ខេត្តសៀមរាប ៖ លោក ទៀ សីហា អភិបាលខេត្តសៀមរាបមាន ប្រសាសន៍ថា ដោយពិនិត្យឃើញថា ស្ថានភាពនៃការឆ្លងរាលដាលជំងឺកូវីដ-១៩ នៅតែកើតមានឡើងជារៀងរាល់ថ្ងៃ…
ខេត្តសៀមរាប ៖ លោក ទៀ សីហា អភិបាលខេត្តសៀមរាបមាន ប្រសាសន៍ថា ដោយពិនិត្យឃើញថា ស្ថានភាពនៃការឆ្លងរាលដាលជំងឺកូវីដ-១៩ នៅតែកើតមានឡើងជារៀងរាល់ថ្ងៃ ក្នុងទូទាំងខេត្តនិយាយរួម និងដោយឡែកក្រុងសៀមរាប ។
ដូច្នេះដើម្បីទប់ស្កាត់ការឆ្លងរាលដាលជំងឺកូវីដ-១៩នេះ រដ្ឋបាលខេត្តសៀមរាប សម្រេចដាក់កំណត់ជាតំបន់ក្រហម ក្នុងភូមិសាស្ត្រសង្កាត់ និង ភូមិមួយចំនួនក្នុងក្រុងសៀមរាប ជាបណ្តោះអាសន្ន សម្រាប់រយៈពេល១សប្តាហ៍ ដោយគិតចាប់ពីថ្ងៃទី១៧ ដល់ថ្ងៃទី២៣ ខែកញ្ញា ឆ្នាំ២០២១នេះ ក្នុងគោលបំណងធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺកូវីដ-១៩ នៅក្នុងភូមិសាស្ត្រកំណត់ជាតំបន់ក្រហម គឺ ដើម្បីទប់ស្កាត់ជំងឺនេះមិនឱ្យឆ្លងរាលដាលទៅតំបន់ផ្សេងទៀត ។
លោក ទៀ សីហា មានប្រសាសន៍ទៀតថា ស្ថិតក្នុងដំណាក់កាលនេះ សូមអំពាវនាវដល់បងប្អូនប្រជាពលរដ្ឋទាំងអស់ដែលកំពុងរស់នៅក្នុងតំបន់ក្រហម សូមកុំចាកចេញពីផ្ទះរបស់ខ្លួន និងសូមឲ្យមានការអត់ធ្មត់ក្នុងរយៈពេលនេះ ព្រោះបើមិនដូច្នោះទេការឆ្លងរាលដាលជំងឺកូវីដ-១៩ នៅតែកើតមានឡើងហើយ ប្រសិនបើមានការខ្វះខាតស្បៀងអាហារ សូមផ្ដល់ដំណឹងដល់មេភូមិ ឬចៅសង្កាត់ ដែលយើងកំពុងរស់នៅ ឬការបញ្ជាទិញម្ហូមអាហារ ហើយស្នើសុំការដឹកជញ្ជូនទំនិញជាស្បៀងអាហារឥតគិតថ្លៃដែលរដ្ឋបាលខេត្តបានរៀបចំតាមរយៈលេខទូរស័ព្ទក្រុមការងារ ប៉ុន្តែលេខ ទូរស័ព្ទដែលបានបង្ហាញនេះ គឺទទួលតែព័ត៌មានសម្របសម្រួលដឹកជញ្ជូនតែប៉ុណ្ណោះ ។
ជាមួយគ្នានេះដែរ លោកអភិបាលខេត្តសៀមរាប ណែនាំដល់មេភូមិ ចៅសង្កាត់ និងអភិបាលក្រុងសៀមរាបត្រូវចុះត្រួតពិនិត្យមើល ស្ថានភាពជីវភាពប្រចាំថ្ងៃរបស់ពួកគាត់ឲ្យបានជាប់ជាប្រចាំ ហើយរាយការណ៍ជូនដល់រដ្ឋបាលខេត្តបានដឹងប្រាកដថា ពួកគាត់ជួបការលំបាកអ្វីខ្លះ និងមានតម្រូវការអ្វីខ្លះ ដើម្បីរដ្ឋបាលខេត្តមានមូលដ្ឋានធ្វើការដោះស្រាយជូនពួកគាត់ឲ្យបានទាន់ពេលវេលា ព្រោះយើងមិនត្រូវទុកពួកគាត់រស់នៅដោយគ្មានស្បៀងអាហារហូបចុកប្រចាំថ្ងៃឡើយ ជាពិសេសបងប្អូនប្រជា ពលរដ្ឋដែលមានជីវភាពលំបាកខ្វះខាត ។
គួររំលឹកថា លោក ទៀ សីហា អភិបាលខេត្តសៀមរាបធ្លាប់មាន ប្រសាសន៍ថា ការដាក់ជាតំបន់ក្រហមនេះ ដោយមូលហេតុបងប្អូនប្រជាពលរដ្ឋមួយចំនួនមិនសហការ មិនអនុវត្តតាមការណែនាំ មិនចេះការពារខ្លួន និងក្រុមគ្រួសាររបស់ខ្លួនបន្តនាំអោយឆ្លងដល់អ្នកដទៃ ដែលមានការយល់ដឹង និងប្រុងប្រយ័ត្នខ្ពស់ ហើយលោកក៏បានសុំឲ្យមានការយោគយល់ និងអធ្យាស្រ័យចំពោះបងប្អូនប្រជាពលរដ្ឋក្នុងក្រុងដែលតែងតែគាំទ្រ និងអនុវត្តតាមការណែនាំរបស់ក្រសួងសុខាភិបាល និងរដ្ឋបាលខេត្ត ៕
ចែករំលែកព័តមាននេះ