ខេត្តស្ទឹងត្រែង៖ ប្រជាជននៅខេត្តស្ទឹងត្រែង មានការងឿងឆ្ងល់ ថាតើហេតុអ្វី មន្ទីរសុខាភិបាល រួមជាមួយរដ្ឋបាលខេត្តស្ទឹងត្រែង មិនចេញរបាយការណ៍ ស្តីពី លទ្ធផលអ្នកឆ្លងកូវីដ១៩ និងប្រភេទ ដែលតា ថ្មី នៅទូទាំងខេត្តស្ទឹងត្រែង ក្នុងរយៈពេលច្រើនថ្ងៃ រហូតថ្ងៃទី១៧ ខែកញ្ញា ឆ្នាំ២០២១។ ក្នុងនោះ ក៏លេចលឺថា នៅក្នុងក្រុងស្ទឹងត្រែង មានអ្នកឆ្លងកូវីដច្រើននាក់ តែគ្មានការបង្ហាញអំពីតំបន់ ដែលត្រូវប្រុងប្រយ័ត្ន។
មួយរយៈ គឺចាប់ពីរសៀលថ្ងៃទី៩ ខែកញ្ញា ឆ្នាំ២០២១ រដ្ឋបាលខេត្តស្ទឹងត្រែង បានចេញសេចក្តីប្រកាសព័ត៌មាន ដោយលើកឡើងថា គ្មានអ្នកឆ្លង ពុំមានជាសះស្បើយ និងពុំមានអ្នកស្លាប់ ដោយសារកូវីដ១ ៩ទេ។
ពលរដ្ឋ មានការត្រេកអរជាអនេក និងក៏បានខកចិត្តជាពន់ពេក ក្នុងរយៈពេលប៉ុន្មានថ្ងៃនេះ គឺចាប់តាំងពីគ្មានរបាយការណ៍ ស្តីពី លទ្ធផលនៃអ្នកឆ្លង និងជាសះស្បើយ ក៏មានពលរដ្ឋ តាមរយៈការបញ្ចេញមតិ តាមបណ្តាញសង្គមហ្វេសប៊ុក និងសារខមមិនមួយចំនួន។ ប្រជាពលរដ្ឋនៅស្ទឹងត្រែង ព្រួយបារម្ភ គ្រាដែលអាជ្ញាធរសមត្ថកិច្ច បើកឡើងវិញ ដោយលែងបិទខ្ទប់ទៀតហើយ។ ពោលគឺបើកអោយដំណើរចរាចរណ៍ជាធម្មតា និងរាល់សកម្មភាពអាជីវកម្ម លក់ដូរទូទៅ ក៏បើកដំណើរការឡើងវិញជាធម្មតា។ សកម្មភាព និងមុខរបរទាំងនេះ អាចប្រឈមខ្ពស់ សម្រាប់ប្រជាជន ដែលមិនបានដឹងថា តំបន់នៃការឆ្លង និងតំបន់អ្នកពាក់ព័ន្ធ ស្ថិតនៅទីណា?
លោក អ៊ុង សូវៀត ប្រធានមន្ទីរសុខាភិបាល ខេត្តស្ទឹងត្រែង បានមានប្រសាសន៍ តាមប្រព័ន្ធតេឡាក្រាម កាលពីថ្ងៃទី៩ ខែកញ្ញា ឆ្នាំ២០២១ ថា និន្នាការឆ្លងរាលដាលនៃជំងឺកូវីដ១៩ ក្នុងខេត្តយើង ឃើញថា មានការថយចុះបន្តិចហើយ នៅពេលនេះ។ ដូច្នេះ ដើម្បីថែរក្សាបាននូវកំរិតឆ្លងរាលដាលនៃជំងឺកូវីដ១៩ កាន់តែតិចទៅៗ ហើយមិនអាចផ្ទុះសាជាថ្មីឡើងវិញ សូមឲ្យយើងទាំងអស់គ្នា ចូលរួមអនុវត្តវិធានការ ៣ការពារ ៣កុំ ឲ្យបានខ្ជាប់ខ្ជួនជានិច្ច។
លោក ម៉ែន គុង នាយករង រដ្ឋបាលខេត្តស្ទឹងត្រែង និងជាអ្នកនាំពាក្យសាលាខេត្តស្ទឹងត្រែង បានបញ្ជាក់តាមប្រព័ន្ធតេឡាក្រាម កាលពីថ្ងៃទី១១ ខែកញ្ញា ឆ្នាំ២០២១ ថា ចំពោះការជូនដំណឹងអំពីព័ត៌មានករណីកូវីដ១៩ បានកែសម្រួលហើយ គឺត្រូវរង់ចាំទទួលយកព័ត៌មាន និងលទ្ធផលពីក្រសួងសុខាភិបាល ប៉ុណ្ណោះ។ ខេត្ត ពុំធ្វើសេចក្ដីប្រកាសព័ត៌មានទៀតទេ។
រហូតមកទល់ថ្ងៃទី១៧ ខែកញ្ញា ឆ្នាំ២០២១ មានអ្នកឆ្លងជំងឺកូវីដ១៩ ជាច្រើន រួមមាន អ្នករត់ម៉ូតូឌុប ចេញពីផ្សារ អ្នកលក់សាច់នៅផ្សារ រួមទាំងបុគ្គលិកធនាគារដ៏មានប្រជាប្រិយភាពច្រើននាក់ផងដែរ៕
ចែករំលែកព័តមាននេះ