះជាម្ចាស់ផ្ទះកើតហេតុដែលបាត់បង់ជីវិតខាងលើឈ្មោះ រស់ ហ៊ឹមយ៉ា អាយុ៧៥ឆ្នាំ ។ ចំណែកជនសង្ស័យជាចៅប្រុស មិនស្គាល់អត្តសញ្ញាណនោះទេ ។ អ្នកទាំងពីររស់នៅផ្ទះក្នុងភូមិឃុំកើតហេតុខាងលើ ។
តាមប្រភពព័ត៌មានពីកន្លែងកើតហេតុបានឲ្យដឹងថា ផ្ទះកើតហេតុខាងលើនោះ គឺមានអ្នកស្នាក់នៅជារៀងរាល់ថ្ងៃចំនួន៣នាក់ ដោយលោកយាយរងគ្រោះ និងចៅប្រុសម្នាក់ អាយុ២៣ឆ្នាំ ស្នាក់នៅជាន់ខាងលើ ចំណែកឯជាន់ផ្ទាល់ដី គឺមានចៅប្រុសម្នាក់ទៀតដែលមានសតិមិនប្រក្រតីស្នាក់នៅ។
តាមប្រភពខាងលើបានបន្តថា នៅមុនពេលកើតហេតុ គេឃើញមានផ្សែងហុយចេញពីក្នុងជាន់ផ្ទាល់ដីនៃផ្ទះកើតហេតុ លុះមួយសន្ទុះក្រោយមក ក៏ស្រាប់តែលេចចេញជាអណ្ដាតភ្លើងយ៉ាងសន្ធោសន្ធៅបានឆាបឆេះពេញជាន់ផ្ទាល់ដី ស្របពេលនោះដែរ គេឃើញចៅប្រុសដែលមានសតិមិនប្រក្រតីស្នាក់នៅខាងក្នុងបានលូនចេញក្រៅ ហើយរត់គេចខ្លួនចេញទៅបាត់ស្រមោល។ បន្ទាប់មក ក៏ឮសំឡេងលោកយាយបានស្រែកហៅអោយគេជួយពីខាងលើផ្ទះ ទើបបង្កឲ្យមានការភ្ញាក់ផ្អើលដល់ប្រជាពលរដ្ឋដែលរស់នៅជុំវិញកន្លែងកើតហេតុនាំគ្នាជួយទាញទុយោទឹកតាមផ្ទះជួយបាញ់ពន្លត់អណ្ដាតភ្លើង និងខ្លះទៀតបានឡើងទៅខាងលើផ្ទះកើតហេតុ ដើម្បីជួយសង្គ្រោះលោកយាយដែលស្នាក់នៅខាងក្នុង ប៉ុន្តែទ្វារត្រូវបានជាប់សោមិនអាចបើកបាន។
តាមប្រភពខាងលើបានបន្តទៀតថា អណ្ដាតភ្លើងក៏បានឆាបឆេះកាន់តែខ្លាំងឡើង ទើបប្រជាពលរដ្ឋរាយការណ៍ជូនសមត្ថកិច្ចមូលដ្ឋាន និងរថយន្តពន្លត់ឲ្យចុះមកជួយអន្តរាគមន៍។ ភ្លាមនោះក៏មានសមត្ថកិច្ចមូលដ្ឋាន រួមជាមួយរថយន្តពន្លត់អគ្គីភ័យជាច្រើនគ្រឿងបានចុះមកដល់ទីតាំងកើតហេតុ។ ប៉ុន្តែដោយសារផ្លូវមានសភាពតូចចង្អៀតមិនអាចបើករថយន្តពន្លត់អគ្គីភ័យចូលទៅបាញ់ទឹកពន្លត់ ធ្វើឱ្យពិបាកក្នុងការអន្តរាគមន៍ ដោយបានត្រឹមតែរាយទុយោចូលទៅបាញ់ទឹកពន្លត់ប៉ុណ្ណេះ។ ក្រោយពីធ្វើការអន្តរាគមន៍បាញ់ទឹកពន្លត់អស់រយៈពេលជិតមួយម៉ោង ទើបអណ្ដាតភ្លើងបានរលត់ទៅវិញជាស្ថាពរ គឺរលត់នៅម៉ោង១២និង៤៥នាទីរំលងអាធ្រាត្រឈានចូលថ្ងៃទី២០ ខែកញ្ញា ឆ្នាំ២០២១។
កម្លាំងសមត្ថកិច្ចជំនាញបានអោយដឹងថា ក្នុងហេតុការណ៍នេះការិយាល័យបង្ការនិងពន្លត់អគ្គីភ័យនៃស្នងការដ្ឋាននគរបាលរាជធានីភ្នំពេញបានចេញរថយន្តមកជួយអន្តរាគមន៍ពន្លត់ចំនួន១៥គ្រឿង ដោយប្រើប្រាស់ទឹកអស់ចំនួន៥គ្រឿង ហើយមិនបណ្តាលភ្លើងឆេះរាលដាលដល់ផ្ទះជិតខាងទេ គឺឆេះផ្ទះមួយខ្នងប្រភេទឈើលើ ថ្មក្រោម មានទំហំ៨ម៉ែត្រគុណនឹង១៥ម៉ែត្រ ត្រូវភ្លើងឆេះខូចខាតអស់ទាំងស្រុង និងបណ្តាលឱ្យលោកយាយវ័យ៧៥ឆ្នាំម្នាក់ដែលជាម្ចាស់ផ្ទះ បានបាត់បង់ជីវិតនៅខាងក្នុងផ្ទះ។ ចំពោះមូលហេតុ គឺមានអ្នកដុតផ្ទះ ទើបបង្កជាអគ្គិភ័យឆាបឆេះបែបនេះ ។
តាមប្រភពពីបុរសម្នាក់ឈ្មោះ សេន មហាម៉ាតហ្គាលី អាយុ២៣ឆ្នាំ ជាកម្មករលីសែង ស្នាក់នៅផ្ទះកើតហេតុ បានរៀបរាប់ប្រាប់ឲ្យដឹងថា គាត់មានបងប្អូនចំនួន២នាក់ រស់នៅជាមួយលោកយាយរងគ្រោះខាងលើ ក្រោយពីរឪពុកម្ដាយរបស់គាត់បានលែងលះគ្នា ហើយបានយកប្តីប្រពន្ធថ្មីរៀងៗខ្លួន និងទៅរស់នៅផ្សេងៗគ្នាអស់ទៅ។ រួចបានទុករូបគាត់ និងប្អូនប្រុសរបស់គាត់ឲ្យរស់នៅជាមួយលោកយាយរងគ្រោះ ប៉ុន្តែមួយរយៈពេលកន្លងទៅនេះ ប្អូនប្រុសរបស់គាត់បានទៅធ្វើការនៅឆ្ងាយ ដោយសព្វថ្ងៃនេះនៅក្នុងផ្ទះកើតហេតុខាងលើ គឺមានតែគាត់ និងលោកយាយស្នាក់នៅផ្ទះជាន់ខាងលើ ។ ដោយឡែកមានបងប្អូនជាដូនមួយរបស់គាត់ម្នាក់ទៀត ដែលត្រូវជាចៅបង្កើតរបស់លោកយាយរងគ្រោះ ដែលមានសតិមិនប្រក្រតី ត្រូវបានឪពុកម្ដាយចាក់សោទុកឲ្យស្នាក់នៅខាងក្នុងផ្ទះជាន់ផ្ទាល់ដី ដោយទុកប្រឡោះតូចមួយសម្រាប់ឱ្យរូបគេចេញចូលប៉ុណ្ណោះ។
តាមប្រភពពីបុរសខាងលើបានបន្តថា បុរសដែលបងប្អូនជីដូនមួយរបស់គាត់ គឺមានបញ្ហាសតិមិនប្រក្រតីអស់រយៈពេលជិតមួយឆ្នាំកន្លងមកហើយ បន្ទាប់ពីរូបគេប្រើប្រាស់ថ្នាំញៀ.ន រួមទាំងមានបញ្ហាបែកបាក់ប្រពន្ធ ហើយក៏ត្រូវសាច់ញាតិលែងរវីរវល់ជាមួយតែម្ដង។ កន្លងមក បុរសដែលបងប្អូនជីដូនមួយរបស់គាត់រូបនោះ ក៏ធ្លាប់បង្កជាហិ.ង្សាវា.យអ្នកជិតខាង និងលោកយាយរបស់គាត់ ថែមទាំងបានដុតផ្ទះខាងលើចំនួន៣ទៅ៤ដងរួចមកហើយ តែក៏ត្រូវបានរូបគាត់ រួមជាមួយប្រជាពលរដ្ឋឃើញ និងពន្លត់ទាន់ពេលវេលា ហើយរូបគាត់ក៏ធ្លាប់បានរាយការណ៍ជូនសមត្ថកិច្ចមូលដ្ឋានដែរ ប៉ុន្តែមិនមានចំណាត់ការអ្វី ក្រៅពីអប់រំណែនាំតែប៉ុណ្ណោះ ។
បុរសខាងលើបានបន្តទៀតថា នៅមុនពេលកើតហេតុ រូបគាត់ត្រូវចេញទៅធ្វើការនៅខាងក្រៅ ទុកឲ្យលោកយាយស្នាក់នៅខាងក្នុងផ្ទះតែម្នាក់ឯង ហើយដោយសារខ្លាចបុរសជាបងប្អូនជីដូនឡើងទៅរករឿងធ្វើបាបលោកយាយ ទើបរូបគាត់ប្រាប់ឱ្យលោកយាយចាក់សោសំរាកនៅខាងក្នុងផ្ទះ រួចគាត់ក៏បានចេញទៅធ្វើការបាត់ទៅ។ លុះដល់វេលាម៉ោងកើតហេតុ ទើបមានគេទំនាក់ទំនងទៅប្រាប់គាត់ថា ផ្ទះរបស់គាត់ត្រូវភ្លើងឆេះតែម្តង។
ក្រោយពេលកើតហេតុ ជនសង្ស័យដែលត្រូវជាចៅត្រូវបានសមត្ថកិច្ចនាំខ្លួនយកទៅប៉ុស្តិ៍នគរបាលរដ្ឋបាលស្ទឹងមានជ័យទី២ ដើម្បីចាត់ការតាមនីតិវិធីច្បាប់។ ដោយឡែកស.ពលោកយាយរងគ្រោះត្រូវបានសមត្ថកិច្ចប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ