រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានគូសបញ្ជាក់យ៉ាងដូច្នេះថា បញ្ហាអត់ ឬមានការអនុគ្រោះពន្ធក្នុងការនាំចូលទំនិញចូលទីផ្សារអឺរ៉ុបលើកលែងសព្វាវុធ (EBA) មិនសំខាន់សម្រាប់កម្ពុជានោះទេ ប៉ុន្តែអ្វីដែលសំខាន់ គឺអ្នកបញ្ជាទិញទំនិញពីកម្ពុជាមានចំនួនច្រើន ។
ថ្លែងក្នុងសន្នីសីទសារព័ត៌មានពីការបើកយុទ្ធនាការចាក់វ៉ាក់សាំងការពារជំងឺកូវីដ១៩ ជូនកុមារអាយុ៦ដល់១២ឆ្នាំ នាព្រឹកថ្ងៃទី១៧ខែកញ្ញា ឆ្នាំ២០២១ នាវិមានសន្តិភាព សម្តេចតេជោហ៊ុនសែននាយករដ្ឋមន្ត្រីបានលើកឡើងថា ឥលូវនេះវិស័យកសិកម្មបានធ្វើលើសផែនការកំណត់បានជិត១១០ភាគរយដោយស្រូវដើមរដូវបានធ្វើការច្រូតកាត់ជាង២លានតោន ហើយស្រូវវស្សាធ្វើលើសផែនការជិត៣លានហិកតាទៅហើយ ។
ជាមួយគ្នានោះដែរ សម្តេចក៏បានលើកឡើងថា រោងចក្រដែលវិស័យឧស្សាហកម្មបានដំណើរការធម្មតា ដោយរោងចក្រដេរម៉ាស់ឲ្យកងទ័ពនគរបាល ដើម្បីសមស្របជាមួយសម្លៀកបំពាក់ចំនួន៤នោះត្រូវបានគេបង្វិលចំនួន២រោងចក្រទៅដេរខោអាវវិញ សម្រាប់ការនាំចេញទៅក្រៅប្រទេស ។
សម្តេចបញ្ជាក់ថា ៖«កម្ពុជាមានការបញ្ជាទិញយ៉ាងច្រើនចំពោះរឿងមាន EBA ឬមិនមានEBA មិនសំខាន់ទេសម្រាប់កម្ពុជា! កម្ពុជានាំចេញ«…»ឥលូវមិនមានបិទរោងចក្រ រោងចក្របើកថ្មីវាកាន់តែច្រើនទៀត ។ ពីព្រោះប្រទេសប្រេស៊ីល មីយ៉ាន់ម៉ា បង់ក្លាដេស មិនអាចផ្គត់ផ្គង់បាន ហើយពេលនេះបានប៉ះពាល់ដល់វៀតណាមក៏ផ្គត់ផ្គង់មិនបាន» ។
សម្តេចក៏បានអះអាងពេលនេះ ដោយសារមានតម្រូវការ ហើយបណ្តាប្រទេសមួយចំនួនដែលធ្លាប់ផ្គត់ផ្គង់ឲ្យមិនបានផ្គង់ផ្គងដោយសារមានបញ្ហានោះធ្វើឲ្យអ្នកបញ្ជាទិញបានសម្រុកមកបញ្ជាទិញទំនិញសម្លៀកបំពាក់មកកម្ពុជា ដោយសារគេគិតថា កម្ពុជាសុវត្ថិភាពជាង ។
យ៉ាងណាក្តី សម្តេចក៏បានលើកឡើងថា កម្ពុជាក៏មានបញ្ជាខកខាន គឺសេវាទេសចរណ៍ទាំងផ្ទៃក្នុង និងខាងក្រៅតែម្តង ក្នុងនោះមានទាំងសេវាភោជនីយដ្ឋាន ទាំងហាងការហ្វេ «…»។ កាលណាសេវាអស់នឹងបើកនោះមនុស្សនឹងមានកន្លែងធ្វើ អីញ្ចឹងយើងដោះស្រាយបានមនុស្សធ្វើការច្រើន ។
សម្តេចតេជោ ហ៊ុនសែន នាយករដ្ឋមន្ត្រីបានគូសបញ្ជាក់ថាប្រទេសដែលមានសេដ្ឋកិច្ចជឿនលឿនដោយសារវិស័យសេវាកម្មនាំមុខគេទាំងអស់ក្នុងនោះអាមេរិក បារាំង អាម្លឺម៉ង់ ជប៉ុន … កសិកម្មប៉ុន្មានភាគរយ? គេមានសេវាកម្មទទួលបានប្រាក់ចំណូលធំ ។
ក្នុងឱកាសនោះដែរ សម្តេចក៏បានផ្តាំទៅភ្នាក់ងារទេសចរណ៍ទាំងអស់ថា បើសិនមិនបានចាក់វ៉ាក់សាំងការពារជំងឺកូវីដ១៩ទេ នោះអ្នកមិនអាចធ្វើជាភ្នាក់ងារទេសចរណ៍ឡើយ ៕
ចែករំលែកព័តមាននេះ